Tayffart n Tudart

Yura t: Mimun AMSBRID

Degw udem n tfuct

Degw udem n wnzvar

Deg udem n wadvu

Degw udem n wdrar.

Degw udem n tayyut

Degw udem n usynu

Degw udem n tzvayart, n tsrighwa,

N uzemmûr, n wurtan…

Degw udem n ucar – Jj yi!

Jj yi ij n wass…

Nnidven,

Ij n uyur…

Nnidven,

Ij n usggwass…

Nnidven.

Jj yi ad twarigh,

Ad sregh,

Ad inigh…

Ad ddaregh!

D tidet: tudart ad d tamessast…

Ttarzigh zi twara ghar tennidven.

Tyezzem,

Tbettva,

Tghettver…

D tidet: itwdder wbrid,

Issullus ujenna;

Itawi wannay,

Isvuraf tndlafen …

Maca tekkregh,

Tbddigh,

Gguregh.

Lqmi ûr zemmregh, tmurudegh.

Srughigh tfawt di tallest,

Tggegh ul deg ixf inu…

Arezzugh di tirja,

Deg idvnnat,

Di tiwecca, degw awaren…

Deg ij n wawar: teddaregh!

Degw udem n Tudart,

Jj yi ad ddaregh!