Tiggaz di arrimet n wussan

Yura t: Mimun Amsbrid (Biljika)

                                  

«Etrange chose qui m'arrive! Etrange terre où je ne rencontre que moi-même!», “Mazouz au pays des Miroirs” in Hamadi, Conte berbères.

 

TIRA

A tira inu!

A tira inu yuran s ukeccudv n wartu.          

 

ADN

Mmi s n tasrighwa

Yewcin i wjenna

D inni…

Deg ighzar yetwattun.

 

ANZVAR

Anzvar yeccat x Bruksel

Anzvar yeccat x Barsuluna

Anzvar yeccat x  Dan Pagh

Anzvar yeccat x Tizi n Wsli

Ur inu yeccûr.

 

TAYSTITIQIT

Necc yurezzun ict n tistitiqit nnidven

Ict n tistitiqit war day s azidjez ura d imettvawen

War d ay s ighuyyan ura d ixeyyiqen

Taystitiqit n wjris tewta d ays tfuct

Taystitiqit n wdfer d tfawt

Necc i tixsen ad ggegh taystitiqit n wswadv d useghdi

War zemmregh!_

Arennan ay imettvawen.

 

TAZEDDIGHT

Zedghegh deg wguji

D anewji x timura d wussan

War ghari tamurt, war ghari ajenna

Ghari cway n wawaren tejja yi ten d yemma

Udrusen, arrzven, war tiwdven

Zzgharegh gharsen zi tesmedv n wussan

Tsudvegh d aysen tudart

Hettvigh ten war xessyen

Huma war d ayi tneqq tesmedv.

 

ADN-bis

A yehhap inu!

Mmis n tmûrt yedwer d amsbrid!-

D mmis n wbrid.

 

TIMEXSA

Tugha xsegh ad asegh…

War d as ufigh.

 

ASEQSI

Mani djigh?

Awarni tisit.

 

IXF

Yeffegh d akidi yexf inu

Sewdvegh d ay s

Yeswedv d ayi

War nmrussun

Nemsebdva amen nmsagar

Ijj n yexf yekka amaru

Ijj yekka asammar.

 

TIMGHARIN

I timgharin?

War ssinegh!

 

(Mimun Amsbrid  Biljika, 17/11/2002)