Tullizt (Nouvelle):

Azerzariy Issagh negh

Irar t gher tmazight: Nurdin Bawdrea (Goulmima)

Agzul (Résumé): Azerzariy day gan ilmanyen imnekcamen i Yuguslafya g imenghi amadvlan wis sin

Ass agi yettungha yan wales. Amettin a wer t igi xs nekk. Ism inew Issagh, Issagh igan azezariy. Kkan ten ar i qqaren digh s “Bu wbarda”. Ip, kkigh da ttasigh abarda ghef tadawt inew. Ass a mmutegh, swanfagh seg yisey n ubarda (selle).

Ssnen i akkw medden. Ssnent i awd tasukin (boulevards), tasukin akkw n temdint. Ssnen i awd ixenciyen (sacs) d ixerdvan g llant tghawsiwin wer yemyaghen. Nek Issagh, Issagh azerzariy “Bu wbarda”. Imk (comment) itteg ad ur i tisinem awd kwenni?!

Max allig tbeddem? Ma kwen yaghen? Magh da yi tseksiwem s ubpadv n wallen?  Mani wenna ghef ttemseqsam? Ghif i? Is wer djin tannim g tudert nnun amdan immuten?

Apa! Kwenni, kwenni ayd inghan afdiwen u id amm nek. Kwenni ayd ifsan (semer) tawada g umdval s tpamajit nnun. Kwenni ayd i yegban adaw (dos), tnegham i. Ima kwen yaghen  tura tbeddem ar dig i tesmuqqulem? Is da kwen iskejjar yinney inew? Pa! Pa! Pa! Ad ur i tteggam ad dvsvegh… Midd ad armegh tatvsva yiwwet likkert? Allig mmutegh ayd ttedvsvagh? Maka is ighey yezmer ad ittvesv wales immuten? Ales nnagh wer issin tatvsva akkw mayd tla tudert ns.

Mek tram ad i tgim aoliz tessufhgem in seg uyeddegh n waludv (boue) g idda wzgen seg tfekka new. Yalwu (facile) wya ghur wem, s ucku telsam iselsa d imaynuten, nna ghef llan ikebbudven a yettraran anzvar. Idd nekk, payyi ammas n waludv war akebbudv ittraran anzvar. Anzvar nna ghef i yekkaten, yessigh asemmidv i tghemrin n tfekka new. Ma kwen yaghen da tseksiwem zar i amm infalen? Tafekka (corps) ddegh tennum asemmidv g tudert ns, tsal ad t tennam awd g igil ns.

Nezghat in mar ad i tinniyem g unmila. Waxxa! Imki dghi gigh pat ipeyya, da (ici) wer inni ad i d yettawedv deg s wenzvar, ffghegh d aludv. Pan iselli da yi yberrey g iqezzay, maka aya wer ili awnul. Tanemmirt nnun, llat tzilem, nuzegh dghi ad i tadjim d “ubarda”, is righ ad iqqim didi. Ar ttemseqsam: imax? Ucku zvrigh tudert inew akkw did s, pat usigh ghef s kigan? Awd ixerdvan n uqqweryan d ixencay n imrigen (armes) nna yawen ittyakren (voler). Is tessnem aya? Imax da testibbim ghef wakal s idvaren nnwen? Max da ttegam imki nnagh? Max allig tbeddem tutem tistiwwa? Mani wenna mi tutam s upezza n ifassen? Up! Aghella nnwem.Ghalegh ittallaten nnagh idd i nek; maghef da kwen iseqsa? Mimk gigh allig mmutegh? Fekat as aneghmis. I maghef kwen iseqsa dghi? Mayd as tennam? Is kwen ukzegh? Is ur trim ad as tinim mayd msegh? Nek azerzariy Issagh, “Bu wbarda”. Umi ayd gigh? Aya d war awnul, yekka ten ghur i bba d mma, tnekrem tenghim ten; wapil! Wer id kwenni nnik? Nghan ten imarawen nnun.

G imenghi amadvlan amezwaru (1ère guerre mondiale), ilin da medden asen iqqaren ilimanyen, ar ttinin n wis i zvrin ghas nekkin g ubrid azayez, s wad i yasey kra n yiwen deg sen issegm i g tgemmi ns, wer ssinegh ugar n uya.

Ssentigh tawuri seg mayd ghur i mraw d sin (12) n isegusa. Bbubbigh akkw ayen mi tghey tfekka new tamelwaght ad t tasey. Swirigh (travailler) ccil i mar ad ttezdvey tberruyt inew n ughrum. Day lekmegh simraw (20) ughalegh s twuri n tzerzariyt pill, d yal tifawt d yal tadeggût ar teddugh s usebded n tmacint. Ku yass n waram asag yiwdv wass n ugdez anmalas (souk hebdomadaire) ar ttnadagh s udghar n imesniyen (bus) g uyenna d iqqimen g wakud. Ar tnadagh tawuri di yal tasukt, ar ttiligh g ku adghar g ighey ad yili wzerzariy; ar zzruyegh ass g twuri, ar gganegh g idv (nuit) wurtan (jardins). Maka g tegrest (hivers), da nessagh g isenfiyen n tmezgidiwin (mosquées).

Ar swiriyegh amki kramraw (30) n iseggûsen, ayennagh dghi as gegh ammi yugregh asemmud (âge) inew s simraw (20), ip! Is wer trim as tisinem tamacaput iw?

Ar neswiri seg tizwiri nek d uyeddegh n ubarda; waddegh ttizirem dat i, pat wer da yids bettvugh amm wass amm yidv, ar is swiriyegh; da ghif s gganegh g idv. Ip da ti ttessugh deghsegh ghef s. Zrin wapil n iseggûsen afad yughul ism inew ig Issagh azezariy, s tgira “Bu wbarda”.

Zrin ghif i wussan g ur ttiligh awd tubiyt n ughrum. Ar ttefqegh s usebded ad gganegh tamacint tamezwarut, tissnat, ar ttettigh seg ufagu gher wyad; ar ssuturegh g inejda (voyageurs) ar asen ttinigh: «Pan azerzariy!», gegh ammi da tterridagh (danser) dat uderghal (aveugle), seg mis inejda wer ts ttawin dig i. Awd amderra! Ghas da teffuren tawada s azey nna ran. Yitsen da ttnuyen itvumibilen asen d igran itran, netta wiyd da neddpen asin tibalizin nsen g ifassen.

Ardi tteggwzen inejda seg ifuga, ar ttettigh nek seg gher wayd, ard n awdvegh ameggaru ar qqaregh: «Pan azerzariy!»,  «Azer-zariy a mass?!», «I ad ak n ssiwdvegh tibalizin agi a mass?!» «Pan azerzariy a massa!». Yitsen medden dadi ttemderran pill; ilin wiyd da yi d ttraran inin i: «Awed nek gigh azerzariy amm key!», itsen zuzden ad ili mderren. Nek ar ttemmerwalegh ffir inejda g webrid s temdint; iwa pat iqqan add raregh tubiyt iw n ughrum!

G wass n ugdez n umalass, da ttiligh dinna, iligh ig zvrigh sin irgazen da ttemsumen axenciy n ukbal negh win imendi, da n ttawigh azzaz ar ghur sen inigh asen: «Add issufegh rebbi lxir!, is temsasam ghef watig?». Ruregh inigh: «S lalwit d tdusi nnek a wma! Idd ad ak asigh s aseober?». Seg useober  ghif ubarda afella n tadawt  ar azdugh nnes, negh gher tisirt; ar i ykkan tighrad zund da yi yakken tisent n ufus. Dart uya, da ttughulegh s uzrab ar agdez tayd tikkelt ar digh ttberrahegh: «Pan azerzariy!, Pan azerzariy!».

Kra n tikkal, da swiriyegh g idv g usebdeb, ar ssewrugh negh ar tekkuregh imkerra (camions). Wer yad qqimegh gigh ales, maca yan umudvan ittasin. Maf ad tbeddel tudert iw, ssentigh ar swingimegh s wudem amaynu, ssentigh (commencer) ad bdvugh inger isebbaben d imderrhen  indegh i  yettuzun abettvan. Zrin wussan allig di teddam kwenni tura, ternu tudert g ughedder d usebbex, ar ttakigh ammis da sduqquren iperkusen nnwen admen n tmurt a; teddam d tmunem d d usgellen d tsumki (esclavage). Lumar imezvadv amm nekkin. Is da yi tesseflidem? Wer isul “Bu wbarda” amk nna yga: payyi nek ddegh s tseksiwen dghi ghzigh amdan n tmedlin (tombes) nnwen. Mar anni tawdvem iswi (but) nnun itteqqlen zarrun. Mek id akal da yettemmergigi ddaw idvarren nnwem; idd tammurt a pat qad ttuslelli (libérer); nek ad ttuslelligh, d yal ales amm nek. Ssnegh is ur yad inni ad yili seg wakud n tghawsiwin a, is tessnem aya? Negh wapil? Iga yawen mayd awen usigh d ixerdvan. Iwdva! Mag n teswingimem? Is tram ad awen asigh ixerdvan mar as tafem ad tewtim ayt ma?

Magh da yi teddalem ighef s txenciyt ad? Is termim amuqqel nnes, d ussfeld i wzezariy Issagh? Adjat i imir ad awen ssmuregh tamacaput inew.

Id nnagh ffqegh digh ad asigh ixerdvan, ilint tillas dlant akal, iddegh sellegh; tnedra n umkerred axatar, azzlegh kigan. Ibedd umkerred dat yan g iguga innurzvem  yunfen mar ad ittwura  iggez d seg ul umkerred yan umdan (nombre) iggudin n iserdasen (soldats) s ikebbudven ittraran anzvar (imperméable). Iddegh i amnayen sawlen s tutlayt nnsen; wer ukizegh mad nnan. Allig id utan s ufus, wer mmectigegh seg wedghar iw. S ucku ugigh tawuri nnagh.

Dinnagh ayd ildey yiwen deg sen tabeckit (pistolet) nnes ineyyec i t s wudem, ukan ddugh ad gegh ayenna yra; asigh sin ixerdvan negh kradv, gregh wis kuzv d wis semmus s tillas, nnigh ger i d ighef inew: «Wi ad ilin i ymenghi mgal nnwen!».

Aggugen (s'éloigner) imkerrden, ddugh ixerdvan inew, gganegh imik, gregh ten ghif tadawt, amzvegh abrid g tillas, d ur ssinegh mayd yaghen dart uyennagh, ffghent deffir i titiwat n umrig, dvregh d ixerdvan inew s akal. S wad teddum tizirm i. Payyi aya nnigh awen akkw ayenna yellan. Akkw aya? Kwenni tessnem kigan n wis tghewwegh tmurt a mgal nnun; ighewwegh umezvyan d umeqran; kwenni tessnem aya. Ayenna as wer i ygi, s ucku mmutegh. Nekk Issagh, Issagh “Bu wbarda”.

Yaru t: Ramz Klimendi (ittyassen g tullizt talbanit dart imenghi amadvlan wis sin), irar t s taorabt Muhemmed Mufaku (tasghunt AlArabi, uttvun 346, asebter 48), irar ts gher tmazight Nurdin Bawdra (Gulmima)