TANFUST: Peddu i  yserman (Butin pour poissons)

Tura t: Mayssa Racida (Bentveyyeb, Nnadvûr)

  Awarni tharyadvin i d yarezfen zzerzent raggûaj deg wjenna, irarent s tesfay (les vagues) n wayer (la mer), mgharent dewrent d idurar itfeyyadven x ibuda, d icudvadv n useynu i d itharaben s wenzvar itwettva d s wuran (uru-turut) amecnaw imettvawen n temghart umi tecmedv teyzem tsa.  Awarni uxeyyeq d ukemmar iyardven ajenna beysent, ruxa yesvha, aseynu ioarq (quitter) imsedvfar d ticudvadv. Asemmidv isseghd rami yuca yuhher qao ifarredv qao izzerz  redcûr mani d temzvaryadven ioerbab ibarcanen da d dipa. Tayyut tdarreo i ydurar jar ighadjen nnes, tssehrurud abehrûr x marra udem n wayer. Zeoma twandvren imuzzaren nni marra huma ad ruren ad arezfen imuzzaren nnedvni am rebda.

Ajenna yesqar, tfuct day s tbuo zi teghmart ghar taghmart mani mma yessiwdv it uzir nnes, tmajut (la senteur) n tmûrt i yswin zeg imettawen n ujenna tennufser di tarut n tufut mani yennum reowin n wayer acemrar issvûren aked tsisant (la salinité), aman deg wayer tissiqen s tuzzeyzewt darraoen i yejdi, isvudvar darraoen i tefras n marra min d asen yunnudven amen tedarrao tyemmat i mmi s axmi akid s temsafadv.

Netta di tgharrabut nnes tamezyant ytifrar x weorûr n waman yeggûr, tfuct tdveffar idt mermi mma yexzvar it itaf it awarn as taredf idt. Yiwedv mani wudjghen waman, yessenta inettvar tracca amen yeqqar:

«S usemqar n arebbi ad ssentigh, d netta i d ayi gh ad ayi yehdvan»

Yexzvar ammu d wmmu yufa mghar netta x wudem n wayer ssarkukkudven day s waman teggen as rempend. Yeqqim yessawar aked ixf nnes amen yennum rebda yneqq timmar itarezzva icten s tennedvni ismurdvus ta s tennedvni s wawar d uparred iqqar:

«Imara ruxa twarigh zzat i tasrit n wayer, ma ad t awyegh akid i ghar taddart? Upu min qqaregh! ad ayi t tnegh temghart inu, ufigh tet d, ad as inigh ad tewwet aftah di radjagh ad ayi d teccûr ict  n tracca n wûregh d wedmam, mahend ad dewregh zeg meqranen n dcar marra xezzvaren d ghar i, ad sghegh agharrabu am wenni i d smaren di tilibizyun, maca i mani t gh ad sbeddegh? neccin walu ghar negh tamarsiwt mani gh ad tbedda.»

Netta oad yessawar itxarrasv itûrja tarja n uzir yarz itent day s umedduker nnes yekk d x ughezdis nnes itazzer s tgharrabut zi tenni itazren s umutûr, yizzif xaf s iragha dt s uzawar yenna s:

«Apiyya! apiyya uyûr d, ymar ayi di rqeb yif ac.»

Yarr d xaf s umedduker nnes aniymar yenna s:

«Ayer yiriw attvas, mghar netta ur nnec yehsvar a yur n webvzvizv, u mara dja tesghid araq a i di tyemmared smer ayi d recwaghed a tawmat, agra n arebbi da i gh ad yeqqim.»

Yekka x ughezdis nnes uca yeodu, issedvfar as rxezrat amenn iteghzvazv tighmas ittemtum yeqqar:

«Mana yserman da yedjan, isebbunya (espagnols) yemmaren  iserman s wezvru d yijdi tejjan aman izdigen.»

Issesmedv tifeqqeht, isghery it. Awarni drus uca yessenta yetleplip itghennaj iccat s ifassen di tefrewt  yeqqar:

«Yemma necc war iwwiyen yedji s n pulanda

Tinoacin xaf i d arum deg wnedrar.

Yemma wap ya yemma tamghart teqqim mebra yamecri,

Iserman ass a mmenghen aked tracca d amenghi,

Yemma min xaf i icedden remrac n temzvi,

Kradv n ihanjaren d yemmat sen d yemma teqqar mmi

Xaf m itghennajegh a tasrit n rebhar

Meolik i d gh ad tefghed ict n twara ad nemzvar.»

Yuca aked tracca teccûr di tisi, yekkar ibedd itemqetmar s ict n tumart temghar itedvsva zeg imezzughen rami yuca aked tracca tedqer, yezoef ancuc izzughar, izzughar yertex tracca nni ghar idvaren nnes rami yezvra min day s, csint ticerraw, yardv idt utebpedv…  Mmudejghen zzat s yitran amen d azir, yettu yaqemmum yejj idt yarzvem. Tifras n wudem nnes drint s tewregh, attvawen bbarquqyen, imetmi yuzgh as x yires. Yedwer d ij n yiwed (bnadem) n wezvru war itesri mghar i wsuhart nnes d wertax n wur nnes itekken x wayawya itardvidvis ineddu, yarder azvru nni dja  yuzghen yeswizzedv yefsi amxumber n tracca yekkes d zzay s afus n utarras, yekkes d aghir d udvar yeqqen tsiri tcedd s ifiran marra uffen zziyzwen. Yecsi ijj n ufus zeg inni, yexzvar day s rxezrat txeyyeq. Twezwiz rxezrat tarbu yamnus, rxezrat tehnunnedv deg unuri, rxezrat tezregh d akid s s imettvawen, twesq iten d, isseghri imetmi yarzeg isseghri day s attvasv n tûrja, attvasv n usitem, attvasv n rayas yenna s:

«Oad yemma c ad tiri traja ghar k mermi gha d tesqaded "rmanda" ad tawyed "tvumubin" ad ghar s tdewred s recwaghed...»

Tanfust a d ict n tidett, d ict n tirawt, temmecsi d d ijj n wewlaf zi tudart i nteddar, u amezgun n tanfust a yirar x tma n wayer acemrar (la méditerranée)

MAYSSA RACIDA, 9--2--2000