Tawiza

Yisi wenzvar, ibedd usemmidv n tajarst s uqucceh nnes d tesmedv. Yefsi wedfer x tqiccitin n idurar, yedwer d aman itnesses d aked tsedjyin i ytawyen ghar ighezvran.

Issenta unebdu!

Issenta akid s rehmu d arbu. Tfuct tezruza min ighemyen x wudem n tmûrt, yuzegh imendi d yerden d tugga deg iyran yiriwen d idemrawen di twaghzent tisuntawin. Sghin icewwaren imeyran d tbantawin d tcuccay n tizvdvent. Qqnen tighunam i ydvewdvan nsen. Ffghent id tghardvmiwin d ifighran zeg ixubac nsen. Mmudjghen d arezzun min gh ad ccen d umi i gh ad qqsen.

Yejja Massin agharam (ville) n Nnadvûr awarni umi yessek astittey (examen) di tghuri n uneggar n useggûs. Yettvef lkar, yeddu ghar Kebdani i d yusin x utaram (ouest) n Nnadvûr xef yeggêj s kumraw d smus n ikilumitren (45 km).

Yiwedv Ighzar n Uriri, tammûrt mani i d yefruri zi tmedjatc am ufidjus, mani yarzvem tittvawin nnes, iru yesghuy di twara tamezwarut, mani yermed awaren imezwura n tmazight i d as tessettvedv yemma s akd ughi yizvidven. Issars dvar nnes xef ucar n tmûrt nnes, yuca aked yixf nnes axmi i dt tisi jar ifassen nnes tarri dt id ghar yedmaren nnes, tzvemm idt ghar s amec ttegg tayemmat i wseymi nnes. Tammûrt nnes itexs it ttexs idt, izzuyt it am zzuyten wasdvawen yemmat sen i yeddun ad teymar min d asen gh ad tucc ad ccen.

Isqarqeb di tewwart n taddart nsen, tennûrzvem d, tessijj d yemma s Tvuca. Tebbirep umi day s tentveh. Tesfarnen ghar s, uca tenna s:

«D arraqet zzay k, a mmi Massin inu! Adef d, nezzuyt ic attvas!».

Issvûrf tanebdat n tewwart n taddart, yettvef fus i yemma s, yessudm idt, tqada dt, tessek tareqqa n ufus nnes x uzedjif n mmi s, tesseqsa dt:

«Tsalid tghuri nnec, a mmi ynu nigh? Tessekked ca n ustittey nigh upu?»

Isfarnen, uca yarra xaf s:

«Wap, a yemma, saligh tighuri, saligh astittey. Aseggûs a s usmurs (réussite) imara yexs arebbi».

Iqqim Massin itraja agmudv (le résultat) n tighuri. Imaca ict n tmesract issn it netta wapa, war t yessin ca rwacun nnes, netta yessen belli war itiri ca aseggûs a ghar weswir (niveau) wis kradv zi tghuri wis sin. Mayenzi war yeghri ca amecnaw inermaden nnidven. Tugha dt itmennak (s'absenter). Arni xaf s belli netta war yessek astittey di marra min yeghra, minzi ca n isermaden nnes war dt jjin ad yadef ghar sen huma ad yessekk. Suya tugha dt yessen is (belli) netta ad izru (échouer) twara ya. S umengal (par contre), yemma s tghir as mmi s ad ismurs. Tugha t rebda teqqar as: “Mara tesmursed aseggûs a a mmi ynu, ad ac ggegh urar s seysu x yijdvadv!”. Netta itarra xaf s deg ur nnes: “Tiwecca zic a yemma ad ismurs mmi m! Mmi m izru zi mermi!”.

Yesra i yijj n uraghi, netta jar idvesv d tnukra, yuss d zeg uzqaq n taddart. Yarzvem d tittvawin nnes, rexdenni, itesra: “Massin .. a Massin… kkar ssin zeg idvesv..”.

Yennehmez di tassut, yarzvem aqemmum huma ad xaf s d yarr:

«Ap a yemma! Min texsed?»

Tennas d nettat:

«Kkar ssin nigh ad kid c adfegh s yijj n urekkudv!»

Yarra xaf s netta:

«Jj ayi ad arnigh cway n yidves a yemma! Yak rexxu d arrendan, mayemmi gh ad kkaregh nec zic».

Tenna s d yemma s:

«Kkar sinni qa tfuct tiwedv almas n ujenna! Aqqa c rbucta (facteur) yiwi c d ict n tebrat. Yiwi yi d arebbi tuss ac d zi Nnadvûr!».

Mghar tidar d tabrat, yermes (comprendre) s deghya belli d agmudv i day s. Yendvar xaf s dduri, isvûr ibedd, am uyazvidv, yezruza afriwen nnes. Yarzvem aqemmum, yarta am ughiras war yejjiwnen tjuni.

Yettvef d tassut nnes idvefs it, yisi t yesars it xef rectu deg ûdjagh n wexxam, yudef ghar arcen, yar d aman zeg wqbuc, issird zzay sen ifassen d ughembub nnes, yessefdv iten s yijj n zzif. Yarzvem d tawwart, yessijj d s uzedjif, tewt idt id tvyan n tfuct ghar tittvawin i ysvûren twaqqnent. Yeffegh ghar wezqaq, yufa din yemma s teqqim di tiri tessifif aren s busveyyar deg wndu huma ad dt ttegw d arecti ad zzay s tegg aghrum. Akd ughezdid nnes Zulixa, yedji s, tessirid tizvewdviwin d tighenjayin d ifenjaren…

Yenna sent s yict n tnixt d taharcawt:

«Azul a yemma.. azul a Zulixa!».

Arrint id xaf s deg ict n twara:

«Azul a Massin!».

Ibedd arendad n yemma s, yudar mahend ad as izvûr afus, issigh as fus i wetcma s. Tewta Tvuca ghar wehsin nnes tekkes d ssin tabrat nni. Tuca s t. Yettvf it s ufusi. Yarzvm it, yessufegh d zeg wgensu nnes amcum nni n wegmudv yedvfes. Rami i dt yarzvem yufa yura day s: “Izru”. Izewgh as ughembub idewr as am tumatic. Yuca aked tmessi turey as d zeg idvaren ar azedjif. Rexdenni itwara yemma s tessars busveyyar x waren yedjan deg wndu, uca tesseqsa dt:

«Iwa, tiwyed d ca nigh walu?».

Yisi ghar s s tittvawin nnes, yessudar azedjif nnes, uca yarr d xaf s:

«Walu.. war d iwyegh walu a yemma.. zrugh a yemma… zrugh..»

Tezzerz aren xef ubehrûr nnes, tewta fus aked ufus, tqesseh day s tittvawin, tessenta ad dt tzawar:

«Magahr a mmi ynu maghar? Mamec i d ac temsar umi cek tezrud? Imeddukar nnec marra smursen, ha cek i yezrun a yarec n unuri! Ip a mmi ynu, mechar xaf k nisi d tamara, mechar d imunas u mechar d azawar! Rebda aq ayi txarrvasegh day k, qqaregh as mmi war ssinegh yecca ura yessens s razv, war ssinegh yeprec ura yeggenfa? Tnusegh mebra yidves swengimegh u ssawaregh aked yixf inu qqaregh as Massin inu ad ighar, ad yemghar, ad yettvef ura d netta araq nnes, ad yaber, ad iharr idrimen mara yexs arebbi ad zzay sen neddar amecnaw iwdan. Aseooa cek tessentid zi ruxa tewdvid texnunsed deg wcar! Mamec d ac temsar a yamcum inu?».

Yarzvem ancucen nnes, yarra xaf s:

«Min yemsaren yemsar rexxu a yemmi!».

Tenna s d nettat:

«Umi qqaren min yemsar yemsar? Nec arezzugh ad ssnegh mayemmi cek tezrud di tghuri nnec?».

Yarra xaf s netta s yict n tnixt txeyyeq:

«Minzi war zzemmaregh ad gharegh! Mamec gh ad ggegh nec ad gharegh u nec rebda djuzegh!? Zeg ûmi ddugh ghar Nnadvûr rexxu kradv n iseggusa d nec oemmars tyawant war jjiwnegh; tekkaregh d ghar tifawt djuzegh, kkaregh s wass djuzegh, tnusigh djuzegh! Mammec tegga tghuri ya gh ad gharegh? U yak amedya yeqqar: “War itiri obudu ar gh ad yiri odudu!” nigh upu a yemma».

Ha tesra Tvuca i wawar a amarzag, teshissef aked mmi s, uca tenna s:

«Wap a tsa ynu, ssnegh is war ttetted walu, u tekkared ammu tnusid ammu, maca necc war ghar i walu, ra tmenyat ura d agra, war tifegh mayen i d ac gh ad ssekkegh, war d anegh itiwedv walu, baba c rami yemmut war d anegh d yejji mghir daddart a wapa. Suya i cek arrigh ad tremded huma ad ayk irin inaden, xzvar ghar yaytma c! marra ffghen farqcgher umi ffghen zic zi tghuri nsen, war abren war yedmen, min yuca arebbi mghar idves d unuqar deg izuray. Attvas n ihenjaren amecnaw cek a mmi war ghar sen bu wagra, imawlan nsen d imezvradv amecnaw neccin, waxxa amenni ghrin iwdven huma ad dewren d ca, ca yedwer d asermad, wennedni d anezzarfu (juge) … Rexxu kessin yemmat sen d babat sen, war ten itxessvi walu, ccin, swin, qqnen, irdven. Amecqur a mmi ynu teffitsed, war tihed bu ad tghared? Ca n iwdan iwyen ayi d ca n ineghmisen xaf k, nnan ayi qa mmi m war itidef ad ighar, yekkar itunnudv deg ibriden di Nnadvûr, iyarru ibuntawen itkeyyaf iten!».

Yarr d xaf s netta s yijj n wudem iburrem:

«Wenni d am dt yennan isxarreq xaf m!»

Tenna s d s uzawar:

«Wap isxarriq… wap a mmi s n min d gh as yinigh! Nican a mmi ynu marra min nnan d tidette! Ura d cek war day k bu inaden, tedvfared aytma c! Yallep uc i twaweh war da twirigh aghenzûr nnec».

Izwegh wudem nnes, yuca aked tmessi tergha deg ixsan nnes. Tedded tenyart nnes, tepnunni d tidi ttudum xef igemmizen.

Yarzvem tawwart, iffegh azarq it awarna s, ibrubbez di teysart am ufunas yennufsren, yudef ghar webrid ameqran i d yusin jar izeghran d igharwadv d yecfiren d tzeggûrin ig ighemyen s ubarru x tmawin nnes. Tfuct tergha tessecmadv axmi nni tbedd sennej i wzedjif nnes. Yuca aked fad issenta itacm idt id. Issazagh as tmijja. Yenna deg ur nnes: “Ayyaw ffudegh. Netta yllep oad d azyen n wass, wi d xaf i gh ad yessiwdven tameddit? Zi ssa ar din iri yengh ayi fad!”. Ixarresv di mayen da s tenna yamma s, yessiwer aked ixf nnes yenna: “Tfu x icekkamen! Mani mma truhed aqqayen awarna c, min mma teggid d min mma tennid ad dt id ssiwdven ghar taddart!».

(Ad yetwadvfar)