Tawiza

Attvas n imazighen war ssinen aseggûs amazigh. Wen x af s iteslan di twara tamezwarut, yesrusa attvas n iseqsan: umi qqaren aszggûs amazigh? Man s i d yusa? Melmi yessenta? Wi dt yeggin?…atg (ar taggara).

Aseggûs amazigh ula d netta zeg iseggusa yedjan deg wmadval amecnaw aseggûs n irumiyen, d useggûs n imselmen. Ghar wadaf n useggûs amazigh, teggen imazighen urar ula d nitni am marra waydud n umadval. Maca itxessva anegh ad nessen qa yedja ura d ijj n useggûs qqaren as aseggûs amazigh. Netta d ijj n useggûs itajar iseggûs aya i nessen di tudart nnegh. Netta d amenzu di tlalit nnes xef inni nessen.

Attvas zeg ûmi yedja: umi kkaren imazighen d ugellid nsen “Cacanq” uyûren ghar Mizvra mani ggin ijj n umenghi d ameqran aked Faroawn, ffghen zzay s s yiri nsen d azirar. Uca ggin ijj n wurar d ameqran yekka kradv n wussn. U neccin ntegg zzay s urar i yetwassnen s “umensi n yennayer”. U zeg ûss nni ssentan iamzighen feqqden iseggusa nsen amec yetwassen useggûs a di tmûrt nnegh s useggûs n tyarza. U manya ytejja negh ad nessen aqa imazighen nitni d imezwura deg ûttvas n tghawsiwin n wesyiddi n tudart d weydud.

U s wadaf n useggûs ssitimegh aseggûs d amimun d ameggaz i weghmis n Tawiza umi nessitim tudart d tazirart ghar dat. Mamec ssitimegh aseggûs d amimun i marra inni ytarin di Tawiza d imesghura nnes u d marra aydud amazigh n Tamazgha mani mma yedja d yinni yisin amnus n Tmazight. Nessitim ad yili ijj n useggûs i di gh ad taf Tmazight tasghart i xef terezzu attvas zeg ûmi. U asitem ameqran ad tili ict n tmunit n tidett n imazighen aked aya-wya deg iyyar n umussu adelsan amzigh u ad tili tghuri s tmazight u ad tili ula d nettat d ict n tutlayt n tussna di tmûrt tamughrabect u ad t ssidfen gher ugherbaz, u marra iyran nnidven. Ssitimegh zeg imazighen i war yarettvin s tmazight ad xef sen kksen afary yedjan xef tittvawin.

I wawal amzigh, tettaregh ad yili deg idammen n umazigh d tmazighin, akid s bedden(t) huma ad dt jjen(t) izeddgh di tmûrt nnes.