UNGAL: Temzvi yettuzlan (8)

Muhemmed Burhim (Meknass)

Lmuollima Zubida d ax tsghar awal n irumiyn, d ax tssnoat tirra nsn d mimc ad naru s lqlm d tadwayt. Ku tsfert da ntnghal lmdad xf idical nnx d isriwal nnx!

Hlima, yat tarbat d taxatart, tghzzif am talghmt, ur tssin la i tighri la i tirra, la ad tssiwel s tfransist. Hlima tsdid am ifili, tghzzif am unrar, ghur s ibubban am win n tiydit!

Lmuollima nnx toezz ghur s Hlima, ntat ayd ax ihettvan mec ur tlli lmuollima, ntat ayd ysuffdvn iperkasen n lmuollima, ntat ayd da yttawin tacekkamt inyer lmuollima nnx d lmuollimat yadvnin. Xlasv Hlima tya tasmxt n lmuollima y taddart n ssekwila dix y ighrem! Hlima da tsirid awd ioban d fckan n lmuollima d win n uryaz nns…

Zrin d ussan, ufix d ixef inu inyer tiwriqin tumlilin d lqluma da reccmex udmawen n midden nna ghur nx y tddun zi tamazirt n mma zi Latvlas anammas, udmawen uzzghen, d izeggûghen s timira d tarrazt xf uqcac, midden ur yin am waoraben nghd am irumiyn, midden, ayt ighenba am win n Yidr…

Aghulx  da tqqimax ghas nek ammas n urti hmak ad ssufghx aynna yffan i jaj n wul inu. Ku wass ixssva yi ad recmex aynna ykkan dat i d aynna tannay titv inu. Zi ssin baba da yi yssagh tiwriqin tumlilin d lqluma iwraghen, izeggûghen, izeyzawen… Dix, mani ma yumzv lkunji nns ixssva yi ad as ssnotx arcam inu, d as yttiojib bzzaf!

I ssekwila, lmuollima Nadya da iy takka aommud d taghriyt (la punition) xf urcam, tanna yi belli ddix ad ssxubx advu i ixef inu s urcam!!

Dix, ufix d ixf inu yix d Aorab 100%! Ilbda yix d amzwaru i taorabt ammas n imddukal inu, da tssawlx xef waorabn am is yix aorab, ur da tihmilx xef udayn d ayt Israil. Awd nek da tsawalx xf umzruy n waorabn n "Ljapiliya" da s tinix "amzruy nnx", ils nsn iyya "ils nnx", imdyazen nxmujn yyan "imedyazn nnx".

Taddart tiss 4, gher "lmuollima" Zpur, Zpur oad tya  talkkuct (tajwanjit), aryaz nns tlla ghur s tamart, lmuollim bu tmart nna yi can taghriyt aseggûs nna advggûl nns! Zpur ozzex ghur s bzzaf, s mi llix i lbda amzwaru i taorabt. Yan wass tghra yi tca yi yat tawriqt d tumlilt, tnna yi ad t tawix i lmuollim bu tamart ism nns "ssi Obdeljebbar", ddix umzvex t s tazzla, cwi ynna yi ixef inu ad annayx mayd yllan y twriqt nna! Rzvmex t ufix t tura s uzeggûr ylla yura dis s taorabt: «Yma iozzn, loil ad (cet enfant) iyya matta way (très bon) y taorabt, dghi rix ad dt tamzved ghur c y taorabt aseggûs nna yddan inca allap». Cix as tawriqt, aoaydx d ibardan inu!

Yan wass, nnan ax belli ndda ad noayd zi lmuollima nnx gher yan lmuollim yadvnin, lmuollim ad iwoer yssn ghas i titiwat n ibarqn d wuddaz, yat tsfert ywwet yan umddakl inu s ubarqio alli d yafraw zeg ansa nns ytutti gher dvart. Cwi pa yan lmuollima nnx n tfransisiyt tdda d ghur s nghil belli is tdda as as tini ad diy nx ytenpella. Zzix ntat tqqima da tsawal xef lmuollima nnx tamzwarut s yan wawal ur iplin! Y tadeggût smunx imddukal inu nnix asen: «sseghdat ghur i, mec nqqim gher lmuollima ad ndda ad nzzriy aseggûs nnx y unazir d taghriyt d tighri walu! Ixssva ax anoayd gher lmuollima nnx nna nwalf, yallap may tnnam?!». Kuci icirran nnan iy: «waxxa, ad noayd gher lmuollima nnx». Nnix asen: «Dghi!». Numzv t s tazzla ar taddart mani tlla lmuollima nnx, nufa t tella tumzv udm nns s ifassen da tru! Ghas ntat tannay ax taghul da tssdva s ufrahn tkker da ttazla ghur nx  nkker nkni nssufx icirran yadvnin nzzvotnin, cwi, pa lmudir ydda d, yqqim da ytsawal nta d lmuollima nnx d lmuollimin nna, ybrrem lmudir ghur nx ynna ax: «Is tram lmuollima nnun mad lmuollim nna?». Nenna s belli nra lmuollima nnx, noayd gher lmuollima nnx ighudan, nrah zi wghyul  nna ykkatn midden s ibuccar!

Y ighrem nnx ucix d belli y taddart ssnx belli can lpajt tlla tjra, annayx bba yqqim y taddart ssnx belli yumzv lntrit, yqim zi lxdmt, ysala zi losvker d ssvehra!

Dan d can yits, kksen ixlidjn n uzmmur zi bnid ax, zzriyn ibraden, cwi pa ighman ixatar kkren gv ansa n ixlijn n uzmmur, gv ansa n tuyya d iydjuyn  d Bahmmu nghin t igherman d "lfvillat" n igvraydviyn n loesvker. Ku yuk s ighrem axatar, ku yuk isamma (a nommé) ighrem nns xef ism n yelli s nghd tamettudvt nns… naghul nek d imddukal inu ur da nttafa insa mani gher ad ntlapa. Kuci yeyya ghas igherman taghul lhumt nnx  tqmer, d arraw nna n igvraydvoyn da diy nx txzzvaren s yan uraoa (le regard) ur ihlin am is nkkin ayd asen ybbin ixlijn nsn n uzmmur d tuyya tazizawt am id nkkni ayd ybnan igherman ixatar gv  ansa nna mani da tlapan.