Izran n wemsebrid

Yura ten Mimun Lmutawessitvi

I

Imara texsed ad ayi tafed, urzu xaf i mani war djigh.

***

Abrid d azeyrar, nec d aqudvadv.

***

Ticri war dji d awadv; aswizzedv war dji d udvuf.

***

Mani djigh? Mani war djigh!

***

Oemmars war cmizegh i yijjen mani yexs - ura i yixf inu.

***

Ca n yewdan tticced zzay sen tighit; maca udrusen.

***

Tudart d tarewra ghar zzat.

***

Ssarzafegh tudart s rmewt (amen ssarzafent timgharin azzvri s yinjan).

***

D tidett: imara war kid sen teshundarted ad ac inin: "cek d aghyur".

***

Tzedgh anegh tiggwda: irs nnegh yewdva!

***

Mermi mma xsegh ad adsegh, taggûjegh!

II

Ad zzvugh awaren… ad ten zzvugh deg wcar n tira. Ad ttvefen, ad ghemyen, ad sghiddwen, ad msvawaren, ad arwen… Awar ad yedwer d awaren, ad msebdvan x wurawen… Awaren ad d jjen awaren  am yîrd itejja d taydart, taydart ttejja d acewwaf, acewwaf itejja d tracca, tracca ttejja d taffa, taffa ttejja d iyyar, iyyar yetcûra tasraft, tasraft…

Awaren imara qqimen deg wmawar (dictionnaire), imara war zzay s d ffighen huma ad twazzvun deg wcar n yizran (d tenfusin d tqessisin d tefridvin…), mani gh ad wten izvewran, ad msvarawen, teggen amacnaw imendi yeqqimen di tsarfin nigh deg iqebbuzen attvas n iseggusa, war dt id yekkis bab nnes ad dt yezzvu di tmûrt n tyarza: imendi ya, akid wussan, itcer, yeddakkûr d ahemmum, zi ssenni yarecca yetmendvar. Amenni awaren yetghiman nedvren deg ûwaren: twattun, tweddvaran, tmettan, areccan.

Awaren teddaran deg ûwaren  war dji deg imawaren.

Awaren d andver n wawaren  war dji d tudart nsen.

Abrid n wawaren zeg imawaren ghar wurawen d izran  maca udrusen yinni i ten itarin.

Arit (écrivez) imara texsem ad qqimen wawaren n wem ddaren!

Arit imara texsem ad qqimen wurawen nwem ddaren!

Arit imara texsem ad teqqimem teddarem!

                            Février 200