Tawiza

Tfuct tghri. Nqqim aghzdis x ughzdis x tbadut, awarni taddart nngh. X arragub, acmmudv nni ttejja tfuct awarnas ixssi, ils idvfar wnnidvn. Zg wzwraragh ghar uwarghi, ajenna issnta itziyziw. Tirart n tfawt d tallst tticc i yzghran ca n tfras nnidvn ur djint am tinni n wass. Twettva d ict n tffrawt¹ sneyfan ghars wurawn n iwdan d imddaren: ur ttsrid awar ura d asbooi ura tazut ura d asjiwjw.

Aghzdis xf ughzdis, nssusem: nc d ymma ur tmsiwidv s wawar. Idvwdvan nns ghettvrn tidmamin n ttsbih, ict tdvffar tnnidven. Udm nns ynnirsen² tmsdvfarnt xafs tfras n tmulli³. Ssnegh is ur kidi tdji – aqqat mani nnidvn, akid ca n iwdan nnidven, ur ten ssingh nc. Tteg akidsn awar ad msagren ghar ughlluy, x tbadut n awarni taddart. Xmi ghad isala umsawadv, ad tbedd, ad ay ttini: «kker ammi ad nadf ghar babac».

Iwdan a n ughlluy, ur d ttisn lbda: ict n twara tenna yi: «tittvawin inu ddakkwalnt id urant!».

Mani ttaf anict uya n tffrawt ghar ughlluy?! s wass ur xafs tharrted: ad tinid days ayraw n tmgharin! ur tssined aqqat jar txswin, tdveffi nigh ttezzvi; ura g iyyer ttekks d armu i tfunast nigh tmjjer imarmez; ur tssined aqqat di tgharghart tdarrez tabisvart nigh tssray imarmez; ura tqqim ghar tsirt, tharri imarmez – ca d iwzan, ca d taneghda: ad yttecc, g wass nni di ymjer, d afrfur, d aryun, d zembu nigh d tazvmmit!; ur ttessned aqqat ghar ifllusn d ifruryn idvnnat, ttettvf ten ijjn ijjn, tssekka ten zi titv n ulgzim («zi tittvawin n iwdan», tenna yi umi tsseqsigh: maymi sn ttgged amnni a ymma ?); ur ttssined tarbu aqbuc, tettvef abrid n tara tazggwaght, ad taym aman n tissi; ura tessars d tadvuft, tqqim ad tqardvec; ura tssekka tasettva x isuray n taddart, nigh ttari d zi taddart n lalla Tlaytmas zegga xafs tssij, tegga s mayn ghad tecc, tsrir as ihrucn nns, tssird as, teqqn as, tssufgh t d ad tqqim di tiri, adu tsrighwa; ur tssined…

Xmi ttghima x tbadut ghar ughlluy, di tectut di tteffgh Tmurt zi tfawt hama ad tadef di tallest, di fssynt twilawin⁴, ddakkwalnt d iorbab, di ssusumn imddaren, tbeddaln iwdan, ddakkwalen d nitni-ur-djin d nitni, aswingm iddakkwal d tirja – rxdnni, mala tzvri t, ad tinid ur tdji d tenni d amettudvt nni tugha ur itiwdven ad tecmez azdjif nnes: tarsa, udm nns isfdv, tffgh t tzwegh nni n wmarri d tamara n wass; idvuwdvan nns sqiccimen i tedmamin n ttsbih; tittvawin nns zvwant, jmmdvent: twarant mayn ur twirigh. Wi ttwara? Ur ssinegh!

Udm nns iddakkwar d tisit, tmsdvfarent xafs tifras n yinni ttwara.

Wi kid ttemsawadv ymma gw ghimi nnes n ughlluy?!

Amenni kuy aghlluy: nettat twara, nec twarigh t ttwara. Ar as srgh ttini: «kker a mmi ad nadef ghar babac, issudjs uya!».

(Mimun Amsbrid)

Tizmilin:

^{1 Le calme

2 Serein
^{3 Tendresse

4 Les formes}}