Siwel, war tejja ixf nnec d amessuci, siwel, sefsi isekraf ikerfen udem nnec d asefsi, swingem war teqqen tittawin nnec x tifawin n tidet d ttighuni, siwel, ini x yenni cek yucaren, x yenni cek issigwjen x tiseqqar nnec d agaji, sefsi d marra min ghar k d aghufi.

Sifaw yudef ghar ssuq, yudef ad yajju minzi ghar yeddar, maca itwacmet itwacar, ssuq imghar uraq nnes, itadef d ghar s wenni isekkûn d wenni war isekkîn, d tamdint n imenghan x uoeddis, tittawin n ayt bab nnes uyrent ghar tighawsin n tmesghiwt d tmenziwt, ca yisi acmat d roewtc nnes, ca yisi tifras n tighit yeggur jar tarehbiyin n uzenzi d umenghi, marra temxetwayen d amhizwar n tarezzut x weghrum amessas.

Mayemmi netta ghar itwacar di ssuq nnes? yenni t yucaren d midden, yessen min onan, maca yuggi ad t yini, yennum akid sen tacaren t d netta ixezzar day sen, itaca akid sen ssufughen t zi tnettit nnes d netta yesqar jar asen, itcetca ghar ixf nnes wapa, am udrar, d iseggwusa d netta yesqar, ghar uneggaru ad innefgeo d timessi.

Wi izemmaren ad yirar akd irsawen n tmessi?

Amalas nni izeryen deg ass n ssuq yendep d izmar ad t izzenz, yufa imerdas n rmexzen bedden ghar tewwart tameqrant d issadafen ghar iyyar n ssuq, ttaren zzay s ad ixellesv tazettvatv di tmurt nnes xef wagra nnes, tazettvatv ad t yewc ad t yecc midden s tuccefra, rexxu umi d udfen ghar ssuq war yeqqim walu!! Ass a ucaren as idrimen i zi yezzenz izmar, ass n tiwecca ad das acaren iles nnes, ad taf yugnu war issiwir, ass n farwicca ad as acaren tifras nnes, ad yeqqim war ghar s imal ura d idvennadv, u netta yessen aydud umi ghar ajjun twangit nnes di txuncay n uweddar netta yemmut.

Nexs nigh nuggi, iceffaren djan d rfadj di ssuq nnegh, Sifaw yeddar jar asen, mermi mma ucaren zzay s cwayt d netta oad yarenni tudart.

Siwel uca siwel... Imal ad yiri i wawal...

(Said BELGHARBI /2008)