Tawiza

Yudef ghar taddart awarni ughedjuy n tfuct i yssecmadven, yuca s tumart (joie), maca war tiwidv, axmi tghary, ad tagh ad tawedv xminni i d xaf s gh ad tarr Nunja, ad as d tini ura d nettat ttexs idt!
Umi tendver tadjest, yeffegh d Massin ghar wazzay n taddart ad ikkes tighufawin i yedjan ghar ugensu n wexxam.Yeswedv ghar itran yareqqen tsiqsiqen deg wjenna, yardven tidjas. Tessijj d tfawt n tiziri jar tiqaccatin n idurar, tedvfar it id tiziri s wudem izewghen, tessenta ttari deg wjenna. Manaya itejja wen yexsen ad yarja mebra yidves ict n tudart d tarumansit. Nunja s wazvri nnes acedvbi teodu d zzat i tittvawin nnes teggûr am tsekkûrt, txezzvar d s tittvawin nnes di tittvawin n Massin. Ixzvar wa s tittvawin nnes di tittvawin n Nunja, masagarent rxezvrat, tesqad as d ijj n wesfarnen, yarra s netta s yijj nnedvni, yisi deg wdvar nnes huma ad tet yedvfar. Umi xaf s ihart iragaha t:
-«Surf ayi (excuse-moi), a tahenjirt! Xsegh ad kid m ssiwregh mara yexs wur nnem!»
-«Ap d cek! Min texsed ad ayi tinid?».
-«Ghar umezwaru azul xaf m!»
-«Azul»
-«Mammec tedjid?»
-«Aqa yi panet, i cek mammec tedjid?»
-«Ura d necc aqqa yi panet, ha xsegh ad am inigh ma tetvfed tabrat nni i d am d sqadegh aked Yettvu?».
-«Wap tvfegh tet»
-«Tessned a Nunja, xsegh ad am inigh ijj n wawar ucigh zzay s zeg ûmi zvrigh udem nnem izviren (beau, zeg ûzvri) di twara tamezwarut, awar nni texsegh ad dt inigh rebda, mayenzi xminni dt qqaregh tacigh s tumart tamghar war ghar s bu-neggar, awar a netta d amezvyan maca yemghar deg ur inu “texsegh cem”, u s tidett, texsegh cem a Nunja».
-«Wap ssnegh illa d tidett ttexsed ayi a yur inu».
Umi d as d tenna awar a tvfen ifassen i wayawya, yenna s Massin:
-«Tessned a Nunja, txarrisvegh day m attvas, soeddugh timedditin inu ggum ad qqnegh tittvawin inu, mayenzi war zemmaregh ad ddaregh mebra ma ad day m xarsvegh, u d anuggim (impossible) ad ddaregh nec mebra cem! I cem a Nunja min ttacid arendat inu? Ini yi s tidett?».
Tenna s d nettat s trumansit:
-«Tghir ac war ghar i bu-wur huma war tacigh? Nigh tghir ac necc d tafunast mebra yaghi nigh d tzizwit mebra tamment? Zzat i marra manaya, tessned illa necc d tafeggant (humaine), ghar i ur itaca amecnaw cek, tghir ac war d ac ttarigh taynit xminni ttirid rebda awarni taddart n Karamas, nigh tghir ac war tacigh aked rxezvrat nnec d wesfarnen nnec?! Necc ucigh akid c zi rxezvrat nnec tamezwarut, ura d nec soeddugh timedditin inu mebra yidves s umentil n uxarrves day k, zi mermi d necc trajigh ass a huma ad kid k msagaregh ad ac inigh texsegh cek a Massin i rebda, war cek tettugh oemmars s tidett, a tayri inu!».
Nettat oad tessawar, pnunnyen as d imettvawen zi tittvawin yizviren, x wansu i d as ten yesfedv s ixfawen n idvewdvan, yenna s:
-«Wap a tayri inu , maca maghar tetrud a yur inu? Rexxu n ubirrep war dji n imettvawen d uxeyyeq, ura d necc texsegh cem rebda, oemmars ad cem ttugh! Yallap svafi zeg imettvawen! Ad tessneta tudart nnegh nnevnit d tamaynut, zi ssa d tsawent nec d cem d ijjen, war dji d sin, uc ayi d fus nnem, ticcegh am awar inu belli necc rurigh d i cem!».
-«Ura d necc, a yamexsuy inu, djigh i cek, texsegh cek!».
Tessarwi d xaf s yemma s s tirja nni yizvidven rami i d xaf s tragha:
-«Massin .. Massin.. Min ttegged di barra deg wakud a, a mmi inu? Mayemmi tsekwdved deg wjenna?».
Yarra xaf s netta amen ixezzvar deg wjenna:
-«Aqqa yi tbepgegh deg wjenna, sekwdvegh ghar yitran d tiziri, tecna rxezvrat day sen a yemma!»
-«Wap a mmi ynu d tidett, maca adef ghar wexxam minzi d amayuj (dangereux) ad teqqimed cek wapa di tadjest ghar barra deg ûkud a!».
-«Wap a yemma ssnegh d amayuj, ad adfegh rux d abrid!».
-«Tedjuzved a mmi ynu?».
-«Wap a yemma, yengha yi razv, ma temmû macca nigh?».
-«Wap temmû»
Issu tassut nnes ghar mraw n tmeddit, izzver, issvudv x tfawt huma ad texsi. Tesder d xaf s tsadjest zi mkur aghezdis. War yeqqim itwara ha udem n Nunja jar tittvawin nnes s ucewwaf d azirar itirar as xef weorûr am imuzzar i d yaregben xef waddar, ttemraywa am tedbirt sennej i tugga tazeyzawt, d wa d azvri i yexs Massin (ixarrves). Trured d a tayri inu i tcuni, tucared ur inu s ughir xaf i, ssutaregh cem ad ayi d tarred ur inu nigh arzvem ayi ur nnem! Wac yettvu tuca s i Nunja tabrat nni nigh urid amenni? Nigh aqqa c gh ad yiri teghrva t uca tghars it! Maca ar da war dji bu tasgahrt nnes! I mara tessiwedv as t? Min zzay s aqqa c gh ad yiri tegga? Aqqa c tghars it zzat ma tet tghvar? Nigh teghrvi t uca tghars it? Rexdenni ad tafed tghars rayas inu, tghars ura d ur inu! Maca i mara teghri t ma ad xaf i d tarr nigh upu? War ssinegh ap ya Yakuc inu min gh ad ggegh? Awz yi a Yakuc inu! Maca i mara tugi yi, ad ayi tessaregh timessi war yedji min tet gh ad yesxesyen! Upu, ixessva t ad zzay i taca war dji ad yi tessaregh timessi huma ad tessecmedv taycit inu!».
Tugha dt itirar tcamma aked imeddukar nnes umi d xaf sen tekka Yettvu, teggûr ghar taddart nnes. Yedvfar it Massin s tazzra zzat ma ad as tenjem. Umi dt id tezvra thaka belli yexs ad kid s yessiwer, texzvar x uzvermadv, texzvar x ufusi, texzvar awarn as, uca tarr d rxezvrat nnes ghar s, tarzvem aqemmum huma ad as d tini:
-«Azul Massin».
-«Azul Yettvu, xsegh ad cem sseqsigh ma tucid as tabrat nni i Nunja nigh oad?».
-«Wap ucigh as t».
-«Min d as tennid? Min d am tenna?».
-«Waxxa ad ac inigh marra min yemsaren: nnigh as ghar umezwaru “ghar i kid i ict n tebrat i cem”. Tenna yi “wi d ayi t id yesqaden?”. Nnigh as “d Massin”».
-«I zi ssin d usawen min tegga s tebrat inu? U min tenna?»
-«Zi ssin tettvef tabrat nni tdvefs it txemmr it deg whsin n fardva nnes, ghar uneggaru tenna yi: “Xminni gh ad gharegh tabrat rexdenni ad xaf s arregh astan awarni umi gh ad xarsvegh”. D manaya i tegga u d manaya i tenna wapa».
-«Tqadigh cem a Yettvu nnegh s wattvas oemmars ad ttugh tcuni nnem u tessned a Yettvu teggid ayi ict n twuri (travail) temghar, tanemmirt!».
-«Mebra jmir».

(Ad d yetwadvfar)