manis d itekk? manis d itas? Ur ssingh! Zi twara ghar tnnidven, gw ass n ttlata – ass di tilint mghar timgharin di tudrin - iryazen swwqen, itffgh d gw ammas n dcar, amxmi d yffgh zi tmurt. Akid izzvif nns amzwaru tsvurnt tmgharin d thnjirin nndvent i wghyur nns yarbun tracca n iqcoan d dduzan zi kuy tiwilawin, kuy inctan, kuy initn: zi tsynaf ar tiqendar, kk d x imqrajen, ssinyyat, tijrawin, timennasin, tisila n ughayyu, ayusim, anella...

kuy ict mayn ghars gw fus: ict azyen n tpydvurt, ict d amqraj ykks as ubudv, ict d tamqyast n nnuqart tarrez, ict taghirt n tadvuft, ... tasebbabt n uzewwaj ur days bu tnoacin: tamghart ttic as tapeydvurt nns iqqarsen nigh d amqraj umi ikks ubudv, netta iticc as tyuya n tsira n ughayyu nigh d ssiniyyt nigh tummzvt n unella ...

tasebbabt n uzewwaj ur days bu wawal: awal n uzewwaj d wenni n tmgharin ur illi d idj; amya tamghart yxsen ad tsgh amqraj, ad tads aghyur n uzewwaj, ad tssers afus nnes x umqraj, ad tswizzedv s mayn ghars gw fus ghar uzewwaj. Netta ad izver mana wnni: mara yuf it ad yas d atig n umqraj nni, ad t id yfsi zeg igharynen, ad t iwc i tmghart nni; imara yufa mayn d tiwi ur itiwdv atig n umqraj, ad as t yerr nigh ad yssers afus nns x ca n uqcoun nnidven; tamghart ad tsmun idvewdvan nns ghar treqqa n ufus nns (texs ad tini: «awyi t id»); azewwaj ad t id ifsi zg igharynen, ad as t iwc.

Tugha twasit nns ghar dcar nngh d ijn n wmsir imghar gharngh nccin imzzyanen. Ntmun xafs d apymur, tittvawin nngh x iqcounen nni i ur illin mghar ghars: ca d azuggwagh, ca d aziza, ca d awragh, ca d acemlal, ca d aqarqac..., mani ten itaf?; mayemmi mghar ghars illan?; i netta d aryaz nigh d ca n ujenniw? Iryazen ur zemmren ad gharsn ilin anict uya n iqcoan ur itwamsren di tmurt nngh! Nccin gharngh iqubac, ifaggwen, tibqyin, tiqnucin: messrenten t s uyt Umejjaw s traxt; gharngh timdwusa d tsdvwin n tizzdvent, ttegg itnt mamma taoerwant...; maca iqcoan a iqarqacen ur itwaggen s traxt ula s warri ula s tizzdvnt ula a s tadvuft, ur gharngh llin di tmurt nnegh. U mayn zi twamsren ur illi di tmurt nngh: adu tmurt ula snnej i tmurt. Inni ten imssren ur tilin mghar d ca n yinni n wadu tmurt! Azewwaj s yiman nns ur itili mghar d ijen zzaysen di tfraz n waryaz! Imri d aryaz amacnaw iryazn ili issawal awal nnegh! U ur illi ayenni wapa: tasebbabt nns ur tlli am tnni n iwdan: ur iznuzi s tnoacin! Yznuza amqraj d amaynu s tpeydvar qqarsvnt, ccurnt s yinjan nigh s iqcoan yarzen id as ticcent tmgharin! Baba yznuza iqubban, maca netta iznuza ten s tnoacin; u yznuza tn di ssuq, urlli x ibriden!

Azewway ur itili mghar d pajuj u majuj nni xf issawal rfqi n tmzida! Wenni id gha ikken ghar wzyen n wass, s tghyult nns yarbun imaccaten ur necci oemmars; wnni gha yaf yarra xafs tawwart, yettvs aqa ynjem; wnni t>yzvrin, uca idvfer it> atagh ad as iwc cwayt zg imaccaten nni, aqa ad yqqim idvffer it> ar d iwdva di rbhar!

Maca aghyul n uzewwaj ur yarbu bu imaccaten: yarbu iqcoan. U timgharin i xafs itmunen ur tent itett ca rbhar!

Azewwaj balak ur illi ca d pajuj u majuj, maca ur illi ca d asebbab am yinnidven!

Ict n twara, dg icten zi twasitin nns, azewwaj yarnu d ghar dduzan d iqcoan nni aked nssenta ntnam, ca n yinaten nnidven ommars ur ten zvrint tmgharin: ggin amacnaw igharynen maca d imzvyanen attvas, twaggen s ukettan. Timgharin ur ufint mani gha weppant igharynen a imzvyanen; ur ufint mani ten gha yarrent!

Nec tghiregh d igharynen n turart: amacnaw inni ntegg s wafar n wcfir arumi. Xatci Mamma n Mmuh inna s ixf nns ad tswedv mayn kid tmsasan igharynen a imzvyanen id yarnu uzewwaj. Tfsi d ict n tyuya, tili tarezzu may kid d gha yassen di arrimet nns: tennedv itn i yiri, tufa ur d usin; tfsy itn d, tqqen iten i wzllif, tufa ur dji amenni; tennedv itn i woddis am tzvrmet, tufa upu!

Zgw ghzdvis nnidven n wghyur n uzewwaj, Hemmut tugha tessedvfar as tittvawin, tsfirnen.

“A urdji yamenni a xatci Mamma!: inni urdji din itwaggen”, tenna s. “segh ict n tyuya uca ad am mregh di taddart mayn kid d tasen, aqa nec aqqayen ghari; itawyi ten d Mimoun ssipa”.

Mimoun, aryaz n Yamna, izvwa ghar ujemmadv in. amya itsrigh timgharin ttinint. Zg wnbdu ghar unbdu iddakkwar d ghar tmurt; itghima ij n uyur uca yddakkwar. Yamna xmi tessawal x mayn as d ittawi waryaz nnes ttini: “yiwit id mimoun ssipa”.

Twca s xatci Monna taghirt nni n tadvuft i ttugha ghars g wfus i wzewwaj; teysi tyuya nni n “igharynen n jnun” (d wa d ism i d asen tufa xatci Monna).

Timgharin udfnt ghar tudrin; azewwaj yttvef abrid. Nec amnni i qqimegh ur ssinegh mana igharynen- nni-ur-illin-d-igharynen!