Tiwirga g wakud abrran
Yarra t mmis n latvlasv: Cajya Massya (Kazablanka)

kud luligh
tnna yi imma
tudert
mnnawt n wassifn ad tga
ig ur twwit s ighalen
tigira tella
kud luligh
tnna yi  imma
ig tffaght jgga
ikka wadvu maygan tenna
tammamt tga  allilli
am wayyur am usggas
tasuta s tayyadv
ad trugh ad ixssi g ul
imtti xf wayyadv
nnigh as a imma
ur iqqimi wawwal
aska ad izargh
tnna yi imma
an izikr ioram issu
nnigh as a imma
tilili ifuk ad tkcem ighreman
ad nadis n wakal
affa  aytigan
meqqar iga udem
addjig d waman
meqqar yussi lbarud
ssu tizrbay
meqqar igzem azghur
 izzv u tiwirga
matta ssi tamzawit
assa neghd askka
tnna yi imma
gigh tawjjva
yarus ghifi utbir
zzvalin ufgan ula igdvadv
nigh as a imma
an amazigh ur sar igi tili
an yabbuh nnun a yamud n kusilan
 iniwat upu tgem awal d yan
 ad ikcem udrar d uzaghar
an assif niodawn
assif ur ittawin
an aqmmu iccarn
aqmmu ur ittariden