«Nnigh ac a baba: mana whbudv a g wbrid? Maymmi itwaghza kuy anbdu?»

Ttugha nyigh awarni baba x tsardunt nngh tumrirt, Hddu n Tmgzut x wghyur awarn angh. Iswdv ghars baba s ughzdis, sfirnen. Yqqim usqsi inu yuyr.

Ahbudv a itwaghzan asgwas awarni wnnidvn g wbrid itawyn ghar Yart, di tysart n Uyddim, jar Tizi n Ûn d Tghzut, war zmmregh ad xafs kkgh war tsqsigh ixf inu: maymmi mrmi ma ggur ad iccar s ucar ad t’ ighza ca n wmsbrid zg imsbridn i taryn-ttvarn jar Ayt Oddi d Yart: di tyarza, hama ad kerzn, gw nbdu hama ad ysin anbdu (ad mjren, ad ssarwtn, ad ysin rum).

Umi t’ zrigh twara tamzwarut, nnigh as d ca n unitci i war yufin mayn ghad yeg i t’ yghzan (war nnin: «anitci war yufi mayn ghad yeg, ighres tisira nns?!). Imkraz, nitni war tiraren: mxmi d ttvaren zg wdrar tmarran ad awdven iyyran nsn; mxmi d taryn zi Yart tirin uhrn, arzzun ghas mermi ghad awdvn tudrin nsn, ad zneyfan.

Maca isggusa tmsdvfaren, ahbudv nni itwaghza anbdu awarni wnnidven…U war ylli ca d ca n unitci i t iqqazen: Ayddim tamurt nns d targist war tssghmiy, initcan n wdrar war illi mayn days ghad arwsn.

Ahbudv a d imkraz i t’ iqqazn! Maca maymmi? Maymmi iryazn a i war itiwdvn ad cmzn azllif nsn, anbdu awarni anbdu (g wnbdu i ytwaghza: acar nns d azeyza g wnbdu), toawadn taghuzi i whbudv a ammas n wbrid?!

S dat ad ssqsigh baba, ttugha d wa d asqsi i yi itmraywan g wzllif mermi ma iwdvgh taysart n Uyddim uca tafgh t d wnni d netta, anbdu awarni anbdu, amxmi g wass nni i ytwaghza.

Asqsi ya immernu ghars ij n usqsi nnidvn yujer t, ij n usqsi yudjegh x wnni amzwaru: maymmi umi sseqsigh baba yswedv ghar Hddu n Tmgzut, sfirnen, war nnin ca?! War xafi d yarri baba ura d Hddu?!

Nitni ssnen u war xsn ad ssnegh! Mayn xafi snuffuren? D ca n tuffra i din jarasn war xsn ad tetwassen?

Hama ad ksgh tizakkin, ict n twara yurigh cwayt mamec ghad agwjgh x baba bac war ay itsri, umi ggur ad nawedv ahbudv nni, ucmegh aghyur xf ttugha nyigh hama ad adsegh Mmuh Badi i ttugha s dati s ca n isuraf: «nnigh ac a xari Mmuh: mana whbudv a g wbrid? Maymmi tqqazen kuy asgwas, wur t jjin ad iccar s ucar, ad yqqen?

Yswdv Hmmu ghar Badi i ttugha t’ idvfarn x wghyur nns aqudvadv, sfirnen.

Sfirnen asfirnen n yinni yssnen u wûr xsn ad kidsn ssnen innidven.

Asfirnen nsn isskta yi d asfirnen nni igga baba d Hmmu n Tmgzut…

Yqqim usqsi inu yuyr.

Ttugha t’ d ij, ymsarraw, yjj d isqsan nnidvn: maymmi inni imqranen, xmi t’n tsqsigh x WHBUDV sfirninen jarasn u war d xafi tarran?! Mayn ssnen nitni u war xsn ad tssnegh nc? Asqsi inu amzwaru x WHBUDV n tysart n Uyddim idwer g wzllif inu d ij n usestn d amitafiziq. U dg inbdutn nni di ttugha tfuct tessfsay alli, tamitafiziqit ttughat ur tiggwij…

Ict n twara, ghar ij n ughlluy n tfuct, ttugha ntari d zi Yart, awarni ij n wass d azeyrar n tmeyra, wur ttsrid ghas asxuncf n ikidarn. Ttugha wur qqimegh tsqsigh x WHBUDV nni awarni wmi ufigh asqsi inu itighima yuyer, u war ay d itawi ghas asfirnen nni ilullsn... Ttugha aghyur inu awarni wnni n Bucntuf idffaren wnni n Himmi, nttvef tsawnt n uYddim. Ttugha yi tnudumgh x wghyur inu, umi srigh Himmi innas i Bucntuf: «- ugin ad ttun! ghzan ahbudv a twara nnidvn !».

Umi srigh tawalt «ahbudv» isur unudem nni idvwa. Wcigh amzzugh i wmsawar jar Bucntuf d Himmi:

- s tidet ufintn da?

- war ssingh!