Askasi: Marra texsen ad weddvaren tmazight!

Mayssa Ra(Bentveyyeb, Nnadvûrcida

Ma ntaca aked ixf nnegh ira nesmurdvusv u nneq tutrayt nnegh n tmazight x yirsawen n temzvi nnegh mkur ass itmarni d ghar wussan??

Temzv ya i d imeghgharen am rquh n nwac netraja ghar sen ad ssiwdven tasafut (flambeau) n inuba nnegh itweddaren ijjen awarni wennedvni, netraja ad awdven ghar min war iwidvent isuta (générations) nnedvni yekkin deg wbrid a odun.

Mani yedja wenni war yeghrin deg wgherbaz amenzu amezwaru di tudart nnes, netta d agherbaz n tyemmat, tayemmat a i yesremden arrawen mammec gh ad ssefrûryen iseklan, mammec ten gh ad smunen x wancucen d yires huma ad dewren d awaren.

Isegwussa ya imeggura ntesra x tmazight ad tqejdeh nigh ad temûrd ghar ugherbaz (école) huma ad t gharen nigh ad zzay s gharen. Wa d ijj n tizi nnedvni, maca da necc axmi sqadigh amehdvar ad ighar deg wgherbaz, iseggusa nnes imezwura trajigh ad irmed ad ighar ad irmed ad yari ad issen tutrayin n midden huma ad tent yarni di twengit nnes aked tutrayt n yemma s tamezwarut i zi yessen marra min yedjan di tudart nnes tamezvyant.

Oemmars war dt sqidegh mahend ad inegh, ad ismûrdvesv min yermed di sva(7) n iseggusa s tutrayin nnedvni mammec mma ggint, axmi d irur ass nni i di yudef agherbaz, itteffu d umehdvar a yetseqsa ixf nnes attasv n iseqsiten axmi i ft yeccat umsermed mara itesra yas issiwer tmazight waxxa d ijj n wawar wapa. Upu, wa d azref s ughir x imehdvaren, agherbaz n tghuri tmazight war twaydar oemmars ar ami dewren imehdvaren ssawaren aked tasalmadt (institutrice) nsen s ifassen am ignawen. Tanfust a d tidett war tedji ca zi tasedmunt (imagination). Tasalmadt  tesghara imehdvaren deg wseggûs amezwaru nsen u nettat d tamazight yedji s n imazighen mara tesra i wawar n tmazight issiwer zzay s umehdvar ad dt tewwet aomud d ameqran mammec oemmars ad yini awar nni. Umi sseqsigh tasalmadt nni x imehdvaren i tarra marra d ignawen x tmazight amen nitni d im

azighen tenna yi: d wa d asyam n imehdvaren  mahend ad nghen marra min remden d tmazight s tutrayin nnedvni, maghar axmi d itass ghar negh umessuyûr (directeur) n ugherbaz itaf ghar negh tmazight oad x yires n imehdvaren itmengha akid negh amenni ura d ameggawas (inspecteur)

Ammu tteffu d tyemmat tessermed afagem i mmi s war yedji d tiddet n wawar, minzi awar n tyemmat nnes iccat xaf s usermad, marra manaya awarni wami idaren tmazight ad tadef ghar ugherbaz, ma meollik war t idaren iri mammec d as gh ad ghzen andver, itghima yires n tmazight marra teswizzvidv ghar  tmettit nnes am usermad am umessuyûr am umeggawas!