Deg ij n usggwas n zic, attvas zeg ami, tugha din ict n tghudant tnionio lebda teghmi,tugh ttaca akd unzbarv am bnadem, tcarriw, tsfarnin,tesghuyyu am usimi.

Tugha tnewjiwn d ghres imzdagh n ddcerv, tetten al gha djiwnen, itteojib asen kids ughimi.

Maca tugha malla ipwl it cra n yidjen,tessfay d xafs d timssi am ur das iggi bu yimi. Odun wussan ghelyen deg ussan, nnumen kids iwdan, ommars ur inni hedd maymmi. Alami d ij n usggwas irrvez d urumi; inna s ufigh peddu i yturvuten inu ad zedghen i ommars.Icuq tammurt immuzzer igga ad as intu tifras; amzvivwen, xiniralat, istvankiten, lbumbat, tvyyarat; neqqen tazun taylen, ur djin ahnjir ula d awssar, ma timgharin qettvwn asent tiseghnas; nnan as: ama d tinni d tala n wesliwlew zi d ttaymen imjapden taryast. Cway ibbercen ujnna, iwdva d ij n usinu oemmars iwdan ur d as oqilen; imarrez, isdvarghil mmerra mayn itmullughen.Yugha ij n lehmu isnenna izvra, isbedda yulawen, axmi tekker tmssi di tfuct, theddeq s yilsawen.Tbepdven ywdan, qqimen joarn, dewlen acnaw aynawen; ur ssinen, ur fpimen mayn immsaren.

Xafs uca tceoceo tghudant, teqqim tesliwliw ; ttennedv tesliwliw tlagha: «a…a …a yimjapden a…a yulawen n wayraden, netc d ymmat wem….ad knniw ssetcegh ad knniw sseswegh, ad xaf wem hdvigh ad knniw dregh, nnuffremd d ayi, ticti ur kenniw inghin ad awem terni di buhbel...». Tesliwliw tlagha….mkul tahbbuct n tazart tedha d taxfift, mkul tafarect tedwel d taqrtavsvt. Oelfen imjapden, tedri tn tghudant, immerni disen djapd, temmerni disen tsa.

Uca qqimen tcaten deg urumi. Imjapden tcaten, taghudant, tsvudv ij n lgha n tharyadvt itteqqes deg imjjan, thettva xfsen; alami tedwel tammurt tefser s rrimat n urumi, idammen d ighzver x idurar, mayn iqqimen s urumi ileqf it ubellveg, iwddr as mayn gha yegg, izzlz it budpwar; xiniral ibbuxsey, lhakem d uturjman djiwnen matca deg cal.

Nnan as mayn gha negg ur ntegg, imazighen u jepden, taghudant nni tegga ca n ddegg. Imun umeqqran nsen akd loesker nnes d leboadv n icekkamen, wtin array di rray, alami uhhlen s ixerrisven uca inna sen: ad tqessem taghudant nni x izvwran ad as herrfem afriwen.

Yarwen mmerra mayn gher sen d lesnah d ccwaqer d izidanen, nndven i tghudant, ssvunnedvn as d lesluk n wajjuyen, oemmden ad tt nghen. Sapan tqessan tet, tqessan tt nettat tghemmey d, tqessan tt netta tghemmey d… alami d as wis kradv, ufin tudsiten d tmnawt, uhhlen, tleqf iten tarjaja, ssihman tamment n ukccudv, ssuzzaren tt xafs lalla inu, uca tessusem, issusem akids mmarra mayn iddren, ibedd isqver. Tudert tessghed tennedvqer, inni tt iwtin s tamment n ukccudv dduqqzen asen yexsan deg aysum, ibedd asen wul. Maca qa yasusem tegga lalla inu, tughat d asqar ig itizzaren i tharyadvt; tessfiy d tghudant,t cuq aoddis n tmurt, tebdva xef sin n ighezran: idjen itazzel s ughi, idjen ittvucrur s idammen, uca mani mma mselqan, tghemmey d din ict n tghudant, mkul taghudant ttvarew anct n yitran n tghudanin.