Tamazirt inu

Yaru t: Mestafa Ziyyan

I tmazirt inu, LATLAS bu ticcaw n loezz zeg izvuran n wul.

Mas da nttiri tamazirt inx mas?

Mas da t swalaf ur id am ti iy ighran?

A LATLAS iyyan llun idammen is rwan

Rwan zeg ighsan n lejdud inx immenghan.

 

Kkan yits sya yan imazighen iharran,

Arun s ummezruy insen addur mas kkan?

Sall win isummal  kkad ayt lyaman,

Sall wi ityubbin,  sall wi issuddan

Sall Misver, sall aqbbad ayt ifaroan,

Ay asif n iyel manit amazigh s isamman ?

 

Sarfen llaghriq a Hirudut yac llan?

Izvra ten lfiniq a macta d ayt rruman

Ikka ten unadlus id imazighen as fnan

Ddun d loarab ar ittidjimen “llaxwan”

Ad ix winsen ad ix am iddis ax sghan

Hacawn a Lahrar at im i dduyt isamghan.

 

Max tannajlam ay imazighen iw amdan?

Milan tigumma ya xef tuggam? milan

Lebhur mi da temdaddam d isalman

Milan yar rray ax isuggur? milan

Amuttel ax ituggan nniyyax? milan

Ifassen ax iyyan iwarya d ax semraran.

 

Ghrix s aytma ca n imazighen iharran

Araw win lamrawih nna d idvfar ccan

Can win Rrif a bu waddur mi oaddan

Can win iziyyan nna dik san issan

LATLAS ira ad isig ixf Iyifsan

Bar at oaydm a ymazighen am zman