Imazighen n Lmughrib

Tura t’: Mayssa Racida (Bentveyyeb, nnadvûr)

Mahend ad niri itxessva negh ad nanri, u mahend ad nanri itxessva negh ad  nari. Wen yesqaren oemmars ad yessen ara ad yawedv mani yexs. Suya necc twarigh mara war nuri neccin x yexf nnegh ma netraja  ad d asen zi mani huma ad x anegh arin nigh netraja ad yewdva wûregh zeg wjenna amen neccin nettvesv ad t’ nerqa. Mani tedja twuri n usegrew (travail, rassemblement) tugha zi zic ghar inuba nnegh zzay s tarezzvan idurar, zzay s iwyen d tirelli i tmûrt i nufa neccin i nezdegh neccin mebra tazzra n idammen, mebra imenghan. Inuba nni i d yejjin tamunt d tawiza di marra iyran n tudart. Mara regnus ssvurufen ghar zzat di tyumi d talghut (information), wanita i yesseqdacen timizar attvasv zi tmesrayin nnedvni qao, arni ghar s tawesna d usermed i netwara tmarni di tmazirt nnegh asseggûs awarni wsseggûs. D taguri d d taqubbanect yesseggûren tamazirt nnegh ghar deffar nigh s tghuri nnes yesseogizen tejja iwed yeggûr itennedv di tqularect d nettat d icten. Marra timsal a tarrant zi tmazirt ghar deffar u s manaya ad tfaq ijj n wass ad taf ixf nnes yescemdv it wakud di nedja ruxa.

Zeg ughezdis nnedvni, timesrayin d imxumbar i d idaregh nitni s yixf nsen ddakkûren d ijj n uoani i wmezdugh n tmazirt a mahend ad yeffegh ad ioarq mani mma d minzi mma. Yarezzu di regnus ad yarber arbar (travail) nni war yufi di tmurt nnes. Yarezzu ad yesghar tarwa n regnus tighri nni yemmuten di tmurt nnes. Yarezzu aodar d tyumi i regnus s marra min ghar s d tizemmar maghar tamazirt nnes war d as tewci tnufsitc i zi d mani ghad yesdvuqqez marra tizemmar nnes u ad yawedv ad issviwedv tirja nnes d tinni n tmazirt, maghar tmazirt tsekka x umezdugh zzay s i ghad tgeooed zzay s i ghad tewdva. Ass a nufu d mkur ijjen ifarrey azzay n taddart nnes wapa, wennedvni ad t’ yecc zman s marra min yecti wawar n zman d raggûj ad t’ yesseghri. Maca wi yennan izref a, wi t id yessarsen? Ma d tamesrent? Ma d tadimuqratit? Ma d tiseqqar n ufegan? Nigh d izref n tmazirt wapa?

Attvasv d iseeqsan mkur ijjen zeg mezdagh yarbuten x weorur nnes yarezzu yasen x twarriwt, maca ma ad t yaff nigh tghima rebda u am rebda wapa?

Afegan amazighi axmi “amazighi” asemqar a yeks as tameggit n umughrabi, amazighi yennuri di tyumi. Awar a war xaf s itesri mghar zi tafernt (élection) ghar tafernt d awar nigh d tanebdat mahend mkur ijjen ad yawedv min yexs zeg ruqaq n uzaraf (jugement) ma x tmurt n tirawt oemmars ad yiri ca am rebda wapa. Amec amazighi wcin as tasghart di talgha n lmughrib am yijen weydud yudef d zi ca n rgens wapa, ca n timmar n “wazul” d reghnuj am axmi aydud a yecca yeswa yghra yessen war ghar s bu yemxumbar. Arni ghar s tilizvri (télévision) y yedjan d tisit n weydud tmazight mmewcen as ineghmisen yudrusen deg wmadval qao azyen ineghmisen nni x tmura n barra d yemxumbar nsent axmi iwdan nni imazighen i yedjan ires nsen walu ghar sen ineghmisen i ghad yetwannan. Mara tittvant itwaggen i ymezdagh n tmazirt a n Lmughrib amec d yusa x yirs n Ttufali Ttvpar teqqar lmughrib (??) i tegg 90% n imazighen, imazighen a ghar xezzvaren am ijj n weydud yudef d ghar tmazirt s tseqqar d tmewca ya d as yemmewcen ad day sent yeddar. Yuss d x yirs n yemgharen i tugha yeddaren ak uhewwas asebbanyu min ghad inigh nnan x as: belli tudart ak usebbanyu s marra min tugha day s twafit n izvbazv (possibilité) d tazyudvi n tzeddight s marra min yeyru wawar a n timsal yif tazeddight a umi neyyura, nteddar di walu, ntayem d zi walu, neswazzvadv ghar walu...

Ghar uneggar xsegh ad inigh awar i zi ssentigh u aqa oemmars ad tafed ca mebra ma ad xaf s tarzud nigh ad tawdvev mani mebra ma ad tuyûred..

(20-9-2002)