imazighen teddaren zey lebda dey, tsekla nigh mala nexs ad nini s yij n wawal nnidven: tasekla am waman tudert ur tzemmar ad tili bla zzay sen.

attvas n tenfas nnant tennatin, attvas n yenzvan nnan imezwura, abaru n yezlan ghennjent temgharin dey tmeghriwin, iwen t id izlan xef win d tin, lalla buya ifetlen s yelsawen tteffegh d zey tencucin, ur ntettu ca tiqessisin d tawyen imedyazen xef waccawen, dey wussan n unebdu d tfeswin. maca, manaya itrah ad iweddvar dey zzman a aweddvar.

dey iseggusa imeggura wami tasekla ya ttrah ad tetwattu, tban d ict n tsekla d tamaynut ttayem zey tutlayt maca tales as udem n tira, s ifassen n imyura d timyura i ixsen ad d arren buhbel i tutlayt tamazight. saoid belgherbi d ij zzay sen yurew anegh d ungal: nunja: tanecruft n izerfan.

amyaru nnegh ntaf it ifarren awal, itezzvu t, itessu t, bac ad d ighmi d taseklut n tsekla tamazight, ad day s neqqas tazvyudvi n tutlayt nnegh. ungal a day s tifras n tmurt, tamghart, tamust (identité) …atg

dey wedlis a, awal itellem uma s, tawniest (phrase) ttarem ultma s, isekkilen twassun s waman n wenzvar n tira d iddvuqzven d ighbula zey idvudvan n umyaru nnegh, bac ad teslulley tasekla tamazight dey iyar n tsekla tamadvlant.

nunja tteddar dey ij n dcar mani smurdvsen wussan iksin ticemsin n ifeqqusen, ca n takayt izdigen n imezdagh n dcar a, mani tibiben imettvawen n usendef d iseghwan n uzillez xef wulawen i izmen s kulira, inghin attvas n tiwaj dey uraq a d yusin dey merruk yullghen.

ungal a itekkes afray xef wattvas n ighezdisen n tudert n imazighen: tighuni jar tutlayt tunsvibt d tutlayt tamazight, tighuni jar arbatv d arrif, tayri…atg

dey ughezdis nnidven, ntaf ca n iseqsiten yuylen gher tarezzut xef tidett, iseqsiten a iqqnen gher tudert n irifiyen d trifiyin: iseqsiten n tesghart nnegh itwacaren, iseqsiten n tlelli nnegh itwacerfen, iseqsiten n tmust nnegh itwantyen, iseqsiten n umezruy nnegh itwandvlen.

ungal a d ict n tarwa n tsekla tamazight ixsen ula d nettat ad taf araq nnes dey tudert n yidva. ugar, tira ya ur telli d tira wapa, maca tghima d ij n yigi n tghensa (acte de militantisme) bac tamazight ad teqqim teddar ur tmetti ca.

(abdelmottaleb zizaoui, e-mail: amazigh39@yahoo.fr)