Iri cem inu

Waccix Mhemmed (Arrbatv)

  Necc nnem…

Iri cem inu.

Necc d amalu nnem

Iri cem d amalu inu.

***

Necc nnem

Iri cem inu.

Cem mara war tirid inu,

Necc war zemmaregh ad irigh…

Ura d ixf inu.

***

Necc nnem,

Iri cem inu.

Iri d tamzdught n wur inu

Huma ad ssnegh axxam inu…

Ad ssnegh ura d tenni

Yedjan inu.

***

Necc nnem

Iri cem inu,

Iri d razagh n imettvawen

Di tittvawin inu

Huma ad yezgenfa wur inu

Ad tedwer tudart

Ghar tudart inu,

Ad yedwer webrid ghar isvuraf inu.

***

Necc nnem

Iri cem inu…

Iri d tafsut

Di tjarest n wur inu

War yessinen anebdu.

Ad tax ad izvar tfuct

Ad yesdvargher asinu.

***

Necc nnem

Iri cem inu,

Iri cem inu…

Ad am d uggardegh

S yezran n "Kits"*,

Ad am d uggardegh

S yezran n "Svafu"**,

Ad am d uggardegh

S teyyita n wur

D min tûrjid ad ghar m d yeffu.

*"Kits".Keats: amdyaz d agranzi.

**"Svafu": Tamazedyazt d agrikect (Grecque)