Tanfust taqudvat:

Aheyyana werhih!!

Yura t: Said Belgharbi

Irur d ghari ij n uxarriq itareqriq s tidet, syardvegh as rizar d acemrar, kehhregh as i tammiwin, ghensegh as tiseghnas, jjigh t ad yuyar x idvaren nnes.

Jar ayi d d uxarriq inu ij n usvurif n tidet.

Tenni yisin tidet inu d axeyyeq jar wur nnes, tarzvem axxam n (Lmisanjir) nnes tesijj d xafi s ijj n wudem nneghnit, tenna yi d:

-Azul, nec d tenni umi txebced tisarfin deg yebriden nnec huma a day sent ghufigh!!!!

- Azul, nec d wenni umi teghzid anuten deg wur nnem tarezud ad day sen wdvigh.

Tarrect n unuri tessen ad temzawar iked tira inu, tessen ad temmughzar iked tidet inu, tessen ad tbedder deg waobanen nnes am tata n reorasvi, tetru am tinni yetrun, tesfarnin ura d nettat am twetmin.

Nnughegh deg uharwar nnes nec war ucigh, zvwigh ghar ihesyan n wawar nnes am nspigh, tzewyayi d azway jar imunas nnes, tejja yi isigh ikides ura d imezran nnes, tufa yi fruryegh am zembu deg iqudah n isutar nnes….

* * * * * *

Day imezri n rxezrat deg wudem n uxarriq inu, i yessigzen s tiggas n tcuni, axarriq inu nnan ayi deg uneghmis nsen aqqa yemghar, yiwedv ghar (lberlaman), semgharen zzay s, d inni i yufa tudart nnes jar ayetmas d su yetmas, din i yufa rkursi nnes mani ghar yemnunni ghar tidet n yenni d anegh yufin ntarra taynit i tidet n icettvihen nsen.

* * * * * *

Radj n (Lmisanjir) nni ghars deg ict n tmeddit zi drus n tmedditin nnegh:

-Ward ayi d tidet nnem mghar ict n twarat.

-Upu! Lata ya n yidva war yedji n tidet, marra i temsawar s waobanen, zmann n tighit war yeqqim, zmann n tcuni yefsi jar turjitin nnegh….

Teqqsent timwaritin nnes am unuri, maca izidvent, d wa d akud nni di wca yi d aorur nnec ad day i tarbud maca xelsvayi d s tidi nnec, zmann issughled ghar urawen nnegh tarzugi, tissraw tidukla di tudart nnegh, yeqdva uswizi deg wawar n umawal nnegh, marra tarezzu ad temnegh x ca war yedji, marra texs ad tessu x yebriden nnegh ijartar n jeghdid id anegh ghar yenghen d imessasen.

* * * * * *

Di (lberlaman) axarriq inu yufa d inni ixf nnes, yufa d inni tirelli nnes, indvar rizar i das syardegh, war yeqqim x weoban nnes amezwaru, issemghar tiddi nnes yuyar isvuraf ghar zzat, maca yettu yayi, yettu aseymi i das ggigh jar isennanen n tidet.

Di (Lmisanjir) tenni temmexs ayi, tedjef ayi s umari, minzi tufa war wdvigh deghya deg wanuten nnes, tufa ur inu d amessuci, yuzegh war yesghemmiy bu rehtic, maca remdegh zzay s ad uyaregh d ayujir n tidet deg ixxamen n icetvtvihen nnes.