Tazvrut n “Tura” d inamuren n “Iks - Liban”

Yua t: Xalid Bughanem (Ayt Yettvef, Lhusima)

 

Layla, tura, nigh maodnus.. Init’ as mamec texsem. Init' as mayn texsem. Nettat' deg wss a deg ufus n Usebbanyu tesghuyuy*, tetru am trunt suyt mas deg ul n Arrif.. Am tetru Nkur, am tetru Bads, Sebta d Tumlilt (melilia). Maca mayn ibettvan "Layla" aked suyt mas!! Nkur, Bads, Sebta... tadfen deg mayn thewwes Sebbanya zdat i 1912. "Layla" tenjem zeg whewwes attvas zeg ûmi, waxxa tugha din axarrves ad tmun ag Sebta mighar tudes s 8 km amuk i d yusa deg ûwal n maysa Maria Rosa de Madariaga ghar "al-ahdath al-maghribiya" (Capada isbbaniya hawla maghribiyati jazirat tura, utvun 1275), tenna dag s belli oemmars ur tedvfir  “layla" i ci n tnebbadvt n Madrid, zda 'i 1912, wami i d  yudef usebbanyu, yettvef dag s tittvawin d Weoric (larache) d... Tedwer d Tittvawin, tedwer d Nnadvur… s tzemmar n tarwa nnegh, u tedwer dd "Layla" waxxa d netta ttadvef s adu  tmurt nnegh ztat i 1912.

Maca aseqsi inu: mani tugha llan inamuren n “Iks-Li-ban” wami tugha ssawlen u temsawalen xef temrarit n tamurt nnegh i d anegh wwin tikarmin i 1912!!! Is ssidfen deg tefray ig wwin akid sen ar “Iks-Li-ban” tazvrut n  “Layla" nigh tughaten isul war t ssinen, isul war xas slin!!i Mara netnin ssidfen t deg tefray nsen.. Ass ad, amezruy itseqsa ten xas.. agdud ass ad itraja zzag sen ad anegh sseknen marra tifray ig yennuffaren.. I mara ameghnas d unamur axatar "Oebbas mseodi" x tusmin nnes x tmurt nnegh d marra timura n zermedv n tefriqt (zzagsen tumlilt, sebta, nkur, bads...) agdud nnegh ass ad ad  yessen marra tidet, ixes ad yessen mayn yecqan inen yemmi ttinnan inamuren, is d tidet tecqa sen tamurt nnegh d tirelli nnes, nigh yecqa sen ad tvfen tisarutin n tnebbadvt. Maca udvuf n “Layla”  itarra d amezruy.. U amezruy itarra d ixef nnes.

(Findeq, ass n 19/7/2002)

*Amegrad a tugha yura t’ mass X.Bughanem zzat ma ad teffegh Sebbanya zi “Layla”