Ungal:

 Anebdu

7- Massin yessarwat

Itari d': Lmeddan Oumar Numid (Tvanja)

 

-«Mani neggûr?», yesseqsa Yur Massin .

-«Ghar ixef n Yghzar!», zi xaf s yarra Massin.

-«Ghar ixef n Yghzar! Min din gh ad negg?», I d as nnan Azvri d Uyur.

-«Ad din nessara wapa!», i sen yenna.

            Yesseqsa Azvri Massin:

-«Ini yanegh, a Massin, ma Yettvu tessiwedv as tabrat i Nunja nigh?»

            Yenna sen Massin:

-«Wayyaw ayyaw! Yiwdv ikenniw d ura d kenniw uneghnmis! Wi d awem d’ (Voir la nouvelle valeur phonétique de «t’» dans   “Comment lire Tawiza?” à la 2ème page) yennan?»

Yenna s d Uyur:

-«Iwdan marra snen! Aneghmis a aqqa c gh ad yri  yiwedv Mritc nigh aghirin! Ini yanegh s tidett ma tessiwedv as t nigh?»

Idvsa, dvsan nitni marra, yenna sen:

-«Wap tessiwedv as t!»

Isseqsa t’ id Wazvri:

-«Tarr d xaf k nigh oad?»

            Yarra xaf s:

-«Oad!»

            Ibedd Wayur, issiwer yenna sen:

-«Xzvarem ghar dipa! Ayeqqa wem Oessu d Sifaw ssarwaten imendi!»

            Yenna sen Massin:

-«A wap, d nitni, tawzen ayawya d arebbi aked Muha baba s n Sifaw!»

Xef yij n wedmar  i d yusin ajemmadvin i taddart n Nunja, din i yettwaghza unedrar xef tma n yij usedjyiw .Tugha kid sen din Muha s imant nnes, d Hidusa i ten itawzen. Mkur ijjen min iteg, ij yettvef zwayer  deg walmas n unedrar, ijjen itazzer awarna sen, ijjen izzuzzar imendi s yict n tazzart, ijjen inettvar d tifedjayin ghar ugensu n unedrar, Muha isghuyyu xef yghyar yeqqar asen “rra....rra rra..”

Rami ten iwdven, nnan asen:

-«Azul xaf wem a yemsarwaten nnegh! Arebbi ad kenniw yawez»

            Arrin d xaf sen nitni:

-«Arebbi yamin!»

            Yenna s d Muha i Massin:

-«Tzemmared a Massin inu ad anegh tawzed?»»

            Yarra xaf s:

-«Wap, zemmaregh, maca war ssinegh ad ssarewtegh! Oemmares ma ssarewtegh a xari Muha!»

            Yedvsa, uca yenna s d:

-«I min tessned a yaghelliras inu imara war tessined ad tessarewted? Qa d manaya i d anegh d yejja babat negh ameqran»

            Yenna s Massin:

-«Neccin a xari Muha nessen ad nari-ad nghar, ad necc-ad nsu, war nessin ad nessarwet ura ad nemjar!»

            Yenna s d:

-«Yenper (facile) usarwet deghya ad t’ tremdem!»

-«Waxxa ad nexzvar! Yallep sremd anegh!»

-«Waxxa ad tqada yawem!»

            Uryen sennej i wmettvar n imendi, ssentan tazzren awarni yeghyar, sghuyyun xaf sen huma ad arnin di tazzra. Ishundart ij n weghyur, izzveowedv wennedvnit, bedden ssuhruten marra yidsen, uca swin aman isemmadven.

            Umi bedden ad uyûren ghar ughudjuy n tfuct, yuca sen Massin awar huma ad yedwer tiwecca zic mahend ad ten yawez.

                        Yekkar d zic tiwecca nnes yallep oad tessijj d tfuct xef idurar n Iyyart, yeddu ghar unedrar, yufa Muha d yinni t’ itawzen  ayenni i yiwdven ssarwaten, yeswedv ghar ujemmadvin ghar taddart  n Nunja, (ixarres) :“war ssinegh aqqa c gh ad yri  tekkar zeg idves ura aqqq t oad ttûrja! Maca wi t ttûrja? Balak ttûrja yi nec! Wi yessnen?”. Iddvar d Oessu xef umettvar, yekkes d rqabsa n taba, yuca s ij n ugarru i Massin, yegga ij nnedvnit jar wancucen, yessargh it’, uca yenna s i Massin i tugha ysekwdven ghar ujemmadvin:

-«Aqqa c gh ad yri oad  war d tenkar! Tihenjiren n yidv a tjanent attvas war dji am tinni n zic tenkarent rebda zic!»

yessaregh Massin garru nnes, yaredo it’, yarr d aggu (fumée), uca yenna s i Oessu:

-«Wap aqqa t oad tejna! Maca nec kkaregh d zic am uoeloul huma ad cregh ssarwategh u nec txarrisegh day s  u sekwdvegh day s!»

            Isala garru nni, irebzv it’ adu wdvar nnes, yudef ad issarwet, ixarresv di Nunja tuss d ghar s huma ad t’ tawez; ggin fus deg wfus tazzren awarni i zwayer, sghuyyun tedvsan, tayri tesmun iten.Tfuct targha tghettver d ijdvadv n ujenna d yinni n tmurt, arjujen tghennajen, issvudv d arbu issecmadv ighenzuren, yedded Massin, yessu s tidi, yuzegh as imetmi yeqqim isess aman arami i d as yuff uoeddis idwer as am tcamma. Imara yargeb d xaf s ca n yijjen ad as yini “amcum a itexs ad yaber, issarwat s wur nnes d yixsan!”. Maca netta rid amenni! Rid d asarwet i s yecqan! Rid d manaya i d’ yejjin ad yisi qao tamara ya di tfuct a issecmadven d arbu ya i yezrufan ighembab! Maca d Nunja i xef ikessi marra manaya minzi tzeddegh arendat i wnedrar mermi mma d teffegh d mermi mma tudef ad tet izvar! Yehdva t ha nettat isqada s isfarninen tarra yas d yennedvnit, amenni i yeodu wass n usarwet.

            Awarni umi nfararen zeg wsarwet, iffegh zi taddart Sifaw d Oessu d Massin, aregben awarni wedcir mani ufin ihenjiren tiraren tcamma, yudef ad yirar akid sen Sifaw, yeodu Massin d Oessu ghar awarni taddart n Karamas, arzun d xef ca n tsvudvar, qqimen xaf sent, yarzvem Oessu aqemmum uca itemtem:

-«Ansa ya (endroit) yecna, day s tiri! Iqad day s ughimi! Min tennid?»

            Isfarnen Massin, yarra xaf s:

-«Tghimigh da nec orayen rebda!»

            Inna s d, u netta ixezzvar ghar taddart tacemratc:

-«Ssanitati tzemmared ad tzvared Nunja amec mma texsed! Ap a yamedduker inu tperci cek txusi cek oad d amezvyan!»

            Inna s d Massin, u netta itaca aked rehriq itett it’ deg wur:

-«Nican, a yamedduker, tarra yi percegh s reprac war ghar s asafar! Dewregh d abupari, tiwi yi guggu ynu, tejja yi war ssinegh mani nettvaregh isvuraf inu ma ghar zzat ma ghar deffar!»

-«Itwanna yi belli turid as ict n tebrat! D tidett?»

-«Wap d tidett, sqadegh as t, tessiwedv as t Yettvu ca n sin n imalasen zeg ûmi»

-«Axyar!Tarr d xaf k nigh oad?»

-«Oad!Tessned, a Oessu a yamedduker inu, yuzva ghar i uraji! Mechar zeg ûmi d nec trajigh?! Qqaregh as ad xaf i d tarr ass a, ad xaf i d tarr tiwacca, ad xaf i d tarr farwayecca! Ass a yedwer d fridvennat, tiwacca tedwer d idvennat, farwayecca tedwer d ass a, nettat walu tugi ad xaf i d tarr!»

-«Min d ac gh ad ynigh a tawmat? Mara tarezzud ad tecced tamment ixessa c ad tesvbared i tiqqest n tzizwa! Imara texsed ad tmuned aked Nunja, ixessva cek ad trajid, war dji ar farwayecca wapa, maca ar imar nigh ar frimar, nigh  ar gh ad temted, nigh ad ac inigh balak oemmares ad xaf k d tarr!»

-«Wi yessnen? Maca min yedjan nican netta texsegh Nunja s wur d yexsan, war ssinegh min d ayi yemsaren? Xmi nni tirigh ggwjegh xaf s ssutaregh ad kid s msagaregh huma ad kid s pardegh, u ssitimegh ad irigh udsegh tet! U xmi nni tirigh arendad nnes war zemmaregh ad ghar s adsegh ura ad kid s ssiwregh, am ij n wass aregbegh awarni taddart n Heddu, netvhegh di Nunja tbedd aked Yettvu d Taziri deg wbrid, war ssinegh min d ayi yemsaren ar ami ufigh idvaren inu dewren ghar deffar mebra ma d ayi sseqsan! Ufigh ixef inu yemsebdva xef sin n yezyinen; ijjen yeqqar ayi “ruh sedjem xaf sent rexdenni tessiwred ad ked Nunja, ini as ma tettvfed tabrat nni i d am d sqadegh aked Yettvu nigh rid amenni?! Mara tenna c d upu ini yas texsegh cem waxxa zzat i tinnedvnit!”. Maca azyen nnedvnit inna yi d rid amenni, inna yi d “qim ixsan nnec mana wawar kid s gh ad tessiwred! Ma tarezzud ad cek tezpem (elle te détestera) i rebda, ad xaf k dvsan marra imezdagh n ighzar n Uriri!”. I wa twarid a tawmat?»

-«Up ya rourret! Imara adjinna tugha cek tessarwated deg wnedrar akid negh! Danita twarigh cek tessarwated barra i wnedrar a Massin aghyur! Ad tiri tutsed ghar s, sigha s fus nnec sudm it zi tgemmizin u rexdenni min yexs ad yemsar iri yemsar! Wi d ac yennan ad cek tezpem i rebda, yiwi yi d arebbi ura d nettat iri tenna c d “texsegh cek ” ad cek tzvem ghar s s ighadjen nnes!»

-«Axyar !Axyar! Ma tghir ac d filem n Pind nigh!? Qa war dji d tûrja, manaya d tidett, u tidett war dji am tûrja! Cek tqarran day k s wattvas ifilman n Pind!»

-«Mayemmi cek txarrisved amya? Mayemmi? Qa ura d nettat ghar s ur itexsen am cek am nettat! Wi yessnen mara ghar s ur n wezvru war itici, nigh ghar s ur n trefsa tarezzu mghar umi gh ad teqqes!»

            Qqimen amenni ssawaren, tkeyyafen, tusun, tedvsan, arami xaf sen d tendver tadjest mebra ma ad izvar Massin Nunja balak war din tedji di taddart, kkaren zeg wraq nni ddun ad aregwhen, jjin adghar (endroit) nni yessu s ibunetwen d yighghedv nsen. 

(Isul, ad d yetwadvfar)