Dpar n ubarran

Yura t: Said BELGHARBI

Aya dpar n ubarran

A yeyyar n umenghi

Tezdegh day k tudart

S ibehrar n unuri.

D cek day i yejjin

Tarigh s uriri

Ad arigh amezruy

Nnec war ighedji

Ma tarigh s rxadvar

Ma tzemmegh s umenghi

Ad ac inigh uyar d

Ra d cek ari yi

Siwer d x tidet

Deg irimamen tarwi

Ciyyar d s idammen

D ac isseswen dmani

Sriwriw d s yires

Xak yisin tarzugi.

Fadvma ghar k tus d

S tidurin n ughi

Tarzef d d inexsisen

Yudumen d araghi.

Aya dpar n ubarran

Aya sendef day i

Aymar ucar nnec

S taryazt zi yefri

Faryent s yiwaren

Suya d yenni

Xebcen anegh udem

Di tutart war n tiri

S fedvren tidvewdvin

Huma war cek ntari

Arzvin rxezrat

S rhezran war ntwiri.

Aya dpar ubarran

Mani cek ghar nawi

Mani?

A cek nidar d twafit

Tweddvar war tnufi

A cek neghnes d ayezzim

D asendef i yenneghni.

Ad as inigh i Temsaman

Twangit war tmetti

Ad as inigh a wetcma

Rubigh, ruba akidi.