Ungal:

 Anebdu

5- Tabrat

Itari dt: Lmeddan Oumar Numid (Tvanja)

 

Yesgha Massin ca n igarruten zeg ict n thanut i d yusin xef webrid huma ad ten ikeyyef. Rami d as ten dt izzenz, yenna s d wenni yeznuzan:

-«Mermi tremded ad tkeyfed a tawmat?».

Yedvsva, izvem ancucen uca yarra xaf s:

-«Remdegh ad keyfegh ha aseggûs a di Nnadvûr!».

Yettvef ijj n ugarru yessargh idt, uca yessemda awar nnes:

-«Keyfegh garru amezwaru ha d tirart wapa, iwa twarid garru awarni wgarru arami yedwer manaya d tnamit, minzi atarras war itif min gh ad yegg uca itkeyyaf… Ameysa xminni war itif min gh ad yegg igharresv tisira nnes».

Qqimen xef ca n tisvudvar awarni taddart n Karamas, uca ssentan tparraden. Yessiwer Sifaw yenna deg ûwar nnes:

-«Udarebbi war d tisen ca imeddukar nnedvnit huma ad nirar tcamma!».

Inna Massin:

-«Ad tagh ruhen ad iraren deg iyyar n temzida!».

Iks as Usekkur awar zeg wqemmum huma ad yini:

-«Nigh ruhen ghar Kebdani».

Inna s Sifaw i Massin umi tugha wa isqada rxezvrat nnes ghar taddart n Nunja:

-«Min dipa txezzvared?»

-«Man wen? Ma necc nigh? Walu!

Yenna sen d Usekkur:

-«Ixezzvar ghar N… N..N..»

Yessedvfar as d Sifaw awar:

-«N.. N..Nunja! Nigh upu? Oad war kid s tessiwred?

Yarra xaf s Massin:

-«Tghir ac gh ad ruh siwer wapa!»

-«I min tghired? Siwer kid s svafi! Ini as arezzugh akid m munegh qa ur inu itexs i cem!», i d as yenna Sifaw.

-«Maca mammec? Ma ad rahegh ghar taddart n baba s uca ad sqarqbegh di tewwart, wenni i d gh ad yeffghen ad ayi d yarzvem waxxa gh ad yiri d baba s nigh d yemma s, uca necc ad as inigh ini as i Nunja ad d teffegh qa arezzugh akid s ssiwregh!» i d as yenna Massin i Sifaw.

-«Wap, tzemmared ad tegged manaya imara day k taryazt!»

-«Wap zemmaregh, maca di tirja wapa!»

-«I min gh ad tegged huma nettat ad tessen belli texsed tet?».

-«War ssinegh! Twarid a yamedduker, necc tburrumegh attvas, balak war zmiregh akid s ssiwregh udem aked wudem deg wedcir nnegh!».

Iswingem Sifaw ijj n wakud d amezvyan, iswedv deg udem n Massin yesfarnen uca yenna s:

-«Ufigh ac min gh ad tegged! Ad as tarid tabrat».

Yesfarnen Massin uca yenna s:

-«D manay i tufid txarrisvegh day s! Di tmeddit i yeodun i d ayi d yedvra manaya ghar twengint! U zi tuffut necc arezzugh xef Maghuc huma ad as tet yawi».

Yarzva Usekkur amsawar i tugha jar Massin d Sifaw umi i d asen yenna:

-«Pa Maghuc i xef tarezzud! Aqqa dt yuss d! Ghar k zpar a Massin!».

Ixecc d ghar sen Maghuc, yesfarnen, yarzvem aqemmum uca yenna:

«Azul a Maghuc nnegh!»

Yenna s Massin:

-«Mammec tedjid a Maghuc u mani tugha c zi tuffut nec arezzugh xaf k?».

Yarra xaf s netta:

-«Am rebda aqa yi panet, tugha yi ruhegh ad aymegh zi roensvar»

-«War tezvrid bu ymeddukar nnedvnit?»

-«Upu, war ten zvrigh ca ass a, balak ruhen ghar Kebdani».

Yessiwer d Sifaw, yenna deg ûwar nnes:

-«Dix, war nzemmar ad nirar tcamma».

Yeqqim Massin yesqar itxarrisv di ca rami tugha imeddukar nnedvni ssawaren xef yinni war d yusin amacnaw Afarziri i gh ad tedja tcamma, zi ssin mmutyen ad parden xef ifilmen. Awarni umi ixarresv yenna s i Maghuc:

-«Ser ad ac inigh a Maghuc, tarezvmed amezzugh nnec mlih! I mara ttaregh zzay k ict n tmesract tzemmared ad t tegged?»

Yarra xaf s netta:

-«Wap zemmaregh maghar upu, maca min teona tmesract a?»

-«Arezzugh ad arigh ict n tebrat i Nunja, xsegh ad as t tessiwdved, mayenzi cek ttased as d u rebda trahed ghar sen ghar taddart».

-«Waxxa!», zi xaf s yarra Maghuc.

-«Xsegh ict n tifact d ijj n ughanib, tzemmared ad ayi ten d tawi d zi taddart nwem, d cek i yudsen?», i zzay s yettar Massin.

-«Waxxa ad ac ten d awyegh rexxu», i d as yenna Maghuc.

Iruh yeggûr itazzer ghar taddart nsen, idwer d yeggûr itazzer yezregh d akid s s ca n tefray d ticemrarin d ijj n ughanib, yuca s ten i Massin, umi xaf sen ten yettvef uneggaru ya, yenna s:

-«Ad tqad ac a yamedduker inu, rexxu tzemmared ad tuyûred, xminni cek gh ad xsegh ad xaf k raghigh».

Yenna s d umi yeddu ad yuyûr:

-«Waxxa xminni xaf i gh ad arzud sqarqeb d xaf i di tewwart»

Awarni umi yuyûr Maghuc, yettar Massin zi Sifaw d Usekkur ad dt awzen huma ad yari tabrat, arrin d xaf s s waxxa.

Yettvef Massin aghanib jar idvewdvan, yessars tifact sennej i wfud nnes, yessenta ad yari. Yura ghar umezwaru: «Nunja ioizzen!». Yesbedd idt Sifaw, uca yenna s:

-«Tettaregh zzay k ad tarid “Talexsuyt inu Nunja”, mana “Nunja ioizzen”!

-«Mayemmi? Kifkif», i yenna Massin.

-«Upu war dji kifkif, mayenzi cek ttarid i tenni texsed, i tmesuyt nnec, war dji i yicten mammec mma tegga, tzemmared ad tinid yemma ynu ioizzen nigh wetcma ynu ioizzen…».

Yura “Tamexsuyt inu Nunja», yesbedd idt Sifaw di twara wis sin.

-«Tira nnec war cnint ca, am tinni n tyazvidvt!».

Dvsvin marra idsen, uca yarra xaf s Masin:

-«Di tidette tira ynu war cnint! Tzemmared ad ayi tarid cek, tira nnec cnant am tinni n uzvaghmir!»

Dvsvin marra di twara wis sin, zi ssin yenna s Sifaw i Massin:

-«Wap, tira ynu cnant mayenzi necc aqqa yi deg wseggûs wis kuzv zi tghuri wis sin, cek d Usekkur aqqa jenniw di wis kradv, suya tira ynu ifent tenni nwem, awi d aghanib nni d yict n tifarct nnedvnit mahend ad ac arigh ict n tebrat tecna u tqad».

-«Agh ac a tawmat! Tqadigh cek s wattvas», i d as yenna Massin.

Yura: “Tamexsuyt inu Nunja, zeg wmexsuy nnem Massin, i tmexsuyt inu Nunja…”

Yesbedd idt Massin zzat ma ad isala, umi i d as yenna:

-«Maca min texsed ad tinid s “zeg wmexsuy nnem Massin”?»

Yuss d kid s Usekkur deg ûwar:

-«D tidette! Ari s umedya (par exemple) “zi Massin ghar tmexsuyt nnes Nunja!”, nigh upu a Massin»

-«Wap manaya yif mayenzi mani ssnegh necc d amexsuy nnes nigh upu!», i yenna Massin.

-«Nican balak aqqa c texs ca n yijj nnedvnit di Tvanja!», i d as yenna Sifaw s tadvsva.

-«Wi yessnen, am walu!», i d as yenna Massin.

-«Yif ad arigh “zi Massin” xef “zeg wmexsuy nnem Massin” huma war xaf k ttedvsva!»

Yura manayenni, uca yessedvfar as: “…tessned a Nunja qa tamghart mebra arridva amecnaw tafunast war iticcen aghi, nigh amecnaw tzizwit war iticcen tamment…”.

Ttbepdven i min yura Sifaw, yenna s Usekkur:

-«Manaya yecna s wattvas, a tawmat! Wi c yesremden tighit a?»

Yenna s Massin:

-«Manaya yif u yecna attvas!».

Yenna s d netta:

-«I rexxu, ini yi d min texsed ad as tarid?».

Yenna s Massin:

-«Waxxa ari yas “tarigh am d tabrat a huma ad am inigh qa dewregh texsegh cem…”.

-«Wap texsegh cem, arni d!», i yenna Sifaw.

-«Waxxan sedvfar as: “soeddugh timedditin inu d ticemrarin war xaf i itekk yidvesv, minzi rebda nec txarrisvegh day m, tasmaqqatc nnem war ttemsebdvi xef tittvawin inu… Xsegh ma ura d cem ttacid amec tacigh nigh rid amenni? Xsegh ad am inigh ma nzemmar ad nemsagar nigh war nzemmar?”, i d as d yenna Massin i Sifaw.

-«Itxessva c ad as tessemred ixef nnec!», i zzay s yettar Sifaw.

-«Waxxa ari: “Balak tessned ayi: necc qqaren ayi Massin, teghrid akid i di tghuri tamezwarut… xsegh ad kid m msagaregh u xsegh ad kid m pardegh… Itxessva cem ad xaf i d tarred deghya mara yexs ur nnem, tanemmirt!», i d as d yenna Massin i Sifaw huma ad dt yari.

Yettar d Sifaw zi Massin:

-«I rux ma ad arigh asagh nnec nigh?».

Yarr d xaf s netta:

-«Upu, zzat ma ad tarid asagh inu, ari yas kradv n twararin; texsegh cem.. texsegh cem.. texsegh cem».

-«Waxxa ad dt arigh!, i d as yenna Sifaw.

Yeghra tabrat nni di twara taneggarut, idvefs it, iragha d xef Maghuc, umi d yusa, yettar zzay s ad yegg ismagal, maca netta yenna s is dinni wi gh as dt yeggen if zzay s, wetcma s Yettvu. Taniti d tamedduketc n Nunja, rebda temsagarent trahent ghar wayawya. Yenna s Massin waxxa. Yettar zzay s ad yeddu ad xaf s iragha.

Tennûrzvem d tewwart, tessijj d ssin Yettvu, teffegh d uca texzvar d ghar sen. Zi ssin tuss d ghar sen. Tenna sen d umi d ghar sen txecc:

-«Azul!»

Arrin xaf s nitni:

-«Azul a Yettvu».

-«Tarezzud xaf i a Massin yac?», i d as d tenna i Massin.  

(Ad d yetwadvfar)