Mara nssars d imegrad (articles) i tarin imarirn imazighn i tmezzaghen xef taghawsa tamazigha, ad ten af uran s taorabt nigh s tefranssist.

Da nita i di tmrusa jar ifassen nnegh ijjen n useqsi d axatar d netta: mani tella tamazight di tirra n imariren a? u neccin nssen belli ineggura yad d nitni i ytettaren zi tanbadvt tamerrukit ad tsnsveb zi tutlayt tamazight deg ijjen usadvuf (loi) d adimuqratvi.

Di tidet maci d azegal (erreur) n imarirn a i tarin s tutlayin tinfurin acku nitni mgharen d di tinmel taorabt i d asen tslmed ijjen n uxarres d aorubi u xminni i ghad bedden xef tirra s ughir xaf sen ad arin s tutlayt ilmden di tinmel.

Dinni ijjen ddab n imariren nnidven i ghar llant tizemmar afad ad arin s tamazight maca di twarat d ict tarin s taorabt, ttinin s minzi arezzun ad ssiwdven tabrat nsen i wattasv n midden.

S sin inawen (types) a nteffegh ghar ijjen ugmudv (résultat): tamazight ass a teddar deg waddad n usinef d utwattu. Asinef a issenta d akd uwnak n lmerruk zi lltva n uzarug nes assegwas n 1956 ar ussan n yidv a u netta tugha ideffar di tsghart n tmazight ict tsertit teccur s tamazighufibit ar aduf tekkes marra min itqnen ghar tilawt tamazight deg igaren n uselmed d tebdelt (administration) d Lmedya…

Ar ami amazigh yedwel ur itwiri ixef nes di tudert ur itaca aked taydji nes ur yessin tadlsa nes ura d tagherma nes ibnan inuba nes s nnej i tmurt a.

D manawya i yjjin amazigh isehgar zeg yiman nes u issoeffar zi wennidven amec isyura iles amazigh deg ijjen n usurs (situation) d aoeffan d ijjen ugmudv i tsertit n ussoarreb i d yussin huma ad tnegh iles amazigh di tamazgha.

Aggagen (intellectuels) imazighen ur qqimen tswaden di tsertit tamazighufubit, upu g ussegwas n 1967 tlul d ict n tmsmunt d tamaynut s adu isem n (amrec) iddaren ar dghi isrusan taghawsa tamazight d ijjen n uswi zi tiwriwin nes d taghunsa nes.

Zi senni ar djuxa yaghul amussu amazigh amecnaw asennan yegga am wazzu rami dewrent tracca n tmsmunin timazighin di kuy uraq di tamazgha u di barra nes. Snbghar ma nssihel yiman nnegh deg ukrunulujya n umussu, ass a netta ghar s tansa nes di teyyart tasertant di lmerruk. amec ssmegh ughanib n ineghmasen yuzzer attasv fellas.

Asmetter (conseil) inu i wmussu, mara ixes ad isnjm tamazight zi tmettant u mara ira ad ioebbez ujar x lmexzen, ixesv ad issenta amezzegh zeg ixef nes ad isufegh ilaghuten nes s tmazight imariren ula d nitni ad arin imegrad nsen s tmazight aked ughezdis n imdyazen d imsnflal

Ssnegh amegrud asertan yuser (avoir besoin) ijjen n umawal d amagnu ur tessinen imarirn acku ur tghrin di tinmel maca ulabudda zi tzemmar mahend ad teddu tamazight ghar zzat

(Andich idir)