Kenniw d awmaten

Yura t: Saoid Oebbuti (Tifarsit)

A mmi amenzu, a wennidven anibu,

A ssar iruren ighemyen deg ur inu,

Kenniw d tifawin di djyari inu,

Kenniw d reowin asemmadv deg wnebdu

Xawem nec zvrix deg ûss yeodu

Temmarni tezri ar ami dewrex am ufiru

Nec xsex tazvyudvi akid wem taru

Zi zic n tudart nwem ar uneggaru,

Akid wem ad ttejj nwac war iqettvu,

Netta d aoban n tudart nwem am ughadu,

Iraret, munet uca qimet lebda yammu

Am sin idvewdvan i wxef war d itiss bettvu.

Iraret di remrah waxxa dinni rehmu

Mara tuhrem uyurttiw gahr umaru.

A mmi ameqran, a mmi amenzu

Ghar k ad tejjed umac ad yeqqim yetru

Amres akid c yirar war xas sghuyyu

Huma ad yiri aked ughezdis nnec am ufitvu.

Maca ghar k ad t’ tejjed ad isvha uca ad yettu

Tamazight nni n jeddit wem idja ytessu

Huma ad tlellec am tcuni teccur urvu.

Ghar k ad tejjed umac di tghuri walu

Semr s ad ighar huma war t' traghin "Ghullu"

Semr s irsawen huma war seqqaren "Osallu"

Umac mara yeffud uc as aman ad isu

Mara xaf s taxmuji

Ksi t' xas a mmi, ndvar it' di rbidu

Netta mara yexs deghya ad yessuf

Ghar k, a mmi, war t' tejji ad yendvu

Amres ad yuyar cway cway

Huma iri ad yawedv min yarezzu.

Kenniw d awmaten i ymunen i lebda

Am cek d amenzu am netta d anibu

Ssitimex zeg ûkuc ad temgharem

Ad teqqimem d afriwen i yazvidven inu

Fghettiw d ad tirarem aked ihenjiren

N dcar "tsirit n unedrar" waxxa asinu

Nix ad tirarem azengez aked tebrighin

Nitenti ttirarent ghar woecci s ufiru.

(Di Tfarsit, ass n 12 Yunyu 2953)