Awar n ucar

I wmghar Oali Svidqi AZAYKO deg wjenna nnes.

Yura t: Mimun Amsbrid (Biljika)

Nec d acar yessawar

S wawaren imezwura:

Zzat ad qedvwen iseghwan

Jar tudart d wawaren;

Zzat ad yemsebdva wawar

D tidett – war tmunen;

Zzat ad yedjeswi wawar,

Zzat ad teffghen waman,

Zzat ad twaqedvwen izuwran

Nnes – yewtin deg wur ucar,

Yedwer ikessi t

Wadvu deg ijenwan:

Manis ma yessudv d

Yetmun kid s wawar!

***

Zvummegh x wawar,

Umi tufigh war yesyiwin;

Sseghdegh x wawar,

Umi tufigh war yessiwir;

***

Yetwanna yi: siwer

Amen ssawaren yewdan!

Siwer huma ad tirid

Zzaysen, ad cek ssnen.

Siwer da, siwer dipa,

Siwer assa, tiwecca –

Ad cek d yeffu akidsen,

War cek itxissvi ca!

Ad tecced, ad teswed,

Ad cek yeffu ghark udem.

Ad twassned jarasen –

Ad zzay k ssemgharen!

Arrigh xafsen, nnigh asen:

Irs inu d ameghnan,

Itag ad yennedv deg wqemmum,

Ad yini min war yedjin:

Ad yessiwer s wawaren

Issrawen, srazvan;

Ad itarra ifezv –

War yedji min gha yeffezv!

Ad yarnu Rvaz inu,

Nec war yetyiwinen.

***

Umi kkregh ad ssiwregh,

Dewregh ghar wawaren

Nni i d yedduqvzen zeg wcar.

Inni i ghar djan izvewran;

Inni yeccuren s waman

N tudart i zi d yman.

(AMSBRID, m_amsbrid@yahoo.fr)