Muhememd Cukri nigh xminni tudart teddakkûr d tira

Yura t: Saoid Xuttur (Pulanda)

Deg ûass n 15 yemrayûr 2003 tiwedv arimet n Muhemmed Cukri bac ad temsafadv aked umadval, ad tsqebbedv tudart. Maca tudart n Muhemmed Cukri war ttemsifidv ca aked tudart nnegh. Xsegh ad inigh aked tudart... Nec oemmars war ssinegh arimet n Mohemmed Cukri... oemmars war kid s qqimegh... oemmars war kid s pardegh... war kid s... maca, snegh t’... qqimegh... pardegh... war dji aked arrimet n Muhemmed Cukri, maca aked tudart n Muhemmed Cukri... aked tidet n Muhemmed Cukri... aked buhber n Muhemmed Cukri... nec war dji zeg ina i ghad yeqqimen tarin xaf s... toawaden xaf s: aghimi nsen akid s... aparred nsen akid s... min tinigh!? Xsegh ad inigh: aked arrimet n Muhemmed Cukri... ssenttan tarin x tudart n Muhemmd Cukri, maca nettat tudart n Muhemmed Cukri war tejji min xef ghad yarin ujar i min tura x yexf nnes... waxxa semman tudart n Muhemmed Cukri s utvanjawi... semman tet... xsegh ad ssnegh: wi d yejjin ij n wenneghni? Ma d tudart n Muhemmed Cukri i d yejjin Tvanja nigh d Tvanja i d yejjin tudart n Muhemmed Cukri...!?

D tudart nnes i ten yessnen, zbullughen/tnafaqen arrimet n Muhammed Cukri... maca tudart nnes oemmars war tent tezbullegh/tnifeq... tinin as s Tmazight: “min ghar s deg wur nnes aqqa t ghar s deg wqemmum nnes”. Maca ina, min tugha war zemmarn ad t’ inin i yarrimet n Muhemmed Cukri i tugha ten yessaggûden, rexxu ssentan ttinin t bac ad inin min tugha war zemmarn ad t inin i yarrimet nnes... ssentan tinin t x arrimet n Muhammed Cukri. Ma tudart nnes war yejj ura d ijj ad xaf s yini... Nitni ad inin, maca min ghad yinin? Ad inin min tugha war zemmarn ad t’ inin i yarrimet nnes...

Attvas i yexsen ad d ghar sen arren tudart n Muhammed Cukri. Maca nettat tessen mani t’  tarra... tfarn it nettat s yixf nnes... 

Am yenna ij n umu, Oebdelqader Benoli - d amau yemghar u yettwassen deg wmadval ura d netta zeg ayt cicar... - umi zzay s ttaren deg ilen/atilibizyun ad yessiwer x Muhemmed Cukri): “Attvas war ssinen walu x manis d usin Imarrak, maca wenni yexsen ad yessen xaf sen ad ighar i Muhammed Cukri... d netta i yuran tameddurt n Arrif d Irifeyyen”.

Ssentan snat n wudmawen texsen ad ghar sen arren tudart n Muhammed Cukri... ijj itini belli netta yura s taorabt, iwa aqa d Aorab... ijj itini yura s uxarrves yennurzvem, iwa qa zzay negh... x manaya i tinin s Tmazight: “bab n taffa yettves/yepna ighardvayen tiraren s wadday nnes”

Ssawaren x ma n tutlayt i zi yura, wa war tugha t oemmars d amxumbber ghar tudart n Imazighen... Mri tugha t d amxumbber iri ura d ict n tudart n umazigh ma ad t ari s ca n tutlayt nneghni illa s Tmazight..., u d wa d Amazigh...! Inneghni ssawaren x unurzvem i zi tura tudart n Muhammed Cukri, mri war tennurzvem tudart n umazigh, iri war yedji umazigh..., war teqqim Tmazight...!

Nnigh awem...! mayemmi war ntegg ict n tghawsa: mayemmi war nessiwir cway neccin x mani tfarn ixf nnes tudart n Muhammed Cukri d mani tarra ixf nnes... war dji:

D tudart n Muhammed Cukri i yejjudjen i tidet war t sdurruyen bu ixarriqen... nigh d azbullegh (nnifaq)...

D tudart n Muhammed Cukri i yejjudjen ad tari tameddurt n Arrif d irifeyyen u yessen belli war din bu ca n yijj izemmar ad yari ujar zeg ayt bab nnes... xmi itari x tudart nnes amec yenna deg wawar nnes, itari x tudart nnes d tenni n weydud nnes d amezwar, maca ura x yewdan mmarra deg ûmadval...

D tudart n Muhemmed Cukri i tugha yeccaten rebda deg idmaren nnes s Arrif d irifeyyen...

D tudart n Muhammed Cukri i yennan: Irifeyyen waxxa day sen taghennant, maca day sen ura d tamexmaxt (nnefs)...  u s tghennant i yudfen s umezruy deg ûmezruy...

D tudart n Muhammed Cukri i yuran x ugaji zi razv d tzawa... d tecri ghar weghrum nni xef tessiwer yemma s ikasex di Tvanja... maca tudart n Muhammed Cukri tufa ij n wudem nneghni war tugha t’ traja ad tessen tudart n Muhemmed Cukri waxxa tugha tedja...  aseghdver zeg irifeyyen d Arrif... ghedvren zi tudart nnes nettat oad d tamezvyant... 

D tudart n Muhammed Cukri i yuran x uxeyyeq i tegga wami zzay s ttaren ad ksen awaren n Tmazight zeg ûngal “aghrum abazin” ad jjen mghar min itwasdewren ghar taorabt... awarni ij n wakud tarra xaf s tudart n Muhammed Cukri s yijj n wawar yemghar ami tenna: “nec d Amazigh”

D tudart n Muhammed Cukri i yennan i wnempal (directeur) n medi 1: “attvas i din jar anegh n umsebdvi, kenniw s Napoleon tugha texsem ad tessedrem x umadval, neccin Irifeyyen s Muray Muhend tugha nexs ad as newc tirelli nnes...” 

D tudart n Muhammed Cukri i yennan x yayetma s d wattvas n Imazighen i yghetvren zeg wawar nsen d tijjent (rasver) nsen deg ûngal “zamanu al axtae”: “yemma tesmeghghara zzay i attvas x aytma. Atagh umi nec d amenzu nnes, u nejmegh zi razv s ict n tmekra (lmuojiza), u ruregh di Arrif u ssawaregh akid s tutlayt n rwacun, atagh umi nec teddarigh igwjegh xaf s. Aytma i yruren di Tvanja d Tittvawin war ssiwiren bu Tmazight waxxa tugha tegzan as cway. War texsen ad t remden. Yemma tessawar akid sen s Tmazight nitni tarran xaf s s ddarija. war tejjin min war teggen, s minzi mma, bac ad snuffarn tijjent nsen. Itghir asen belli Irifeyyen d ipebbaj. Am nitni, snegh zzay sen attvas di mkur adghar/araq: Imezvyanen d imeqranen”

X tudart n Muhemmed Cukri i d tasen wawaren i tenna tudart n Mimun Amsbrid:

“Attvas i ccigh n tira! Zeg ûmi djigh d nec tettegh tira. Ccigh tira n ssi Omar Abezzah: zzay sent i ssizwaregh,  ccigh ten aked weghrum; ccigh ten aked tmedjarin; swigh tent deg ûman… Tira n ssi omar Abezzah uyûrent ayi deg idammen, war djint mani iwdvent di yarrimet inu. Udfent ayi, tira n ssi Omar Abezzah… Awarni tira n ssi omar abezzah, attvas … attvas n tira i ccigh. Ccigh tent s wass, ccigh tent ghar tmeddit… Tettegh war ttyiwinegh! Arennigh razv: tira urezzunt x tira; tira traghant id i tira!… Zeg ûmi ttugha day i tessecca yemma tira n ssi Omar Abezzah huma ad ggenfigh, d nec percegh s tira, d nec djuzvegh tira, ttûrjigh tira, ttinitegh x tira,… Arrimet inu d tisatirin n tira: tasatact x tsatact x tsatact…; di tisi nsentt qao: tasatact n tira n ssi Omar Abezzah.”