Agdud n tghessiwin (Tafult 2)

(Le peuple des squelettes)

Yaru t: L.Ideflawen (Tinejdad)

...Sellant i wawal n tmurt nnsent da sent ittemneqqar g imezgan amneqqwer n idvarren nnsent ghef wakal. Zrin ttes, ttun ttes, maka anida tamurt nnsent?. Awed yat ur tecfi ghef tfiras n wudem nnes. Awal nnes da ysenneqradv ulawen nnsent irvmin, urda tent ittadja ad gnent ula d isekkel unuddem gher allen nnsent irezvmen apa.

Da tent iseftuttes ubanuq nnes. Tamurt nnsent da tru, da twagh amm iydi tturtsen... Tarwa nnes zrnitt, udjan tt ghas nettat gher watvas n waxbacen (griffes)...Tamurt trezzu ghef tarwa nnes, tga tapeddawiyt, tarwa de trezzu ghef tmurt, awed yan yufan wayedv. Tuccka accken, ighebbez yiccki tilawt nnsen deg ugrures akuyas...

Tamurt nnsent, telsa iberdaz, tedder g tlufa, inbedv ghif s wuzzal, teddupda. Tamurt nnsent tengha yiman nnes atvas n tikkal tsal tedder, da ttetter aghrum deg iberdan d tedrimin i yemsebriden as islutufen g wurawen d ghef wudem. Das ttinin:

"tamurt taqehbiyt! anida tarwa nnem? Anida yaburez nnem amazray (historique), anida yimal nnem? ur akw terwased timura! ur tessined ghas tuttra s wass, idv da tezzenzad tafekka nnem i ynejda.. Da tezzruyed idv ger ifassen nnsen ar tcerragen s ibella nnsen icwan aghbalu n tilawt n tarwa nnem, kem ar asen tqejjamed ifassen s tatvfi s da ttakid, da tterridad min iselsa ghef uzawan n tennfel nnsen tar tilisa, ared tettud ighef nnem d tarwa nnem... S wass ar ttawid ighef g izeglalen ar tganned  Idv... Ar tgannad inejda... Arrida... tatvfi n waman n tudert d tguni d iregzen ur tessined...Tamurt tiyditt, ticentitt... Ddu kem ur tgid tamurt nnegh! nekwni ur ngi tarwa nnem! Ddu accek, ad ur sar nettinniy ahenfur nnem anegh icehcamen..."

Iwaliwen ddegh da ttebbin ul n tmurt, bbin awed win tarwa nnes asen ittisellin.

**************

 Zdint tghessiwin tikli ghef tebridatin iselkamen gher tmurt nnsent. Gher anaruz nnsen, kud tteddunt ddalent ighsan s uksum, ddalent aksum s ihertac, ttemghayent tektiwin (idées) timaynutin amm yirden deg izellifen nnsent. Izdey ugdud d yurew wakal tawada, ass amm yidv, izegh amm usemmidv, ghas tawada.

*************

Rgangent amm wafriw dat uzwu, nnant as:

-Ussan! Max mayed igan ussan? isem n tmurt nnegh? isem n kra n udrar kra n talat? n kan uwaghezniw midd win kra n twargit, nekwni ur nessin mayed igan ussan ula nra ad t nisin ula nwala udmawen nnsen! Nekwni nra kra n yiwen ad negh isskanen abrid yettawin gher tmurt nnegh. IWDA!

Tsusem tghessa, teswingem: "Ussan! awis d acu ygan ussan? seksew i nekwni isawalen ghef wussan, i nek ur ten issinn!". Teswangem imiq, tesmutter ighsan nnes iktutin tdel ten s icedran n uzennar nnes axnanas, tsigger tiseggwin nnes yuran d ubrid azirar d ibeddan dat as. Ar tsawal amm tmusnawt. Imsebriden zrin tt ghas nettat...

"Rgagen wussan nnegh... rdvadvsent tseggwin nnsen ammi ggwden, zzebzind akal amm terfas, istegh udis n tmurt, immezday usidd d tallest, imenghi t talwitt, ussan nezzin gher asekka.. Anida gher ddan wussan nnegh? Anida gher snin ighef amm infalen ghef iberdan n ulili, ghef igharasen id war tigira ur isselkamen gher awed yan umazir.. Amm nekwni da gganen wussan nnegh, ar nekkren, ar ten issergigi weqraf n tegrest, ar ten isghus yizegh n uwilan.

Urun aghed wussan, mmezdayen s ukuker, ttemmenghan amm icenga (ennemis), amm iyazidven deg ugdez n tudert... deg ibgez, rezzun timessi s ssekmadven icudid n yidv acengu..

(Isul itteddu...)