Tanfut:

Ahenjar umi yemmut umedduker nnes¹

Deg ict n tuffut; ikkar warba yeddu ghar tma n weqwir ad yarzu xef umedduker nnes, maca war dinni t yufi ca; wami d idwer; yenna as i yemmas:

- Amedduker inu yemmut.

- Amemmi; war dayes txarras, arzu xef innidven ad kidsen tirared.

Iqqim uhenjar nni xef tnebdat n tewwart, yenti azdjif jar ifassen nnes; ighadjen senden ghar ifadden nnes. yenna: «ad yedwer»; iswingem, war izemmar ad yettu tibularin d ukamiyyun d uzidan n uqezdir d tiseooetan wayar war yegguren, war yedji mghar ad yedwer.

Tender d tmeddit; tezregh d akides s ict n tetrit tissiq temghar, ahenjar yugi ad yadef ad immunsu.

Tenna as yemmas:

- Kcem amemmi, dinni tajrest tqessas.

Maca war yudif, yekkar yeksi akides tibularin d ukamiyyun d uzidan n uqezdir d tiseooet n wayar war yegguren;  ad yarzu xef umedduker nnes.

Yiwedv ghar radas; war yesri iraghan n umedduker nnes; war yufi rimart nnes ghar tseklut; ura zzat i wanu. Issens marra tameddit d netta yarezzu xafs; tekka xafs ict n tmeddit d tabarcant, yeccur tcamir d tisira nnes s toejjajin.

Wami d tenqar tfuct, ahenjar nni yarna t yidves d ufadi, ixzar ghar ifassen nnes, uca yenna:

- Mermi imghar uhenjar a, arebbi inu mermi imghar inct uya.

Tesgha s ij n tcamir n yaryazen; minzi wenni i tugha yarsa iqqudvedv xafs.

Tizmimin:

1 Azwel amezwaru zi tura tenfust a; netta d: «El niño al que se le murió el amigo».

2 «Ana María Matute»; D tamyarut tasebanyut; trur di Barsiluna assegwass n 1926, ghares attvas n tira deg iyyar n tsekla Taqectalit, tiwi assegwass n 2010 tiwsi n Sirbantis. tira n Mariya Matuti sughlent ghar ujar zi 20 n tutlayin timedvlanin ; u mammec twasnent tira nnes s taynit i tarra i tudart n imezyanen d wayduden i teddaren di tmukrisin ; mammec tura attvas xef umnugh unsib itessen tmurt n sebanya jar issegussa n 1936 d 1939.

3 Ccan nigh lqima.