Lalla tammurt inu min xafm tidaren!

Yen cem yezvrin d yen cem izdghen

Nnan ayi day m lghillet war telli ghar miden

Day m car d azgwagh wnneghni d rmeoden

Nnan ayi day m llwiz ixmern di rqtven

Day m ra d nnuwac issiriden urawen

Nnan ayi day m reonasar n waman imizvidven

Zzay sen ira sessen marra ynni iffuden

Tudart day m d reounsar yizvidven

Rux ighmi day s uriri aman nnes arzgen

Wadm ayi ad cem sseqsigh, wi cem inghin?

Ar umi tejjid tarwa nnem am iyujiren

Xzzarn dg wjnna war ufin mani ghad kken

Iwddver asn webrid n ibriden

Azyen zzay sen uyurn oarqen

Cuqqn rbhurat d rmwaj iqshen

Jjin cem ugurn rahen ghar irumiyen

Ttun tamara ykkin x rjdud nsen

Ttun tighufawin ira xafsen itkken

Huma ad ddarn tirlli d asen immksen

Ma yen da iqqimn msakin ffuden

Tariwin g idurar war zemmar ad ten tawdven

Anu mrmi mma rahen ghar s ad zzay s d ccaren

Ad afen aman pwan arnin udjghen

Asghun d aqudvadv uhren ma ad swsren

Rbidu yarezv aman zzay s tefghen

Maca marra manaya nnan asnt iqdimen

Nnanasn; aqa oad ad yas ij n zman iqshen

Wnni war yellin d uccen ad t ccen uccanen

Wnni war yellin d uccen ad t ccen uccanen

(omar elouastani, Azlaf, septembre 2007)