Yessu tifray n udlis nnes xef waggu n iraghan, yarcem xaf sent tasiynut, tmuddu s ibehrar nnes ghar akkuc n waman, tmuttuy s uneoqar ghar udarreo n wadvu, ttemrudjuy s rebput ssa d ssipa akd tisiynutin nnedvnit.

Di ragwaj, isenned wenzar ghef ibuda n zmann nnes, di tqesfin n ujemmadvin mani yeddar d amezdugh, itghughud d ghar negh s ufadi.

Yessder wawal n uhenjar nni di tittvawin n tmeduketc nnes, yexs ad as yini: ¨Sru d xaf m dfuyan nnem, tejjed arrimet nnem d taoaryant, tasinut texs ad tudum, uyak tenni d lizvar n waman aqqet ghar m d asittem, uyak texsd ad twardid temlel nnem i tnecnacin n wenzvar, wenni cem yetrajan deg isran nnes d twasit ghar ihesyan n waman nnes.

Tessili abriwen nnes ghar ujemmadvin, tesserqa turutv n ufus nnes i isefdvawen n wassam, tessiriw ul nnes i ttasio n ujenna ad yadef, war nuci s uxeyyeq nnes al ami d xaf negh d ipnunni s umezruy nnegh d taghrusvi, tgharresv iceqfan n tuooaryent nnegh.

Zi manis d isajja wenzvar, dvwint id attvas n tehjijjatin, d ticemlalin n wudem, am wedfel, munent as d amudvi ghef izerman n tenni i tenyuyren ghar usittem nnegh.

Telghegh tessu arrimet nnes, d agheddu n tcuni, min yedjan nnes itmudjugh s mezri, isrizez d ghar s wenzvar d asriwrew am nda issesfaden tancucin n tbenneomant zi min xaf s issensen n tmedditin.

Nusem marra idnegh zeg unzvar, nusem zi tittvawin nnes itareqriqen s umezruy nni nesdargher neccin, netta t d taslit s yeghsan n ughanim, d taghenja tessemlilih ghar yimal nnes ad ghemyen uraren nnegh d tifeswin, ttinit ghar akkuc n waman ad yessu s tyawant nnes xef ulawen n ulazvi.

Ahenjar nni, itirar, inettvu, am uyarziz nni yezvrin anqar amezwaru n tfuyt nnes, itaghedd tihjijjatin n wedfel ghar turutv n ufuss nnes, itmuttuy zzay sent ssa ghar ughilin, ssipa ghar da, itettar ad yudum d tazvyudvi marra min yarcem n tsinutin ghef tefray, yejjin anzvar ijeyyef deg ijenwan nnes, mani yeffud tinessisin ad udument d aman ghef tancucin n isegman ad nghen afadi nsen day negh yeffuden.

(Said BELGHARBI, Ass n 21-08-2008)