Lmughrib d tammurt d tamazight

Yura t: Hassan Ahfid (Aliman)

Tammurt n Lmughrib zi tqiccit nnes ar wadday nnes, zi zermedv nnes ar yeffus nnes, tmurt d tamazight. Marra min day s d ighezvran, d idurar d redcur d tiqbbar, tinddam… kessint assagh-isem-d amazigh, min yexes ad yini billi tammurt a zedghen tet imazighen, ssawaren tutlayt n tamazight, izi tugha temsawadven ar wakud a –ar ruxa-, marra tighuri n imusnawiyyen  qqarent tammurt a d tamazight, d imazighen d aydud amenzu amezwaru i t izedghen, war  dusin zeg wammas, ura zeg umaru, war dusin x Ireghman ura x isardan, da ighemyen, da isghemyen –isseymen- arraw nsen.

Maymmi qqaren iourubiyyen aqa Lmughrib d tmurt d taorabt, qqaren –Lmaghrib loarabi-, d wattvas ixarriqen nniden, ssadafen Lmughrib ughir xaf s di remrah n waoraben -amuni n waoraben -manaya d icttvihen d axarres d adyuluji n waoraben, itawya negh d neccin imughrabiyyen -imazighen- itaddaren di Eurupa mghar tioenkrifin d timukrisin di tudart nnegh. Mkur ass, ssentan irumiyyen xazzaren d ghar negh (-d aoraben-) s ij n titv n hettvu d wedvfar d wehgar, uoad attvas umi imsar uduqqez nni di –Madrid- neccin nqqar asen neccin d imughrabiyyen, d imazighen war nelli d aoraben. ntattar zi Lmughrib ad yeffegh zi tvehtvaha nni n waoraben, ad ibarreh deg ujnna ntta d tmurt tamazight, war tadji d taorabt, ad ixarres di tamunit n tidet n tafriqt n ugafa -nord afrique-, mamec inna ugllid amazigh massinissa (tamazgha-tafriqt-tamurt n yifriqiyyen), -neccin nqqar asen  war talli i waoraben.

Uca ad tafed netwassen attvas ghar marra irumiyyen d regnus nnidven da deg uruppa, d imazighen war nedji d aoraben, ad tafed tbaddaren rxezrat nsen, u ticcen anegh ij n wazal-valeur-d ameqran am mamec itaggen aked regnus nnidven umi tban tanttit d min yeona nican am, Iturkiyyen, d iraniyyen, d ikurdiyyen, d imaliziyyen, d ibusniyyen… i yllan s wattvas da deg uliman-euruppa-

Lmughrib ameqran d tamurt n imazighen, xsen nigh war xsen iqawmajiyyen iourubiyyen.

       (Ass n 1-5-2004-2954)