Tanfust:

Tabrat tameggarut n umeddukel

Yura t: Yusef Oazz Eddin*, Asughel: Said BELGHARBI

Wami beddegh zzat i teqseft taqburt di teghremt, sfeldegh i ipedawiyen tpelpilen zzat ijj n ugraw n yewdan.

Udsegh ghar sen, mhizwaregh ura d nnec ad sfeldegh s taynit ghar tamawayt nsen.

Undven sa (7) n tawaratin i teqseft nni, zi senni ttvfen tabridt n wezvru d yusin xef ughezdis afusi n igudar nnes.

Ikk d cwayt n wakud iwdven ghar uraq n tmedvlin, deg ammas nnes munen ipedawiyen nni xef ijj n usebder (cercueil, lmehmel) war yessin hedd wey day s itt wanedvlen!.

Maca ipeddawiyen nni war bedden ad lami iwdven ghar tawrirt isajjan xef tma n teghlemt, gguren; gheryen xef rxezrat inu. Nec ssusmegh deg uraq inu, ggigh araji d reowetc inu!..

Deg akud nni tugha war tesligh i zpir ula d amussu nsen, axmi marra mmuten.

Ijj zzay sen; yenna yid:

- Mutti senni!..

Kkaregh d, smuqqlegh deg usidvudv nni abarcan i yedlin isebder nni (cercueil).

Ghensegh asqar i ixf inu; uca nnigh as:

- Mayyemmi war d tseqsigh hedd zzay sen?

Ijj n uwessar s tamart d tacemlalt, yeqqim zzat inu, sseqsigh t:

- Arezzugh ad ssnegh bab n usebder a?

War xaf i d ayrri ca, waxxa sseqsight i wattvas n twaratin.

Asusem yesdel xef uraq nni, nnec smuqqulegh deg usqar nsen, kkaregh; ssurfegh ghar isebder. Sarwegh d xaf s acdvadv nni abarcan, war day s uffigh walu! arenyegh sarwegh t xaf s marra, isijj d xaf i ijj n uzellif yedjef i arrimet nnes, yarwes deg wudem n ca n ijj axmi nni dja zright dey mani!!.

Day i mezri ad ssnegh bab nnes, maca tajrest n tesvmedv tejja yi ad dewregh ghar texxamt inu deg usensu di ggigh ad ssensegh ict n tmeddit.

Abarru n iseqsiten temxetwayen di tighrasvin n wadji inu, mayemmi war tendviren, mayemmi ssusmen lghaci nni, mayemmi xaf sen agwjen ipedawiyen nni?!..

D min day i yejjin attvas ad xarsvegh; mayemmi war das qqazen andvel am imettinen marra?.

Issenta wenzvar itudum d, yeksi cwayt axmi nni war yewti oemmars, mmutyen zi lghaci nni kuz (4) n yargazen xsen ad ksin isebder.

Am weqzin itawi itarra; yarekwwes deg wulli, dfaregh ten ar lami udffn ghar ijj n ufakan (temple) isekka s wezrvu d acemlal.. jjin dinni isebder nni uca mkul ijj man tabridt d man n tasellya i yedvfar. Min tugha twarigh amenni yus d ghar i axmi d ca n tarja!!.

Udsegh ghar isebder, i twarat nnidven ksigh xaf s acdvadv zi yedla, d nec tesligh i tzut n ca n weqzin yemmuzzar, maca war twiligh mani yella, s tigwdi deghya agwjegh xef isebder nni.

Carfegh ixf inu ghar tiracwin n tarja inu, twaligh zzat inu akemmar n weqzin nni ghar s imezzughen d imezyanen, tittvawin jeooarent id ghar i, aghmuzen nnes qedvoen i wenpac.

Agwjegh xef uraq nni.. dewlegh s tazla ghar usensu…

Maca oad war ssiwdvegh tabrat i umeddukel inu!..

Deg umeggaru n umsagar nnegh, yura ayi d tabrat nni, zzat ma ad day i t yewc; yenna yi:

Ddu ghar temdint n “SAMUC”, traji d zzat i teqseft n teghremt nnes…

Icarf ayi wakud ghar s; war uffigh ad tessiqsigh xef tansa n mani ghar ssiwdvegh tabrat nni!!.

Deg usensu yuza yi yidves, qqimegh tnuhmuzegh, txarravegh deg uzellif nni itt waqessen zey arrimet nnes…

Ghar tuffut, ksigh d azeobul inu (valise), udffegh ghar ufakan (temple) mani yessens usebder; war senni yemmuti, xzaregh xef uzelmadv d ufusi inu, war twiligh ura d ijj…

Ksegh xaf s acdvadv nni, maca uffigh azellif nni war dinni yelli. Ijj n uharmuc issenta isqarqub; issenxuxur dey tewwart n ufanan, iffegh d ghar s ijj n uwessar, msawalen jar asen s ucemcem umi war ugzugh.

Maca oini tugha itt seqsa t xef bab n uzellif nni?!...

Axmi nni sfldegh ghar uwessar nni, tugha yeqqar as s uzawar:

- Azellif nni war d yusi ghar temdint, hima ad tnegg deg isebder…

Ixzar uwessar nni ammu d wammu! Yarjer d d xaf s tawwart nni s ubeqqedv d uzunfedv.

Zvwigh iked tebridt d yusin xef tma n ufakan, kkigh zzat i tudrin isekkn s wezvru war imsarwis deg wezvru n ufakan, iwdvegh ghar teqseft.

Ict n twessart tezri d zzat inu, nnigh as:

-A henna inu! ghar i ict n tebrat, yuccel xaf i ad tewcegh i bab nnes…

War tarri taynit i uraghi inu, tegga axmi war day i tesri, tesvuref s umari d adaff ghar ict n texxamt; d yusin xef tma n webrid.

Trigh ad tedvfaregh, maca sligh i uleplep n ipeddawiyen, bedden zzat inu am iwaffen n tfelwin.

Dvfaregh ten, maca deghya gheryen xef rxezrat inu… ssentigh steftifegh am udarghal; war twiligh min dinni zzat inu!.

Arezmegh tittvawin, uffigh ixf inu axmi nni lligh di ca n tnezruft (sahara) tcefcuf s usezghel nnes. Ameddukel inu zi ladas yeqqar ayi d:

- “Urjigh cek deg ict n tmeddit axmi tugha telli d d amezdugh n tnezruft!..

Di tarja inu tugha twaligh cek d imweddar, war tessin d ma n tabridt cek d yiwyen ghar tnezruft, tugha tghughud d s ufadi, asutar nnec d ict n tuddimt n waman itt sessi… deg akud nni tugha ifadden nnec qarmen xef yejdi.

Twarigh cek war t zemmar d i tecri, dja dinni kuz (4) n yewdan tezzer ghar idvaren nsen ict n arrimet nnidven, swejjden ad das gharrsven!!.”

* D amyaru d AKURDI