"Waf"¹, d wa d azwel² n tmezgunt yura Muhemmed Buzeggu. Awarn i sin n wengalen nnes: “Ticri x tma n tsarrawt” (2001), “Jar u jar” (2004), d ict n tesmudvt n tullisin³: “Ifri n ouna” (2006).

Tamezgunt a tarbu attvasv n imunas jar isebtar⁴ nnes, yus d ad ikkes afray xef tussna nnegh, amezruy nnegh, insayen⁵ nnegh, tamazight nnegh…

Mamec d yusa di temsizwart n wedlis:

“WAF” d taghuyyit ijepden mani aseghdi ineqq awal, d alaghi zi rallagh n wul mani tayri tettwanegh, d asitm i ict n tudart tecna mani itarrasen nnughen jar min teggen d min xsen ad ggen, d tudart ixsn tilelli i wawal, i weydud mgal⁶ ahewwes n tseqqar n temghart d yewdan marra, mgal aseghdi i inghin n tutlayt tamazight.

Tamezgunt a turem s rehriq n tarezzut xef tidet innughen, ittwacerfen jar sin n ighezdisa: zi tudart ghar rmewt, zi subastva ghar tayri, zeg uhudri ghar waryaz, zi tallest ghar tfawt. Itarrasen n tmezgunt tempafan, tneqradvn, tmuruden, arezzun s rehriq deg wul xef cra i ten ghar issufghen s idvaren nnsen huma ad uyarn amc marra iwdan. D WAF i ten ineqqen, d WAF i ghar nghen.

Amaru, ar ami yura tamezgunt a, issars d marra tarzugi n wussan. Tawuri⁷ ya, ixsen ad teqdvu isekraf n imunas, bac war ttili tutlayt nnegh d tanecruft n yixf nnes, tus d d anzva⁸ aqa tasekla tamazight teggûr ad taf ansa nnes jar marra tisekla tamadvlant⁹. Tira ya texs ad tlellec am benneoman deg iyyar n tsekla tamazight, war ttili d isennanen isnuqquben arrimet n tussna nnegh.

Deg umeggar, ameghri iggûr ad yaf ixf nnes jar tiwinas¹⁰ tizirarin mani d tedduqquzv tinit n ict n tudart tizvidv, d turja i iksin ijjen ijjen…

Abdelmottaleb ZIZAOUI (Filère: Etudes amazighes –Oujda-)

Tizmilin: