Tanfust Taqudvavdt

Tinufra

Yura t: Sliman Begharbi

Ura d netta tugha itirar Tinufra, aked Tarwra n ADcar nnes, umi tugha yedja d Amezyan,

netta yessen ad yennuffar deg Iqwaren d Txuxatin n Tudrin n Dcar nnes, war qqaren huma ufin t imeddukar nnes di Tirart, tugha qqaren as: Tas d ad tennuffared, tas d ad textutred…

Arezzun ad asen yescen Twafit n Tnufra nnes, maca netta yesqar yesnuffar awar deg Ires nnes.

Netta tugha yessen Tinufra d Tirart n imezyanen xmi gha yemghar ad tt yessermed i Tarwa nnes. Aked sen i tt yirar.

Tinufra Tidet tedwer, tarezzu xas Tudart nnes, Tinufra zi Tarwa n Dcar nnes, d Dcar nnes,

Tinufra x Uzredv izedghen Ussan nnes,

Tinufra ura zi Tenni yexs wur nnes, umi yucar wenneghni Amcan deg urar n Turja nnes.

Tinufra ura zi mindi yetxarres Tiqacqact nnes, war izammar ad yeffegh zeg Ixef nnes.

Tinufra temghar d anawer, zeg Imucan i tugha yedjan nnes, d Iwdan i tugha aked munen idammen nnes, ura aked tenni aked yebda Ur nnes.

Tinufra tedwer d Aseqsi umi war yufi Twarit, deg Ussan Imarzuga ihewsen Tudart nness, yerezzu ad yennufser zi Tiwecca d Imal yeqqiem deg ijjen n Was marra Tudert nnes tirar day s aked yexf nnes.

Anawer zi Tmurt yemexsen Tarwa nnes, zeg Iwdan nnes idwren d Midden.

Anawer zeg Ires iyettun Aqemum nnes, umi ksen Awar nnes.

Anawer zeg Midden i hewsen Tammurt nnes. Yejja s Tamurt ad ays yezzvu min war yedjin nnes.

Netta yerezzu ad yekkes Izvuwran, itqnen ghar Ixef nnes, maca rebda yetghima day s cwayt zi Refwah n Ucar n Tmurt nnes. Yerezzu ad yendvar Ixf nnes di Tudart n Midden ad yedwer d Amezruy xef war yessiwer ura d ijjen.

D wa d Arifi yeggin Tawra i Tammurt nnes, d wa iyeggin Anawer i Tmaggit nnes, d wa umi urant marra Nkawi s Yirsawen n Midden, xmi d Aydud iyettu wakuc n Tira.

Yura xaf s

Ad yemmet deg Warrud n Midden ad xaf s gharen s Wawal n Midden, ad yendver deg Ucar nigh deg Waman Midden ….

Amnuffar yetseqsa Ixef nnes, x mermi Unawer ghar Tidet nnes, x mermi ghar yekkes Afray x Tudart nnes.