Tanfust  taqudvadvt:

Tugha yarezzu x tamagit nnes day m!

Yura t: Said Belgharbi

Awardi: I marra yenni day i icarpen anict uyenni.

Temghar war tettu tifras n  temzvi yarcan, axbac day s d rfadj deg meddur n bnadem, zzay s i yetmudjugh ghar tudart yettun ixf  nnes deg ixf nnes.

Tisira qqarsvent, inarzawen nedben s tazriwin x iquboen,  arrimet tessawar s tiggaz n imarizen s tghubar  d uhrudjedv  x tsedjyawin n dcar.  Twangit tstextux s wadaf ghar waduf n tenfas i yeqnen ghar Hemmu d tehraymect nnes d Tamzva d umuzzar nnes  d Yensi d tighit nnes... d  utebpet zi tziri  i tugha d anegh  d idvaffaren s tghennant nnes am tiri  ghar imucan n yidves nnegh....

* * * * * * * * * *

Di dcar n Rkebdani* axmi i d tnuju  tefsut tesseka d  rimret d areqqasv i ysvuraf  nnes yurmen s tecri n tcuni.

Tirewziyyin  yardvent  rizar d acemrar irehhef s wazvri i wudem nsent, axmi i sewjjadent ixf nsent d ttinarzaf ghar tameghra n tefsut  i twamercen iked  idurar n arrif.

Mermi mma isvudv d wadvu s arbu nnes areqqegh, itirar asent deg hesyan, issenxuxur i tent, i ssefruruy  alellec nsent x ucar am wedfer  yessu tiri n tseklutin.

Nnan as i whenjar nni di temzvi nnes: "Deg ulellec i di tceyyadvent ura d tihenjirin, dehhant am tehjijjatin di refsaset nsent, tareq day sent tmessi am tarjin yardven rehmu di tmejmarin  nsent".

Umi yemghar i yessenta yessen mayemmi tugha i taf tihenjirin tmughzvurent iked yaryazen n dcar, tmarraghent  ixf  nsent  senejj  i  tuccemretc d itudumen zi tseklutin n trewziyyin.

* * * * * * * * * *

Tezoef  icten zzay sent deg yimez ufus nnes, tenna s:

-Ad cek  ccegh mara tennid ihed aqqa tezvrid  ayi  d  anitati.

Yeggêd, icaref  timezvra nni di  dixar  nnes. Yezvri t iked wenni, yessusf iten d uzir  d azughmet n tazvyudvi x ijartar n ulellec, yezvri t tegga afray s tittvawin nnes i wmesruq nni mani tennufar huma war ten twirin   midden, issenta yesrufa day s s ifassen imin txemmer arrimet nnes, yarezzu x tmagit azzay s yarem aweddvar nnes, yudef ghar  min yeffar n  jar ca  n  tedmarin tudument s tazyudvi,  d ca n  tsedjawin yetsvudven s tmessi n temzvi di termect n tenni, i tmudjugh din s yires nnes am weghrar i thrudjudven x taxfiwin n tefray, yennugh day sen wawar deg anegh, yudar ghar s, yessudem day s awar s wesqar, isseqsa t, yenna s:

- Nec mmutegh, i cem matta  cem?

Tarr d,  tenna s:

- Nec  fesyegh, isi d fuss nnec smun ayi.

Zi twarat ghar tenneghnit ad yames ancucen nnes i tirit n tenni i tnezwadven ttazrent  jar  ifassen nnes, trah ttas d. Ttadef teffegh zeg ixf nnes,  tneddu  deg wehsin n wenni, teqdiddis am tejdvit nni umi ttawi tamennawt  tefdutc n reorasvi. 

Isekf it d asekkif, tennezvwedv axmi teswa jeghdid, tessiwer d taycit nsen d ighuyyan n ugenfi, yexsi ubarejju n tmessi i tugha day sen yejjoen, razv yejjiwen  riraret deg  ixf  nsen. Tekkar  tezzerz abehrur nnes s min day s d imunen n tiggwdi  zi tittvawin nni timezyanen tugha day sen i yarekwsen rxezaret zeg umezwaru arami d  ameggaru.

Yesmun it id ghar s, mdaruoen i waywya nsen, yeqqen as safes s uqemmum i tancucin nnes s ij n usvudvem  n wemsafadv, ixemr iten  uweddvar deg  raq nnes i zedghen jar ioerbab n taggant  n djewz,  uyaren jjin deg  wemcan  nsen  iceqfan  n  tizedv  mdewwacen.

Di temghar nnes mermi mma iruh d annuji ghar uraq nni  itaf din  oad rimart n wass nni i teffar tudart jar tighrasvin n twangit nnes.

Temzvi d ttamzva tsvarredv marra  min tezvra,  maca din tighawsiwin tagint ad gheryent, tghimant ddarent, mermi mma yudef bnadem ghar uraq n yehwicen nnes ad ipparwedv nbra ma ad yaca marra tibehhar d imessuciten  n  izupran  d  tighit  nni  di nhnunnedv  marra temzvi nnegh.

   * Rkebdani d ijj n dcar yused di arrif  yudjghen.

 (Said Belgharbi, Amazigh31@hotmail.com)