Tawiza

Xminni nxzzar ghar tutlayt nngh assa ntwala tt dg ijn waddad d anmmaru (iqsh) attvas. Azyn amqqran n Imazighn ur tt qqarn ur tt ttarin. Azyn amqqran n Imazighn ur ssinen ad arin ict twinst d Tamazight s uskkil Alatin nigh s Tifinagh. Azyn amqqarn n Imazighn ur ttggn walu ad tt lmdn.

Arni d xaf s tasrtit tunsvibt n iwunak n Umerruk d Dzayr mgal i Tmazight. Tammara n Tmazight tmrni, tmqqar ujar.

Asutr (asqsi) n yimal n Tmazight d ijn usutr d anmmaru (iqssh) attvas. Tutlayt Tamazight ad tmghar nigh a tmzvi? Iwdan i tt issawaln ad mmrnin nigh ad nnusrun, ad mzvyn?

Ntwala aslmd n Tmazight di Umrruuk ur ighuda ca (ur illi ca mlih). Drus inlmadn ssnen ad gharvn cwayt n Tmazight s uskkil n Tifinagh. Drus islmadn n Tmazight i yllan. Drus n idlisn i yllan. Drus i yllan zg akk!

Mamc gha tili ca n tutlayt dg ijn waddad icna ighuda malla tsul ur ttwassn zg ayt bab nns?! Malla ur ssinen ad tt arin! Malla ur xsn ad tt lmdn nican! Malla ur ghar sn illi wakud ad tt lmdn, ad zzay s arin, ad zzay s xarrvsn!

Ursar (ommars) ad tili Tmazight di taflast (di laman) malla nqqim ur tt ntari.

Malla sighin Imazighn ammu ttarin s Taorabt d Tfransist, ursar (ommars) ad tdwl Tmazight d tutlayt n tira d tussna d uslmd. Ad tqqim alidv (lbda) d tutlayt ttrun xaf s Imazighn s tutlayin nndvni!

Ad tqqim alidv (lbda) d tutlayt tlla ur tlli!

Zi ssa ar 2050!

Mamc gha tili Tmazight zi ssa ar 2050?

Xminni ntannay (nxzzar) ghar imzdagh Imazighn n Umrrvuk, ntaf itn ujarn 34 mlyun di 2010. Dg uzyn amqqran nnsn ur ssinen ad arin s Tmazight.

Mnnaw (mchal) zzay sn i ytarin s Tmazight? 1% ... 2%?

Mnnaw zzay sn i yssnen askkil n Tifinagh? 0,5% … 1%?

Malla nsighi ammu ar 2050, mani gha tili Tmazight? S adu tmurt nigh s nnj nns? Tddar nigh tmmut?

Zmmarn ad din ilin 3 n waddadn n yimal n Tmazight:

Addad 1: Tutlayt Tamazight di 2050 ad tili tdwl attvas ghar dffar. Ad din ilin drus n iwdan i tt gha issiwln. Azyn amqqran nnsn d iwssura. Tamazight ad tili d tutlayt n izlan izaykutn wapa. Ur tt qqarvn inlmadn dg ighrbazn. Ihnjirn (arbatn) Imazighn di 2050 ad ilin marra ssawaln Taorabt nigh Tafransist jar asn di taddart d tinml (aghrbaz). Tamazight ad tili d tutlayt n iwssura n twacunt nnsn am hennat sn nigh babat sn amghar.

Addad 2: Tutlayt Tamazight di 2050 ad tqqim amc tlla rxxu (ghilad). Ur tmqqar ur tmzzvi. Imghnas ad qqimn sghuyyun, maca addad n Tmazight ur inffl (ur itbddil) attvas.

Addad 3: Tutlayt Tamazight di 2050 ad tili tmghar, tdwl d ict tutlayt d tanzvmayt (taxatart) dg Umrruk d Dzayr d umadval. Ad tili d tutlayt n tussna, d uslmd, d tdamsa, d internet, d tazvurvi. Imazighn ad ilin ssnen tutlayt nnsn attvas. Ad ilin ttarin Tmazight s uskkil Alatin nigh s wnn n Tifinagh nigh s sin idsn. Tamazight ad tili d tutlayt tunsvibt n uwank d tedblt. Ad din ilin attvas n idlisn iliktrunen, d isura (ifilmn), d ifarsn nndvni n tzvurvi. Arbatn (ihnjirn) ad ilin ssawaln Tmazight dg ighrbazn ak islmadn nsn, ad ilin ttmsawaln s Tmazight, ttirarn zzay s jar asn.

Ad tili Tmazight ssawaln tt akk (marra) Imazighn jar asn di marra timnadvin n Tamazgha.

Maca manaya ur itili ghas malla dwln Imazighn ttarin attvas s tutlayt nnsn.

Imal n tutlayt nngh illa dg ifassn nngh!

Imal n tutlayt Tamazight d nccin i t gha issunghn, d nccin i t gha yarin. Mchal ma nura s Tmazight, ad tdws (ad tjpd) Tmazight ujar, ad tmghar, ad tiriw, ad tt ssnen iwdan dg ijmmadvn n umadval.

Tamazight nngh nzmmar ad zzay s nini akk (marra) min nxs, akk min ntxarrvs d min ntxmmam. Tutlayt nngh tzmmar ad tili d tutlayt n tussna d tskla rxxu (ghilad) maci tiwcca (azkka)!

Akud n tarvwla yzri!

Wnn i ghar illa ca ad t yini, ad t yari s Tmazight!

Tira Tira Tira!