ayat tenqsist ayad yugren kullu tallasin

ayat tmnint ayad iggut mafellas nnan

tega tanqsist nufad miden xart itinin

zrin isggasen d izmaz tasut tecca tayyad

tizi lligh asawlen iberghusen asawen tinigh

tallast tega ghemkad ixef inu yura tent

a tizi dagh tent ur igh ka dawen ukan nnigh

amamenka rant afelli gunt tilli qamanin

nesfeld ad sent s umezzugh dar willi tininin

tinqsisin d tallasin d ummayen sugrnin

pa dmint pa timnint tasekla tella nit

tusna tin tmazight tasgmi taderfiyt

ukan inma n wurrid namez agharas ukan

tanqsist nura t s zerb aghnnib iwalat

tega tin yat tefruxt izvilen ufent ak ayyur

as lequdera nek aylahi d ayakkan ikkis

afulki id bab nes ikkist i wiyyad

ured azzar xar afud d izula sufunin

ured tawenza ured tiddi ured awal ihennan

ured tamawt ured taghlalt ured ticaf ukan

ured awugma tamadalt ured alen sufanin

tufussan zund azenzar n tafukt ihurran

tega tafssut n umadal ajddig iferh

tifiras tin tzerzit n nequrt ihurran

lluban agnaw ad uglent tazera tsul ukan

aduku zund yan gh waida s tennit ikkatin

gan uqciren negaddan rewasenk ayakal

ili yan leftel gh udvadv nes rewasen ak aman

ured aklulu illa gis izri irzat ukan

ula tazult tsengadda ays kullu tamawin

tili tazult tasaggant gh walen sufunin

igh ka turem tawada s aytessa wakal

ad itger s wawal tzug agdid ar itirir

tega tufussan tattabirt ikmlen ayyur

a belhaq han isak tazum ikmel was nes

iferk as unili d uhrac ighitent.