Tawiza

Rami d usigh twarat tamezwarut ghar Uliman, ttvfegh d abrid n ujenna -ttayara tameghrabect. Marra wid kidi i d inyen zi rmas n uoarwi d imazighen ssawaren tmazight d talimant. Tugha nssawar marra yitnegh s tmazight aked rwacun d wi yidjan nnegh. Inni i d anegh d isqbdven aked umsafadv nnegh nuri ghar usafag -ttayara– i idvwin deg ujenna.

Uca ssentan ssawaren akid negh ghar taoraft d tafransist. Tuss d ghari tahenjirt nni i d itawyen macca d tsessit i yiwdan iyellan deg usafag tnna yi s taoraft min gha tacced.

Nnigh as nec war fepmegh bu taoraft, ssawaregh mghar tmazight. Tedvsva, tenna yi s taoraft: meskin war tessined taoraft... Indeq d ijjen tugha yeqqim zzati isfarnen issiwer s ict n taoraft tarrezv marra aked tahenjirt nni. Yenna yi s tmazight min gha tecced -asahbit- ma war tessined taoraft, war tekkid bu sekwila nigh. Nnigh as i thenjirt nni uzzugh wenni ittvawen, uca ssentigh ssarayegh ssadvaregh ifassen inu deg ujenna am wafriwen n uyazidv xmi itexs ad idvu.

...Uca tenna yi s taoraft: axyar tarzzud ad tacced yazidv. Rami saligh macca inu ssentigh qqaregh ij n ughemis s taoraft i d iwyegh zi Nnadvur. Ixzvar dayi utarras nni iqqimen zzati, yarzvem dayi aqmmum: iwa baz i cek tesned ad tghared taoraft, cek tmardvned xaf negh. Nnigh as i wawar nnegh n tmazight ma war ghar s bu wemcan deg ujenna , maghar war ssiwiren ra s tmazight deg usafag, mayemmi aseoqar n tmazight di tmurt d ujenna.

Tamesract a taxatart s wattvas, war d as d narri bu taynit neccin imughrabiyyen -imazighen- itaddvaren da deg Euruppa-aliman. Itxissva war ten tejji ad teodu, war x afs itiri bu wawar, war d as neqqar: heyyed x ugayyu inu tceqfed.

Tasertit a n wesoarreb itwaggen di ttiyara tameghrabect, ssawaren mghar tutlayt n taoraft d tefransist, war d ttaran bu taynit i yinni yinyin di –ttiyara- marra ssawaren tmazight nigh talimant. Manaya d ij uhecci, d ij n umardven, d ij ubusvar x imazighen, war d asen ucin bu wazal ra di tmurt ura deg ujenna. Maca arbbun asen txancet xminni srusan d xminni d ssekkan igurwa d tinoacin ghar Rbankawat n lmughrib iccuren ar znafar s wagra n imazighen ittamara,n issahraden deg wabar icqan. Ixnni imassayen di lmughrib qqaren maghar war d ttisen ihudriyyen ghar tmurt nsen ad ssaran Lmughrib... Attvas n ihudriyyen i da iruren qqaren maghar war ssiwiren bu tmazight nigh talimant di -ttiyara- deg ugharrabu... d ddiwana, maghar war danegh d ttawyen bu wenni i gha iturejmen, i gha d issiwlen ghar wawar nnegh, d wattvas n iseqsan itmarsan???

Ghar unggar ij nwawar d aqudvadv i ymassayen n R-A-M (imassayen n ttayara tameghrabect): mermi ghar tarzvmem imezzughen nwem, ad tesrem ghar min neqqar?

Tudart , tcuni, tayri, tadimuqratit i tamazight di tmurt n tamazgha.

(Hassan Ahfid ,ass n 2-08-2004 (2954)- Aliman)