Azeghri ghar wawren n Tmurt

Yura t: Mimun AMSBRID (Biljika)

 

D tiyarziwin di Tmurt Tabarcant*

Tamurt n wuzzar d arrij d wseynu,

Tamurt n tattut d useghdi…

 

D tameddit...

Anzvar yeccat di barra,

Nec deg wxxam, tawwurt teqqen xafi,

Tsudvegh x wawren_

Awaren inu i yxessyen.

 

Ssdvawegh xafsen ighghed,

Turrigh daysen timessi,

Teksegh ten i tesmedv…

Huma ad gharsen zzghregh.

 

Sudv ma ad tessudvedv!

Sudv x tirjin n wawren_

Awaren yetghufan adu tsatarin n yighghed.

 

Sudv!

Sihma ten!

Snekker daysen timessi!

Svreghiten!

Sihma zaysen arrimet ad i yjarsen_

Arrimet nnec i ycettven x wussan d yebriden.

 

Sbaryen as!

Weqqeh it!

Atagh ad teddar_

Atagh ad tssiwer.

*****

Udrusen wawren,

Yedjent usudvi inu,

Zzugartent tyarziwin_

Maca…ad ssudvegh!

 

Ad ssudvegh ass ad,

Ad ssudvegh tiwecca,

Huma yedvwa yighghed x wawren n yemma.

Ad tekkar tmessi,

Ad aryen ihudaq,

Ad wcen i wjenna.

Ad aghen tesmedv ad i yzedghen deg ixsan.

 

Timessit ad tarvegh,

Ad tecc ixemrawen.

Ad tekkar di taffiwin

D icuman n wawaren_

Awaren i war yettidven zi tmazzayt n idemrawen.

Awaren i war yewtin izvewran nsen deg wcar:

Awaren nni yarcan,

Awaren nni ineqqen.

* Tamurt nni i di zeddghegh tinin as ayt bab nnes "Le Pays Noir" (Tamurt Tabarcant).

(Mimun AMSBRID)