Tawiza

Anzvar war yedji ca. Tafuct deg ussan a ttagi ad tari, tghima awarni arragub, axmi tssedha. Ma d nettat i gh ad yekkaren tezdegh deg wjenna wapa nigh...?. Aydud tugha itettar mghar anzvar, rexxu idwer issutara ura d tafuct!.

-Nuhher di tutra n wenzvar ar ami i teddiq tafuct, i nnan ca n iwdan umi tuzegh tamijja s usutar.

-Tudart nnegh rebda tuyer ghar ujenna, maghar war narezzu di tammûrt ad nettu aswadv ghar ujenna ar ami i d anegh yarrvez ura d iri?. I d asen yenna Mmuh Manku.

''Manku'', ammu i dewren traghan as i Mmuh n Bezzah zeg ûmi idjef i tutra n wenzvar, zeg ûmi ijjudj i ma ad ixzvar ghar ujenna senni d usawen, zeg ûmi issnen belli ijj n ufus zeg ifassen n uqubbu war dji d afus nnes.

Manku ipekkû mkur ass ghar ubilaj i tugha yedjan d ''lqecla'' n Usebbanyu. Din, deg ijj n texxant i di tugha tmunen imcarben isebbunya, i ydwren rexxu ura d nettat d rqepwa n ubilaj, din wapa i ytghima wehd s zzat i ijj n rkas n lhayati i yeccûren s rqepwa tabarcant. Arrihet n rkif i d itefghen ze cqufat ireqqaghen i yarsin x timuwwa n sbasa, ccum n jwanat i tessefsay timessi x tireqqa n ifassen, araghi azdad n uhenjar i yeznuzan bibba (pippa), djgharegh i d iteffghen uzghen zi timejwin n ihcayciyyen, d zzga d tikkwra n uqamarriru.. Ghar marra manaya i d itass Manku zi dcar nnes amen itemraywa, d manaya i dt itejjan yarexxu i tmughri ad tdvu s uswingem nnes ghar imucan i itwara war izvri. Netta war itkiyyif war idji d ahcayci. Nigh ad nini netta itkeyyaf s tinzar wapa, war izedji jwan war itseqqidv ssebsi. Rqepwa nni teccûr s tayyut n ukeyyef, ad tinid rexxu rexmin ad iwwet unzvar. S uyenni min din d ahcayci war itettar anzvar. Mayemmi i dt gh ad ttaren mara nitni rebda xaf sen tayyut!. Uca ad ten twarid mghar smunan array nsen x min zi i gh ad yarren x iseqsiten n iwdan ibesren.

-Min d anegh iruhen di min war idjin deg wfus nnegh, min ggin inni yekkaren uyren mummu ghar ujenna? beoda neccin n tegg aseynu ad tagh ad idwer d azvar amec id anegh nnan di temziyda.

Deg ijj n ujedjab d abarcan umi iriwen rejbub i di inettver Manku ixf nnes uca iri isapa ad yarewweh ghar taddart zegga iri tadjest tessuyes tubbarcent x min itwasewdven d rxezrat d min itwannan d awaren . ''Seddam icuq Lkawit... marra regnus moarwanent x Lpiraq'' ... ''Israil oad aqqa t tneqq deg Ifilistviniyyen..''... '' anzvar oad yugi ad iwwet da...''. Manku inwa di tungit nnes marra min isra d awaren uca yarra rqeb n ujedjab x uzedjif nnes ad tagh war d as isdviw usemmidv akiyyef n jwan d wenni n rkif i ycemm war ikiyyef. Anict i din bulsen irumiyyen di lqecla nni i yedvhan d abilaj i din keyfen rexxu d rkif. Abilaj n wawar d ukeyyef d uqrao n mummu. Manku ghar s ijj n ufus, wi issnen amenni id irur ura imsar as ca. Ura d ijjen war d as izvri afus ma iqessv zi teghrudvt nigh zi teghamrt n ughir?. S uyenni i yekkar yard qubbu, mahend ura d ijjenn war itessen. Maca ca n ijjen inna di dcar aqa izvri dt rami yekkes qubbu awarni tahendect uca banen as d idvewdvan d imezzvyanen uyren ghar teghmart n ughir nnes. «Mri ghar s idvewdvan iri ismun iten ghar inni n ufus nniden uca iri yisi urvu ghar ujena mahend ad yettar anzvar amec i d as tenna yemma s». Ammu i d xaf s yarra ijjen nnidven.

Anzvar walu, tafuct walu, afus walu, min gh ad yexdem wa?.

«Ruh ttar anzvar ura teqqimed di taddart» i d as d toawed yemma s. Nnan as inni yugin, am netta ad ttaren anzvar, zid akid negh tettared tamennawt i Wmarikan icuqqen Loiraq i icuqqen ura d netta Lkawit. Kkin d xaf s ihudriyyen n dcar nnan as sutar akid negh ad narna di rurat n tcamma. Usind ghar s ca n iwdan i war izvri oemmars nnan as ttar akid negh ad dduqzven udayen. Yuss d Rhaj Largu inna s ttar akid i ad as nghegh ddubli ssis deg wfus i Heddu n usarxentu... Traytmass rami i dt tufa yeqqim deg ûzzray tettar zzay s akid s ittar war ttezguttuy ayenni n tyazvidvt i ghar s...

Maca netta tugha ijjudj i ma ad yisi tittvawin nnes ghar ujenna, tugha ijjudj ma ad ittar ca n min war izemmar ad yegg s ufus nnes. Tutra ayenni i ypewnen, s uyenni marra tettar war yrdji am timegga, s uyenni udrusen inni i yteggen.

''Loiraq...'' ''xzvar ghar win min itegg...'' ''Seddvam n...'' ''zrid ij n jw...'' ''Lkwit...'' ''irar tcamma tesqared...'' ''gharnegh tzawa, razagh, xzvar nghigh as ddubli ssis deg wfus...'' i nec mayemmi! . . . . . . . . nec mghar d Manku.

-Jen ad tejnid di tmessi...

-Kkar ad rahed ad xedmed a yekkar ac yirem...

Issij zi rqeb id xaf s yarra zzat ma ad xaf s yekk yidves, isbarquqqey tittvawin, ihdva yemma s ma tffegh ma oad.

-Mri i d tefghent tutra inu iri mermi i d arrigh afus inu...

Ammu i yenna Manku oad i yeswa tuddimt taneggarut n reqpwa tabarcant i d as yeqqimen di rkas n lahayati.

Med BUZEGGU