Nustaljya^1∗

Yura t: Said BELGHARBI

Isareh idvarn nns xf tjartitc, ikkes d aghbar²; yarzvem asafes i txubay n ighanimen, tiri n usqif tmuttuy; netta irehhem akids, huma war t teccit tfuct dg uzllif; ad as tawi aynni n jjuret n uxarrsv i zi ixs ad issen min war issin, tifray jar ifassen nns qtvutvsvnet s wattvasv n uhadi d udvfas, innuhmez; iragha xf tmettvudvt nns ghar ujemmadvin n usqif:

- Awi d akidm tismuqqal³ inu, aqqa yent uylent ghar ujij n texxamt n yidvesv.

S lebput teffegh d Traytmas tfarren ticri n isvuraf nns; tesoa tiggaz n wazli xf tenyart nns mani temraywan imgharvsven n tsebnit i teqqen xf lmepdvur nns, teqqim zzat i Zeghdud; tenna as s wawal i di isdel uzawar:

- Teksid tamghrvusvt nni n tifrt⁴, gwar ad teqtvutvesv jar ifassen nnc, siggwaj xafk tarja nni, arr taynit; aqqa raxart ttarem xaf ngh tifit⁵; ck texsd ad tarred min immuten.

Isvwedv days s tismuqqal nni; issusem; dg usqar nns axmi ixs ad yini:

- Ura d neccin ghar negh tasghart di tudart, lekfen war illi d arudv inu wapa, marrva midden ad tarsn xf ilmawen nsn, raxart war telli tessen ansa⁶ n Zeghdud wapa!.

Traytmas ikd waryaz nns qqimen assa dg ammas n tawja⁷ am igujilen, d wa d azref n tudart, lwacun itemsebdva, ijjn war itghimi ikd unnidven.

Zegga t yucar ususem ghar uraq nns, idwel d ghar ixf nns, inna as i Traytmas:

- A wap, zzat ma ad immet tugha itezzu t marrva d yarden, axmi nni d itawedv i razagh itghul⁸ iyyar ireqq axmi d isseghmi iyemmumen n tfawin; tugha itissiq am waregh jar tittvawin nngh neccin timehtac, min ck yughin, manawya idvennadvt oad!!…

- Amcum nni n lqayed inna ayi ira tifrt nni war ck ttiwi ghar ca, war days bu uzwel n jeddec, maca days ansa⁹ n usayes, dg akud nni tugha war tzemmimen ameddur n ayt bab n tmurt. Cm war twirid yan iddar; issen jeddi; ad kid ngh ibedd; “Toinict” nettat ghar yiri tessen!?.

Tesfartq¹⁰ Traytmas s min teoram n tumart¹¹, ar mani d issijjen t aynni n taghmuzin i das itghiman dg uqemmum, tewta s tubudvin itwaxemren zi temzvi nns xf uorur n Zeghdud, tnna as:

- Igga ac arebbi rebyadv ahnini inu, tenghid ayi annoiyya, tugha itghir ayi assa tarwer zzayi tadvsa¹², “Toinict” war tessin ixf nns ad tessen tidegwanin n jeddec i ccint tkeccawin wapli.

- Maghar min tt yughin?

- Zegga tmmexs mmis, teks it ghars illis ad tesyem tewsar nns, days rattvan n tattut, yarwer zzays uxarresv war tessin azellif zg idvaren nns.

Zeghdud dg ul nns tisegnit¹³, s unezgum idewl war issin ixf nns mani oad imezdagh n dcar, tarwa nns s iwetman d tutmin iswi¹⁴ nsn ad ittu iyyar nni, uxf icca tizemmar nns, ssnen ira min itg amnni war t issufugh ghar ca, unni itmenghan ikd udrar min zzays ghar yawi, rmxzn oemmars ad tyarna yan!.

Innufser d uxarresv zi twangimt n Zeghdud am unpam n wassam, itnedraf zzays wawal, inedder zzays ghar uweddar n uswingem nns… itaghed aghemmuy n umnus nns d refrug n iwalen d icetcan umi yarezzu tiwafitin.

Tidet n tarezzimin¹⁵ nns trabaoent d adaf d ufugh s ticedvyin n waregh zg ul nns ghar ul n iyyar uxf icca bunarjuf.

Aswingem n Zeghdud iqqim d ayujir jar ixemmimen, jar ixfawen t ikesin d aseqsi:

- Mayemmi ghar neddar ammu am uzalim¹⁶ war n sekwi walu?

Iqqim uswingem nni itmuttuy ssa d ssipa, itennedv xf uzellif nns; am ict n tfaredjset tehrara mani ghar tesdel asartu nns, tesmuqqel days Traytmas tenna as d nettat tesitim ad tessen min itemxtwayen n ixemmimen dg ugayyu¹⁷ n waryaz nns:

- Ma trid ca n ughellay n reqpwa?

- Babac waxxa tugha itexs tamurt nns maca tugha issen ira tudart d taqudvadvt! pa rxxu immut ijji t marrva awarn as.

War ixes ad xafs yar, itaf awar nns imsarwas, war izemmar ad tt id yar ghar ubrid nns, isvwedv ghar arvadvyu, issuyar areqqas ghar isallen¹⁸ imaynuten:

(Mass Lberdaoi issigwed tamcumt nni n Iran, inna as mara war xafm teksed zvmar nni n luranyum ghar tzubayt, ad zzaym d ndaregh zzekt!... Lqeddafi aselway n Libya ihennedv iselpamen nns, inna asn dg usqamu¹⁹ n tmunt n uoraben: aqqa tekkim angh dg imezzughen, teprim angh s ca war illi, dvfaret ayi nc, ghari adellis azegza days asafar²⁰ n marrva timukrisin n umadval… Mass “Omar n Musa” ixeyyeq zg umeddur n udayen, iwta xf tadabut²¹ n usqamu n tmunt n waoraben, ittar zzaysn ad munen ad ggen afuss dg ufuss ad kidsen qdvoen tighuni).

Traytmas tufa war tecni i yan nnoiya, tettar zzays ad ismutti areqqas ghar tmurt n Pulanda, texs ad tessen mmis min di illa, attvasv war d isseqsi.

- Arvadvyuya itettvef d mghar Arvbatv d Dzayar, cm zzaym asekki n idrimen war illi d amnus n Muhend nnem, twarid ayura iodver xafm remqddem war d yiwi lmanda!.

Muhend issekka d aynni n tcemmust n iqarvidven i ymawlan²² nns di mkur ixf n uyur, twara ta iodver war d isseqsi, ad yiri tuss d tebrat teqqim ghar umcum nni n lemqddem n dcar, dima itggi t; war ibettvi tibratin n imezdagh huma iseki tent xf refqip n temzida ad tent ighar.

Umi d aqubbani war issin ad ifsi isekkiln d ihennicen n tira min xafs icedden tawuri ghar rmexzen! maca itoini rmexzen d ta d tasertit²³ nns itexs inni war ighrin.

Idwel refqip issen marrva umi d sqadan tarwa nsn, axmi d tadef n ghar temzida, ad twarid mghar issawal s timitar²⁴, itawi itarra dg wawal: (maolik war telli d Julyana tiri ingha baba twm bupyyuf; tegga awm ijeyman n isemghan ad xafsn teddzm arri, iwa unni umi war d ttaoni Julyana tejjim t ad issisen ireqwaz n lazv di tzvewdviwin n leodes)…

Yudes refqip ghar usqamu n imezdagh, mani tugha i temsawalen jar asn xf tghawsiwin n dcar d umadval d imenghan di tmazirt n Loiraq ikd Umarikan, wami nfararen, inna asn refqip:

- Marrva min teqqarem jar awm war d angh icqi di ca, nc ghari ijj n uneghmis d amaynu.

Issiwel d Zeghdud jar imesghimiten, yarra inna as:

- Iwa d ck iffghen a Mmuh; iymiren²⁵ nnc d ssuq!!

- Nc rexxu usaregh; udem inu tecci t tcuri, tittvawin xesyent, ticri inu tudven, di temzvi inu tugha ccarq war xafs teggegh, arrigh t yudes am ragwaj n uxxam inu ghar temzida.

- Iqqim dayk mghar ils iteqqes am jeghdid²⁶ n uzlem²⁷!

Ssiwlen d ayt bab n temzida, ttaren zi refqip ad asn yini aneghmis nni ixsen ad awdven.

- Iyyar n tidrin ufin days wargh, arezzun di radas d yusin ad qqazen akal nns!.

Ikkar usafu²⁸ n tmessi dg ul n Zeghdud, mri das nnan Muhend nnc immut iri yus as d uneghmis axmi d walu, nigh mri ittvesv ikkar d ghar tuffut yufa tittvawin nns ddareghrent ura mri isra awal nni amarzag, ikkar yuyar; iffegh zi tewwart n temzida am ufugh n texfift zi tqemmumt n mawsa, ioref iggur iteghzvazv tighmest, azellif nns itaca akids yargha am tixfet n zvalamitv, ifsi arezzet i tugha innedv; indarit xf teghrudvt, mri yufa iri ismurdves zzays marrva inni umi inna ixf nsn ad adfen affray n tmurt nns s nebla aseqsi d usnuwji.

Imezdagh n dcar marrva ssnen tamacaput n Zeghdud, maca war twilin lehmala²⁹ nni dinni dg wul i tmurt nns.

Imutti uneghmis n iyyar jar ilsawen n imezdagh, am wudvuf n tmessi dg umettvar i yufin razagh dg ammas n unedvrar.

*****

Anessis n usutar issenta ad yudum, asfarnen isdel xf udmawen nsn, amezruy n iyyar n tidrin mechal d isseghmi n tzizawin³⁰; rexxu ad issfuffi s imal n waregh, ssutaren ad ajjwen iqebbuzn d tixuncay n idrimen, awtem d tawtemt; mkur ijjn d tarja nns, arezzun ad fghen zg ixemrawen n lazv nsn.

Ikcem Zeghdud ghar uxxam istextux; itnenna am zzekt xf ubarejju³¹ n tmessi; ithennadv taghghayt nns zelmedv d iffus; itmengha, itekwar daysn:

- Tarwa n teydit… wellap ya babatsen i ma ad ten jjegh ad dinni uyaren asvurif ayujir, wellap huma qazegh dinni imedvran nsn, i tarwa n tajjalt…

- Min ck yughin, d min ck isxeyqen?

- Uffin days waregh; itghir am mayemmi xafs tghughuden amenni, maca waregh n tidet d idammen nsn i dinni ghar ssizlegh s ifassn inu!!.

- Sqqar a hnini inu, min ghar tegged amnni, war tzemmared ad tisid ura d ifadden nnc oad ad tawyed tamennawt i rmexzen, tamellalt rexxu tarza c jar ifassen!.

Igga afuss xf ul nns, ihuf ghar tisi n usqif, tuzzer d ghars Traytmas, tuyem d ict n turutv n waman zg uqbuc, tbeqqedv zzays udem nns, maca deghya isseghri tallin³² nns, yugi ad innuhmez, ura ad yar xf iseqsiten n min tid icqan.

Ict n tghuyyit i tegga, war texs ad twara aryaz nns s taqsuhi d tirugza³³ nns zi itwassen; rxxu ad idwl am usymi jar ifassen nns.

Udfen d xafs, ufin tegga s afuss ghar ul, txezzar ma ireddu am urtax n umezwar, teksi d afuss tarri t ghar tinzar txezzar iman nns ma iddar.

Issenta dcar itissiq di tittvawin n imezdagh, dg imal nsn, marrva zvwan ghar iyyar n tidrin, izvra nns mdvareyyacen ssa d ssipa, axmi nni tugha tn ithada yan, yarzzu ma war itif jar asn xf ca n uzvru n waregh ad zzays issenta takessit.

Rfqip ura d netta ikesi ijj n usirem dg ugensu³⁴ nns, asutar nns d anaruz³⁵ ad nnurezvment tiwwura i dcar, ad itwassen zegga tugha itwattu, ad teqqnen ghar isenfaren³⁶ n tanukra...

Tarja n refqip teffulki, ad texsen marrva inni ghar yuza uraji, mghar Zeghdud mri ghars tizemmar uca isra ghars iri yuri d akids s teghghayt ghar ijiyman, maca walu tiseqdar.

Amenghi n Umarikan ikd Loiraq aqqa war das yarri yan taynit, Amarikan d amcum issen maymmi itmengha, yarezzu ad yarna huma ad yayem anuten n waregh abarcan, “Sveddam” ura d ntta d amcum days tighennanin, war tyjji ad yayem mammec ixs, akuc axmi nni itaf iselwayen³⁷ n tmizar ggin accawen, uca iccat amcum s umcum, ar tarennawt³⁸, amenghi sennej i tmurt war itenfirir.

Waregh d unni d aluf³⁹ n imenghana, marrva timura di illa wagra daysnt imcubbac, tinni di war illi ca twattunt. Amenghi di dcar issenta ikd Zeghdud d rmexzen.

Zegga d iwdva yudven, issijj d xafs remqeddem, yufi t immarni xafs rattvan, itemqetmar ad yini; maca itmetta days wawar jar wancucen zzat ma d irur d amenghi.

Isvwedv days remqeddem s rxezrat n uzillez, inna as:

- Muhend nnc issek ac d lmanda, ttar akids s tcuni.

Tettvfi t Traytmas, tedvfs rcighed nns, tudef ghar jaj⁴⁰ n uxxam txemr it jar icemsan, Zeghdud itirar s wancucen nns, itemsawal s idvewdvan, waxxa war issiwil maca ssnen min ixs ad yini, yarra xafs remqeddem:

- Azref⁴¹ n unbadv⁴² d wa d netta, waregh d agra n marrva imezdagh, war illi nnk wapa uca ad xafs tudvnedv…

Maca, netta aswingem nns yiriw, tughi t tyarzawt xf ucar nns itwacaren jar tittvawin nns, uyak ghars tasghart ad iru xf wagra nns, ad xafs iprec, ad xafs immt, nitni qqarn d agra nsn marrva; manis d ikka nsn, ma ghar marrva min ghar sn d igrwan ticcn angh zzaysn ca, agra mara war ghark illi jar tighmas d affaz⁴³, tssghrayt ghar uoddis nnc war das qqar oemmars inu!!.

Waxxa yiwi yarra jar ixxamen n rfusinat, azref n rmexzen imxumbel; igga am twafitin; war ttif d tawwart zi daysnt ghar tkecmed, manis mma tudfed ad tafed traja ck dinni tewwart d tamaynut; ck ad tarezmed asarraw nns ad tafed ictn nnidven, war qettvint, war tenfirirent.

Ameddur n uhewwas imsarwas ikd unni n rmexzen, axmi nni d twansaren zg ict n tinzar, urawen nsn d uzzar; d uffar, tamdint n “Jrada” adaf days d arubi, amsebrid days igwaren itaca aqqet di ca n udghar war ghars bu tefraz, wami infarar usenfar⁴⁴ n ccarbun zg ifran nns, djfen imswuriyen⁴⁵ i tawuri nsn, slazven tarwa nsn, nghin imal nsn...

Itoini d manawya uxf ittru Zeghdud, imezdagh war ugzun i azal⁴⁶ n imettvawen nns, ittru xafsn nitni tghiren xf dhur nns, maca itghima umettva d ijjn, trud xf ixf nnc nigh xf yan nnidven, imettvawen war d tarrin tasrit mara temrec nigh d amttin mara indver.

Traytmas di “lbucta”, teksi d iqarridven nni, teskuttvef d zzaysn cwayt n iduruten; tewci ten i remqeddem i das ifkan afuss n tawiza, minzi lmanda tuss d xf uzwel n Zeghdud, mri war telli d tissent nni i das tgga dg ifassen tiri war d tkessi walu, tinnidven tegga snt axemmer dg uhsin nns, tettar zi bab n “lbucta” ad as ikwet atriffun ghar mmis:

Muhend issen ira babas ur nns yuyel s tayri ghar tmurt nns am marrva irifiyen n zic, issen ira iyyar n tidrin tugha t ghars d ughris⁴⁷, war illi zg wami days ufin agra, mri days ufin ifighghran iteqqsen iri ixs it, akal nni mani uyaren inuba nns; ad dinni isvuref ura d netta am nitni, maca itwacmet, min ghar igg izmar jar tirarin n uccanen!!!

Yuss d ad indver babas, iks it jar ifassen n imezdagh d alghugh⁴⁸, jar tfugla⁴⁹ n trewriwin, yiwi t ad issummet acar n uskuti⁵⁰. Zeghdud immut, ijj d tamacaput⁵¹ teddar, teccur s timitar, d usutar n tayri…

Tamurt n Pulanda war telli ca am wammu, agra nns bettvant ayt bab nns jar asn, tetten akidsn ura d inni n midden, mkur ijjn ikessi tasghart nns.

Izvwa Muhend ghar iyyar n tidrin ad xafs igg asijji, ad ixzar mani days tiwedv tawuri, yufa ggin as afray s iymirn⁵² n uzzaren, war ghark manis d ghar tekked am ukermu n Tazmammart, tiharyadvin n toejjajin d tiwraghin, “parrvamat” soant⁵³ iqemmumen qedvoen am tgharedvmiwin, zeoofent dg ucar axmi nni tetten t dg ul n babas, teksent id tisvudvar; srusant dg ioeddisn n ikamiyyuten, smuttuyen senni idurar n icarn, idwel iyyar istextux s tawuri, amussu dg udghar nns am teghrasvt n tzizwa; tamment walu!.

Ibriden hemren s ikamiyyuten, ad tinid axmi temhizwaren ad nnghen tifraz i dcar, ad tejjen d aqeccar n wudem.

Tayarzawt tugha mani war ttigh, mri fkan⁵⁴ afuss i Zeghdud di tudart nns; mri kides swizan xf imenghan nns; mri arrin taynit i iyyar, iri assa war iteffgh ifassen nsn.

Attvasv n tebridin iten itrajan ad awdven ghar iswi⁵⁵ nsn, Fas war tsekki⁵⁶ dg ijj n wass, itxessa tawuri; d uswizi d umezday jar asn, atagh ad kkaren ca n tuffut ad afen tiyazidvin nsn sdalent xf tmellalin n waregh.

Muhend yarwes rxezrat nns dg umuzzar⁵⁷ n “parrvamat” nni sarvdvent agra n inuba nns, isvwedv xf ughezdis nns itwala ict n tarbat; tarxu i ucewwaf; tesfarnin s ughir, tettvef “mikruffun”, tnna as s usqsi:

- Ncnin zi telfaza n Arvbatv, nuss d ad ngg ijj n uruburtaj xf usenfar⁵⁸ n waregh di dcar nwm, nesitim zzayk ad kidnegh teswizid s wawal nnc…

- Nc zg imezdagh n dcar, d ta d tamurt inu, nettu ayawya nngh, maca dinni tayri jar angh, snimiregh s wattvasv i akuc xf tarzift nns idanegh d iwarda, d tanmirt temghar i rmexzen dangh t ihewsen, mri dangh t ijja iri netca xafs ayawya nngh, iri tufi d dg udghar n waregh tinedwin n idammen!..

Tmutti mujettvuy nni, tezri s ughirin ghar innidven ad tn tesseqsa, Muhend issen ira awal nns war ghars araq di telfaza, nigh mara iodud ad ikk buseyyar; ad yifif ad izwi ad inghed ad ifegh d azyen, maghar marrva min itwannan itefegh d di telfaza! war illi ca am Pulanda; min ghark dg ur aqqt ghark xf yirs; aqqt ghark di telfaza, war dac itegg ura d ijjn isekraf⁵⁹ nigh abulis ghar uxarresv nnc, issen ira aruburtaj ad issiwel xf tcuni n usenfar, d usemghar zzays, amenni nnit, iraja isallen.

Aneghmis amedvlan:

Qdvan ineghmisn, infarar wawal n tkerkas⁶⁰, tiwecca zic ad tiyyar tfuct xf Lmeghrib amaynu! Traytmas tezra mmis issawal di tribizyun, waxxa tnnuri, tettu tiqqest tejja tmettant d ayezzum dg ur nns, waxxa teqqim d tajjalt; maca ghars Muhend nns d anaruz, txarresv ad kids tmun ghar Pulanda, war das itghimi min ghar tegg jar ususem n dcar.

*****

Maymmi a tudart gharem ur iqqseh d arvumi!! Amarret yujar tiddi nnm… ghar umeggaru ad teqqim Traytmas d tayujilt, maca dinni abrid n “fiza”, ad zzays tennuwju ghar mmis, ad kids teddar ayenni n ussan itghiman dg umarwasv n buhbel nns.

Muhend issarjij agayyu⁶¹ nns, ixs ad issezvwa immas, yarra inna as:

- Maca tamurt nni n ujris d tayyut, dghya ad days txeyyqed..

Muhend war issin manis i ghar issenta, ma ura d netta ad idvfar tabridt n babas, ad yarzu xf tesghart nsn; ad tid ikkes jar accaren d iqemmumen n isvidven, mhizwaren ixarrisven di twangimt nns, yufa ixf nns yuyel jar ujenna d tmurt, dg ammas n taylalt⁶² i temraywan xf tseffay n tayyut n Pulanda.

*****

Tamurt ul nns d waregh, ayt bab nns tgajen d isemghan ghar midden, maolik d ghar dewlen marrva imennejra ad ssemgharen s tgherma⁶³ nsn, ad tedwel tudart ghar uxxam i tugha yaredren, ad isfuffi umessuci s ughmmuy n buzziyzu, ad tedwel tudart ghar raxart!!..

Maca mani illa wi t ghar iggen?!.

Min illan yiff⁶⁴ attvasv ghark, d arif nigh d Pulanda?

S tmelsa⁶⁵ n temzvi nsn; tarran d xf iseqsiten; nebla axarresv:

- D Pulanda!

Tiwedv ghar temdint n “Umsterdem”, s ibehrar nns; war tessin ad zzaysn tuyar, tamurt d ujenna marrva d tifawin, areqqent xesynt am isefdvawen n itran, itghir as d ca n tfaska⁶⁶ twag di temdint, nigh d mmis isemgharen s twasit ghars.

Tekcm ghar taddart, sriwerwent ayt n uxxam, nettat tettvbpet, txezzar attvasv; tssawal drust, axmi nni d tugha tyarzawt xf buhbel nni issewsar zzman deghya jar izeghran d ighezran n dcar, axmi nni tugha tyarzawt n mayemmi war d tezvwi d tamezvyant, ura d nettat ad tekkes ca xf ul nns; ad tarr imezran ikd Zeghdud; ad kids tirar jar tfawin, ad ggen afuss dg ufuss; ad qqasen zi tazvyudvi n tqemmumin; a das iwarda ajedig⁶⁷ mammec i tezra teggen ayt bab n tmurta, tisvudvumin di Pulanda war xafsnt bu ufray, svudvem mermi mma texsed d mani mma trid.

Maca amuddu di tudart d aqudvadv; deghya itenfarar, deghya itejja temzvi ghar tcarmin, itawid akides tewsar, mani iqettva usitem; itazvegh am inessisen di tariwin.

Tezdegh di tayyut; dg udfel; d unzar; d ujris… tezdegh ura di rhesvran, mermi mma temmutti dg uxxam taca axmi tella di ca n tkurmut⁶⁸, axxam nns di arif anict n wanict, itara mezri i tudart, asqif nns iqqim d anedvrar i tirarin n tejdvidvin t yufin d adghar n ufra i tmughzarin nsnt.

Tudart n imnneoraq d aghufi, Traytmas ibedd d akids wawar n mmis, maca tghufit n tidet axmi nni d taf war das itarri taynit, tesmunit xafs tawuri, ayyawen mkur ijjn d amadval nns, ijjn war issin unnidven waxxa d awmaten n ijj n uoeddis, taddart n lwacun maca axmi nni tzedghen imsebriden, ura d amsawadv jar asn dg uxxam d asvemmadv s tutlayt n tpulandit.

Umi tejjim arif nwm, dewret ghar ixf nwm, aqqa izmar mara iffegh ulli nns deghya ad itwac jar uccanen, umi tejjim ixxamen nwm; tiseklutin⁶⁹ nwm; timzidawin nwm; ibupariyen nwm…

Arrif izzuyyet⁷⁰ tarwa nns, izzuyyet aghimi akidsen ghar tfawt n tziri, ad asn yini taycitin nns; isutar nns; tinfas n icetcan nns…

Ad asn yini xf tiqqest ughezdvis nns, dg iyyar mani t tqazen s iriyzam, idammen nns swinten war dasen jjin ura d asekkif...

Tamurt n tazwagt war tkessi iwezwizen nsn, teddaren tmettan am imsebriden rebda itghima daysn laz n uzddugh⁷¹ nni.

Traytmas yargha days uynni wami tesra ghar ubarrah itsvudv di jajj n ul nns, tnna as di tuffut nni tasvemadvt i mmis:

Tufa dcar yarrni ahuzi, kradv n issegwussa axmi nni d kradv n ussan, iyyar n tidrin yughel⁷² marrva d inuqqab, arrint d irimamen, rettxen days axmi nni ccaten s ixedmiyyen dg ul n Zeghdud, tufa dcar yuggi ad immutti ghar tfawin nni i tezra mani; ghar tgherma⁷³ nni i tufa mani; ghar tqemmumin nni itezra mani, tufa arif oad itmurud xf ifadden nns, itnedraf, oad war irmid ticri am iqrinen nns.

Teqqunjer ghar undver n Zeghdud, tudar xafs, tsvudvmit s tayri axmi nni tesvudvum zg wancucen nns, wami d teksi udem, iccur uqemmum nns s ucar, war tesxi ad tessusef, tarrit ghar iles, tghezvit jar tighmas nns, tsgheryit s uzughmet ikd imetmi am tmezvyant iteghzazen tazvyudvi n tqaqqatin, tittvawin uymentid zg ul ijj n umettva iqrujjeod am udmam n waregh xf tgemmizin nns, yudum d itissiq xf undver, tessu zzays ul n Zeghdud yuggin ad yarca, maghar ulawen n waregh areccan!.

1^∗ Nostalgie

2 Archiver

26 Le venin

27 Serpent

28 La flamme