D tamddit. X tma n yill¹ Badi iqqim; issdvfar tittvawin i yorbab n usgnu i kd tturar tfuct; idj n umur ttarra tn d izwraraghn, ict n tikklt ttarra tn d iwraghn, ict nnidvn d imaghighdn… Zg imir ghr imir² issikka afus nns xf wsghun inndvn i wammas nns: tasarriwt tghns; iswizzdv ghar idj n wzvru d amqran ghar idvarn nns: asghun ikrs xafs. Jar iorbab n usgnu itturarn akd iznzarn³ imggura n tfuct, itwala t: tkka akd tbridt, aqbuc xf uorur, abhrur ighns dg wbyas, tigmmizin zwghnt, ttazzl ad tawdv d tamzwarut ghar tala hma ur s tizzarnt tnuyam uca ad qqimn ayt taddart s fad; itwala t dg iyyar, jar imndi d tmnsixt d tfrawt d bu-idunan, ttkks tugga; itwala t akids adu tzayart, mani ur tiwdvnt tittvawin n iwdan , tfuct n unbdu tghttvr d ijdvadv, ifssi tarzft i d itawi kuy asggwas zg Wprn: tittvawin n Munna twssgnt, ur ttif mayn ghad tini; itwala ixf nns itg s tasddiyt dg iri, idvwdvan nns arjijn umi udsn tilmct n Munna…

Di Dzayr, jar tamara d tsmudvi d tirghi d inidan⁴, d tumart ad di tittvawin n Munna i s iticcn azmr d tizmmar zi itbdda xf idvarn nns; d nttat i days itggn ul hma ad yarnu ghr dat. Lqmi itadf dg whcuc nns awarni ussan izirarn n ysi-srs dg iyyran n tzayart, itzzvl xf worur uca issnta istvca⁵ dg uzllif nns tudart i kids ghad iddr: ur itghimi ca d ismgh ghar urumi, ad iyru mayn umi izmmr n idrimn, ad idwl ghar tmurt nns, ad ig tyuya nns, ad ikrz tiqiradvin nns, ad irrzv imula d ibuda: tamurt ur issghmiyn ad tt yarr tssghmay s twuri n ufus nns; ad iccvr tisarfin d iqbbuzn d iqubac, ad zzisn izvwa isggwusa n tzawa itaghn tamurt zi imir ghar imir; ad isgh mayn umi izmr n izllifn n wudji d tghatvin, ad msarawn, ad dwrn d thimirt; s tadvuft i ghad tzdva Munna ad ggn tassut; tarwa nsn ad jjawnen acffay d ughi d trussi d waccir – ur tssnen lazv ur zvrrn tismdvi; ad izzvu azmmur d tsrighwa d wurtan; ddmnt ad is itg ighmayn⁶… Munna ad tili d tisit nns, d ajnna nns, d axxam nns…; afus dg wfus ad ssymn arrawn nsn, ad tn sskkn ghar tnumal zi ghad d ffghn d imsnawn imqranen, hma ur tddrn mayn iddr ntta, hma ur xafsn itkk mayn xafs ikkin..

S tirja amacnaw tin ad i yqqim Badi ibdd x idvarn nns, i ttugha issghray tarzg n unadi d tirriza⁷ di Dzayr.

Idv nni ur izvri idvs; tamara n wbrid ur zzis tiwi wara; iqqim itari-ittvar g isuray; mayn ghad ig? ad idwr ghar Dzayr, ad ssin ikk d abrid, ad ijmmdv, mamc ur itsri ommrs xf Munna d mayn zzis issctan¹⁰? Nigh ad tt ittu, ad ig ixf nns ur tt issin? Wap, amri yufa! maca mamc ghad ig ad tt ikks zg ixf nns mbra ad idwr ur illi d ntta – ur iggi ixf nns? Nttat d ntta d idj, u idj ur itwikks zg idj…

Maca mayn ur izmmr ad yisi s nnj qahh: ad issn is Munna ttili akd idj nnidvn. Jar tittvawin nns tmsdvfarn imdwanen¹¹: ttvfi t tghufi, itaca akd idmarn nns tnkkr daysn tmssi; izruza azllif nns hma ad s arn tittvawin, maca ghas nitni ad agwjn cwayt ntta ad tn yarr: ur izmmr ad tn itwala, ur izmmr ad iqqim ur tn itwili! Simma yiwdv ughzdis nns tamurt ili kkin d jar tittvawin nns, uca ad isur ibdd ammid t ttacm tmurt.

Amnni i yqqim itagh itettvf¹² arami t ighdvr wewhal. Iwdva, ikka xafs idvs, ikka adu tmurt; dg idvs nns izvra ixf nns iddakkwal d zi Dzayr, iwdv d ighzr n Mrwct, ingi d xafs ighzr; Munna ajmmadvin, ntta itmughzval akd waman, iswazzadv ghars, amazzar¹³ issaggwaj t xafs…

Ikkr d iswa s tidi, itrjijji d tasttva. Tugh tfuct tettvar ad tghri. Ikkr, yudf ghar whcuc n imassn¹⁴ n tyrza, ikks idj n wsghun d muzzur, igg t adu wqubbu uca idvra ghar yill. Wmi iwdv iqqim xf ubadu, inndv asghun i wammas nns, izvyyr tghuni; iqqn t ghar idj n wzvru imghar ur iwti di tmurt, hma lqmi ghad igr iman nns dg ill ad kids iwdva wzvru nni afd ur itghimi s nnj i waman. Umi isala asmuttg¹⁵ n ixf nns, ur ijji i tudart manis t d ghad tettvf, iqqim ad iccur tittvawin nns s wawlafn¹⁶ imggura n tudart s nnj i tmurt n Tcukt.

Tamurt ad, s yill nns d idurar nns, s ighzran nns d isdjyiwn, s twririn nns d idmrawn, s tsuwwa nns d tyusar, s imula nns d isummar, s tiziwin nns d tghzwin, s ighzran nns yuzghn d taliwin, s ibridn nns d tbridin… tamurt a issn tt amn issn arrimt nns; itaca akd ixf nns d cwayt zzays. Umi izwg ghar Uprn tikklt tamzwarut yuca akd wksum nns itghrusa d tighrsi – ommrs ur iggnfi uyzzim n tghrsi nni. Rxxu, ntta ibdd x uguji nns amqran, itaca akd uyzzim nni irzzm amur nnidvn. Abttvu x Munna isdvrghl t; abttvu x tudart ad t ibdva x tmurt a itxs amn itxs Munna – timxsa n mzri, n uzuzdv¹⁷. Lqmi tugh iddakkwal zg Uprn, lqmi ghad iswunfa idv nni amzwaru, itkkr zg idvs zic tuffut n tiwcca nns, tayyut oad tsmuna ibhrar nns, itffgh zi taddart, itmsagar akd tmurt, arnnunt imttvawn zzat i wazvri nns amghnan. Aswadv nns d asqiccm¹⁸ s tittvawin – amri itaf ili isskka xafs afus nns ansa ansa. Turart n tfawt d tiri jar imura d isummar, jar tisi n tsdjyiwin d ighzran d ticcwt n tyurar d idurar tsbdda ya s ur s wazvri… Issn tasdjya ya mcta trni gw allagh; izvra ayddim in mcta irni di tiriwt; yughr i waddar ad mcta yuli… Itnndv i yzghran: tasrighwa yad tarnu d ict n tcdvat; azmmur in yughi t ca: afar nns illnt; tafirast a ur turu ca am wazghat; urtu ya, acfir in…

Maca twara yad ikk d ca jar s d akid sn; yuca akid sn igwjn xafs; tittvawin nns ur xaf sn trusnt, tkknt s nnj-s nnj; immexs tn; amsawadv nni tugh illan jar s d akid sn iqdvu usghun nns; tittvawin nns urant¹⁹; itaca akd iman nns yura – ur days mayn ghad sn iwc. Tudart d mzri u lqmi ur illi mzri ur ttili tudart. U mzri isala akd ubttvu x Munna.

Ict n tikklt nnidvn, tikklt tamggarut, isskk afus nns x wsghun inndvn i wammas nns, izvyyr tassarrawt; iswizzdv ghar tsarrawt ighnsn azvru nni i ghars iqqn, irnu s tghuni. Indvr tittvawin nns g wghlluy: d azwraragh am ucmmudv. Ikkr ibdd; azllif nns yura; ur itici s wara; ur iswigim di ca. S mayn days icttvn n tzmmar yisi ixf ns d takssit, igr t gw aman.

Nnurzmn hma ad s djn abrid ad yadf uca dwrn aya ghar uya d.