Tanfust taqudadt:

Tafaska tanamurt

 Yura t: Said BELGHARBI

Tixzanin d ticemrarin, qqareqcent s tubbarcent am tedbirin, wtint timurar; ssunt tibehrar, icten zzat i tennedvnit, beysent xef taddutin nsent timatarin (raorumat) d tizegwaghin, ughint am tfassin n tesratin, mkur dcar s uqidun nnes, imezdagh munen dayes, teghzazen di tighmas; tcehharen; tqamen deg atay. Xef mkur adaf n uqidvun tuyer tawlaft n ugellid, d ca n tira iriwent tettarent s tudart i netta d rwacun nnes.

    Remquddam cedvnen, beysen xef wurawen nsen, tawyen taran, tendven jar tixzanin, tadfen di ta tefghend zi tin, war arsin , mermi mma ufin ca n umezdugh war d yusi ad ghares sqaden s tghuyyitin:

-         Tinim as yennac rqayed, aqqa d tiwetmin i yetghiman deg ixxamen, min cek yejjin war d tusid ghar tafugla (lhefla) , awar akidec d ameggaru!!

    Marra wenni  ghar yettun ass n tghimit n ugellid xef udabu (loarc) nnes; ad tawedv tenfult, ad yekk aseqsi di rfusina n teqbilt.

    Nec d amezyan am marrva ihenjaren, ghar negh d urar ameqran, ammu i danegh slemden di tinmel (tamzida), ixes anegh ad niri d inamuren (wataniyun), wenni war d yusin ad yadef takurmut (lehbes), deg assa n yarred arud d imaynuten (d ajdid), am tfaska, ntirar; n ffuhart; narsa i wudmawen nnegh tumart (rafrahet) d usfarnen. Amussu n rghaci; ijen itadef ijen itefegh am tegharsvt n tzizwa, timecdvahin, imedyazen, imezdagh, remquddam, imxazniyen d ixemmasen d neccin.. marrva aydud itettar s tudart i wgellid d rwacun nnes.

    Taqidvunt n rqayed war tedji am tixzanin nnedvnit, tawwart nnes tcewwar s tisedvwin n tseklut n teyyni, di jajj nnes tifawin areqqent xesyent; ca d tiwinaghin ca d tizegwaghin… wcint as i wraq nni tcuni d wazli, xef ughezdis n uqidvun temmars ict n tawlaft n ugellid d tameqrant anict n tireft, dinni i yeqqim rqayed d tarwa nnes iked ayt n rfusina, zzat nsen tidabutin (tablat) ccurent s ghasyusa; d tiqaqqatin d weghzaz d marrva min itidar yires, ggin xafsent amxazni, neccin zi ragwaj tasghart nnegh zi macca nni d rxezrat, maca tarwa n rqayed; tawyen taran, swazzaden ghar tisessi d ughezzi, war d asen yenni ura d ijen min teggem; axmi djan deg uxxam nsen…

    Ura di tinmel mmis n rqayed i tawyi t id itara t ghar taddart umxazni  di tumubil n rfusina, sghiman t ghar zzat am umghar, amselmed nnegh i tari yas attvas n taynit, mkur twarat itseqsa t i ma yugzu (yefhem) i min nlemmed, ict n twarat ameddukel inu ikksa yi ca xef wul, izra ghares ijen n umaru (stilu) n ¨traq traq¨ izzul ar mani dast t yucar, netta i tari s stilawat i das d itacar babas zi rfusina, neccin ifassen nnegh beqqdven s ssmex  azeyza.

    Amxazni nni itazzer xaf negh, huma ad nejj araq d tifawt zi ghar itwara rqayed d rwacun nnes aqdiddes n tmecdvahin d yusin ad geogoent s toeddisin nsent, temhizwarent tawyent id izlan xef ugellid d umeddur nnes.

    Ass nni Mmuh ameqran war d yusi, yekka aseqsi, iffegh d zi rfusina gwar itsvudv, izzunfudv:

-         Ad jjegh udji inu war yarkwes, ad ghar sen d asegh ghar yina, ixes i babatsen wadji….

    Tendert tmeddit, udfegh ghar taddart, nnighas i baba:

-         Tfu xef rqayed!.

-         Mayemmi, min dac yegga?

-         War d anegh yejji ura d neccin ad nghez?

-          Maghar dayek raz n tqawitin; a mmis n weyydi!

    Ticti tamezwarut, tus d tarcem am tiggezt, tbeqqedv aghembub inu, tezzvu dayes tifras n treqqa n ufuss nnes aharcaw, udjghegh acar, kkareghd prudjyegh, arezzugh xef idvaren inu ad xafsen beddegh d tarewra.

    Nnigh deg wur inu:

-         Tfu x rqayed.. tfu x baba..

- Katalunya, Yennayer 2963/ 2013