Tanfust:

Ussan

Yura t: Mimun Amsbrid

(05 – 08 – 2012)

Advir yiwedv. Izkkunen ibarcanen ysghumaren di tecbabt nni tacmrart tazdat n tayyut teggen mezri... aswadv daysn aked tyuri n tfuct itekks ca x wur... tzayart inu ur xafi tffigh ca abrid – aseggwas awarni wsggwas advir nnes itizidv, itegdir... wi ttugha innan iyyar nni n tizdvent d tzuggwart ad yaru izekkunen a n udvir  itarran mzri i tittvawin?!... wmi wtigh ticti tamezwarut di tmurt hama ad zzugh izdjifen a n tzayart aryzim idwr d ghari – tamurt d azvru: iynidven n tizzdvent d izvewran n tzuggwart msadafen, ur as jjin i wreyzim manis gha yadef... amenni, ticti awarni ticti, tiri tmurt tarzzem ay arrimt nnes: car nnes azeggwagh itbzuzuy adu tiyyita n uryzim inu; hhep, hhep, hhep … tugh ay iwdvegh, ghari tizemmar n wuzzar, ighadjen mmudven, ur tihregh, ur ttinigh: eh! teggar d xafi tfuct g iyyar, days i xafi tghedji. ghar umcri ttawi ayi d munna abray – ttawedv d ghari teswa s tidi, udm nnes d azuggwagh am tatvumotict, maca ur nnes ibbirrep. ad tssers tasvennajt nnes, ad tqqim ghar tmurt, ad ay tini: «xmi d xafk traggabegh uca twarigh tatuct n tmurt tazeggwaght ttiriw, itmeysi ufud inu, itmarni dayi wzyen». munna d nec ttugha ntexs ayawya attvas, maca ur t nttini i wayawya: nssen, iwa i wawar mayemmi?!... umi t id tiwi yemma ttugha ngh d imezzyanen, d ihenjiren wapa… traytmas nnegh  – wetcma tamqqrant – tufa ngh ict n twara nturar fuleolao di tsedjya adu taddart, tuzzer d xafnegh ssinni, tiwi angh d ur ntwiri abrid: «maghar aryaz d temghart nnes turaren fuleoleo?! »… ttugh ay ijjen ghar yemmas: baba ymmut s uqartvas yejja yi mmis n xmstvac n wussan… yemma imri tufa iri mghargh, iri iwdvegh t id, tiri tegga ayyawen d tayyawin; uca tessemgher ay d am ur mghirgh: tegg ay tamghra s ca ur idji… baba ijji tt d tamezzyant aked sin n iyujiren: ttugha zzays aryaz, zzays tamghart... umi d isug usvbbanyu tegga negh nec d traytmas nnegh g igharynen, x wghyur, ijjen di taghma, tarwer zzayngh aked inarwaren ghar rbranes… di tarewra nni ttugha ttveyyarat n usbbanyu ghettvrent id xafngh rmaynat: ca itas d gw udji d ifunasn n imrakkwaren, ca iwettva d xafsn nitni... yemma tkessi ifassen ghar ujenna, ttettar: «aaaaa rebbi uyac di buhber!»  - hama ur ntghimi d izeynan n iwdan, ur nddir ur nemmut, amacnaw attvas zeg inni di d  yusa ca n ucdjiq n rmaynet, yekks asn fus nigh d dvar nigh  d tittvawin...

di rbranes, ntnus adu wfadvis: ur ntessu, ur nddir, mghar arrudv i gharngh x termect… ikccudven uffen, ur daysn ttettvef tmessi – hama ad nezzgher wapa, tasmwit ur gharngh mayn gha nessemw... ntett tarma, tifghwin, tighddiwin...

nqqim din ar ami yarrez mmis n ssi obd krim: isseghd uqartvas – imughar zzaysn wen issarsen mawsa, idwer ghar tyarza nnes, zzaysn wen yggin fus gw fus aked usvbbanyu... neccin injmen nedwer d ghar tmurt nnegh: wenni tarewsa itras, wenni tyarza icarrez... iwdan ggin amxmi ttun asvbbanyu, aqartvas, mmis n ssi oebd krim...

yegga xafngh usvbbanyu mmuh n omar d amghar: awar nnes wapa i tawdven... wmi mgharegh cway usin d ad ay ysin hama ad ay sskken ghar sbbanya ad bbulsgh – nec ijjen ghar ymmas… tezzenz yemma tixsi d tghadvt, tewca mayn zi tnt tezzenz i mmuh n omar hama ur ay yessekki s ughir…

arrigh s uzedjif ghar tmurt: tarzzigh, farsegh, tzzugh ,carzegh, mejjregh…

ayujir n 15 n wussan injmen zi rmaynat n usbbanyu, zi razv, zi tesmedv, zgw uccanen d yifisen n rbranes imghar, igga taddart, igga tamurt, igga arwacun!: tarwa inu msbdvan x tmura, ggin tarwa nsen, tarwa nsen jjin d tarwa nsen… attvasen arami daysen inni ur ssingh…

di tudart nnes tettar akidi yemma, nec idjan d ij, a zzay yegg arbbi 70…

aqqayen gha yiri iwdven!…

rexxu aqqay da qqimegh x tbadut, awarni tuwwart n taddart a yesgha mmuh inu di temdint a ur ghar yedji uzedjif ura d idvaren, arzzmegh drus tawwart hama ur ay twirin imsbriden – ur da ssingh ijjen, ur ay yssin ijjen, u ur xsegh ad ssnegh ijjen… ifadden inu dewren ur ayi kkssin… iwin ay d da tarwa inu hama ur  ntghimi mghar munna d nec g wdrar nnegh zi ffghen imzdagh nnes, ysin arrawen nsen ghar ujmmadvin…

akd umzwar ugigh ad tn dvfaregh:  mmenghegh, rugh… akd wussan ufigh urdji mani zg wguji…

munna, ass nni di d neffegh, tqqim ttennedv i taddart, ttadef – tteffegh g ixxamen, tettru, tessawar akidsn am tbuparect… di tbhirt tsqiccim i wurtan, tssekka fus x tiyyar n tsrighwawin, tshinnib i tfirasin… ur nnin tarwa nnes arami t ggin di ttumubil – amxmi tksen tadvuft zi tzeggwart…

gw ass nni i t id yugha uyenni: tedwer ttettu attvas. mara tegga ca ad yemw ttejja t hama icmedv, mara tekkar ad tysi ca zi tgharghart, ad din tawedv ad tedwer amenni… akd wussan tedwer nec s iman inu ur ay tssin… iiiip ya munna! a tenni ittugha marra d tighit!

nec zgw ami d usigh ghar temdint nec ghar deffar: zi tassut ghar tbadut, zi tbadut ghar tassut – ur ay iqqar ixf inu ad ffghegh. mayn ghar gha ffghegh? ghar toejjajin d imenghan! ifadden inu carfen s ughimi awarni tuwwart…

tasfift n wussan icnan toeddu zzat i tiffvawin inu… ussan nni wmi ttugha d xafi teggar tfuct jar tzayart, izkkunen n udvir tneyrurun jar wafar, teggen mzri, tcaren tittvawin … tazayart inu tif tenni n mmuh badi, tenni n rhaj largu, tenni n heddu n visinti…

munna, ttugha ur gharnegh ca nnegh: advir ur d itis ad yawedv ad tiri tebdva t d tundvicin i ymzdagh d imsbriden.  tifirasin amenni… ttugha tyawan s mayn tetten yewdan!

rexxu sekkwdvegh days ttadef – tteffegh, ur ttiwedv tamurt qah; amxmi s iwddar ca, amxmi turezzu x ca… zi ghad tyar tfuct nettat tbedd aked tuwwart : “iwa kkar! ad in nawedv wapa, uca ad nedwer! ad nssij wapa, mghar ad nessij!”… mani gha tawdved a munna?! aqa taddart nnegh tiggwej, wi ghad anegh din issiwdven?! u pa niwedv, mayn din gha neg?! taddart nnegh tewdva, tabhirt nnegh tsseghmi tazeggwart, cem tebbuperyed, ur tqqimed d cem…

amenni i ttghima ttawi – ttara hama tuher, ttpaya, uca ad tqqim ghar tmurt ad tru…

tzzidjiz ayi, maca mayn as gha ggegh? am nec am nettat: nedjuz tujjut n ucar iwta xafs wnzvar, aswadv di tzayart izzuknen, ticri jar wurtan, asqiccem i tfirasin…

tzzidjiz ay munna. izzidjiz ay ixf inu. arennan ay imettvwen. hama ur ay ttwiri munna ttrugh, qebbargh rqeb uca tghimigh trugh.